Recomendacións en Radioleiros: 17 abril 2020 #euquedonacasa

- Infantil:

Xiz de cor, de Xoán Neira López, con ilustracións de Mariana Riestra
Baía

Pertencente a unha colección de libros ilustrados que tratan de incentivar a creatividade e a imaxinación dos máis novos, Xoán Neira tráenos un poemario lúdico con motivos como o arco da vella, as estrelas ou a bicicleta entre outros. Ilustracións de Mariana Riestra en cores fortes e contrastadas que ofrecen un complemento visual axeitado para a poesía.

Dispoñible en GaliciaLe #euquedonacasa

- Mozas/os e adultas/os:

Nada se acaba, de Margaret Atwood

Lumen

No Canadá de mediados dos setenta, o matrimonio de Elizabeth con Nate está nas últimas despois de anos nos que pactaran unha convivencia libre. O suicidio do último amante dela abre unha etapa caracterizada pola confusión e a necesidade de novas solucións.

Dispoñible en GaliciaLe #euquedonacasa

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Abrimos a fiestra e vemos... a comarca de Valdeorras! #EuQuedoNaCasa

Versión Valdeorras achega á Rede filmes da comarca durante este repouso obrigado. Sempre Xonxa, Santoalla, Pradolongo, Os Fillos da vide, Lobos sucios ou Espírito Abertal son algúns dos filmes que forman parte do festival virtual. Desde o 9 de abril esta iniciativa de cineastas da zona está a publicar na Rede un total de doce filmes en tres quendas. 

Foi xa a primeira quenda á que seguirán outras dúas, previstas para os días 16 a 19 de abril e a última entre o 23 e o 24. A maior parte dos filmes está dispoñible en aberto durante unha semana, aínda que algúns só poderán verse nas 48 horas seguintes á súa estrea. 

Fonte: culturagalega

En GaliciaLe podes ver o documental "As silenciadas", que adica os tres primeiros capítulos a varias guerrilleiras das terras de Valdeorras que participaron en organizacións da resistencia antifranquista nos anos 40 do pasado século.

Non te perdas as películas e documentais desta iniciativa contra a desmemoria e o descoñecemento. Viaxa á a comarca máis oriental da provincia de Ourense, a comarca dos petróglifos de Valdegodos e Petín, da Vía Nova romana, das beiras do Sil, Xares e Bibei que producen nos seus vales caldos saboreados en todo o mundo.

Abre a fiestra á poesía e á ilustración... en liña! #EuQuedoNaCasa

Ese Sitio é un espazo colaborativo en A Coruña que organiza actividades ao redor das artes plásticas, escénicas, audiovisuais, a música e a literatura. Serve de punto de encontro de creadoras-es onde ofrecen os seus produtos e acolle eventos culturais e sociais de grande interese. Na fin de semana que comeza podes participar na Timba: relato e poesía, que hoxe 17 de abril, será en liña: neste encontro poderás ler as túas composicións e escoitar as das-dos demáis participantes. Pide o teu convite a través de whatsapp 687 139 139.

O ilustrador coruñés David Pintor ofrece este sábado 18 de abril, unha sesión de debuxo en directo a través de Instagram Live. David Pintor é un artista visual, ilustrador, humorista gráfico, caricaturista e pintor.

Non teme ningún soporte: ilustra tazas de cerámica, xoguetes infantís, a decoración en vinilo duns grandes almacéns en París, e por suposto, a ilustración de libros infantís e viñetas de humor político en prensa.

Comezou en 1993, xunto ao guionista Carlos López baixo o pseudónimo de Pinto & Chinto. As súas tiras apareceron en varias cabeceiras xornalísticas. Unha vez que se introducíu no mundo editorial con publicacións de literatura infantil, ten colaborado con Everest, SM, Anaya, Kalandraka, Sotelo Blanco, Círculo de Lectores, Biblos, Combel, etc.

En GaliciaLe podes ler "Desde unha estrela distante" de Agustín Fernández Paz, ilustrado por Pintor, para lectoras-es a partir de 8 anos, Recomendado en Radioleiros.
#EuQuedoNaCasa #yomequedoencasa

A pelota segue rodando... nas nosas cabezas! #EuQuedoNaCasa

A pelota non para de rodar aínda que os pés deban ficar quedos,  (hai quen aproveita un estreito corredor ou unha terraza para dar uns "toques"). Podemos imaxinar as xogadas durante estoutro fin de semana de fútbol... para ler. 

O xornalista Quique Peinado é o autor de "Futbolistas de izquierdas" en Lée|me. Traballou en radio, Asuntos Propios (RNE), prensa escrita (Marca, Gigantes). Programas de televisión de La Sexta e o podes ler en Esquire, Tubasket.com, Lainformacion.com, Eurosport e Mediapunta. Podes seguilo en El muro: diario de un confinamiento. 

Ademáis desta lectura que podes descargar na ligazón (epub, mobi), ofrecemos a través GaliciaLe, o clásico "Fiebre en las gradas" de Nick Hornby e a película "Tshweesh" para mozas-os e adultas-os. "Mariña e o balón" de Pere Tobaruela e "¡Fútbol! Mucho más que un juego" de Pablo Nacach, para as-os nosas-os lectoras-es infantís e xuvenís.

#EuQuedoNaCasa #yomequedoencasa

Grazas pola túa literatura, Sepúlveda ! #EuQuedoNaCasa

Aló por 2009 recomendabamos na emisora municipal Radioleiros a novela "La lámpara de Aladino" de Luis Sepúlveda. O escritor chileno que vivía desde 1997 en Xixón, finou hoxe vítima do coronavirus. Sepúlveda escribíu máis de vinte novelas, libros de viaxes, guións ... Marchou do seu país natal en 1977 tras ser represaliado pola ditadura de Pinochet. 

Despois dun periplo por varios países de América Latina, ficou en Asturias. "Historia de una gaviota y del gato que le enseñó a volar" foi adaptada ao cine e en versión animada. "Un viejo que leía novelas de amor" foi dirixida polo realizador australiano Rolf de Herr. Deixamos nesta ligazón unha pequena entrevista en agosto de 2019 na Feira do Livro de Lisboa. 

Na plataforma GaliciaLe podes ler as novelas de Sepúlveda "Historia de un caracol que descubrió la importancia de la lentitud" e "El fin de la historia".

#EuQuedoNaCasa #yomequedoencasa

Poñemos a máscara... de mergullo e viaxamos ao fondo mariño! #EuQuedoNaCasa

A Asociación Ecoloxía Azul é unha asociación de divulgación científica, especialmente enfocada á bioloxía e a ecoloxía mariña, a conservación da biodiversidade e o desenvolvemento sostible. Para os seus estudos, realizan mergullos en rías, mares, océanos, lagos, ríos, publican artigos de divulgación científica en diferentes medios e fan extraordinarias fotografías e documentais como o espectacular “Un espectador vulnerable” que ten ao polbo como protagonista nas súas zonas de reprodución e crecemento das illas Cíes. 

Coñece máis deste fascinante animal que posúe un cerebro que lle permite funcionar coa intelixencia dun vertebrado inferior, ter a mobilidade dun peixe, é capaz de aprender, ten memoria e acumula experiencia... 

Ecoloxía Azul está constituída por Gonzalo Mucientes, David Villegas e Alex Alonso, biólogos, mergulladores, naturalistas, exploradores, investigadores incansables dos ecosistemas mariños, e un importante grupo de colaboradoras-es... Grazas a todas-os elas-es polo seu infatigable traballo e ao Colexio Oficial de Biólogos de Galicia por dárnolos a coñecer! 

Suxerímosche a lectura de "O neno mariñeiro" de Bernardino Graña, novela de carácter autobiográfico coa vila mariñeira do Morrazo ao fondo, e "Illas a sotavento" de Henrique Dacosta. As-os máis novas-os, probade "El libro de los animales misteriosos" de Lothar Frenz. Vaivos sorprender! Todos en GaliciaLe.
#EuQuedoNaCasa #yomequedoencasa

Un paxariño do bosque chega! #EuQuedoNaCasa

A Asociación Española para la Sostenibilidad Forestal PEFC lanza “Coloreando Bosques PEFC” unha campaña divulgativa para que as-os nenas-os coñezan os animais dos bosques, aprendan as funcións destes importantísimos ecosistemas no planeta e os beneficios que teñen para o medioambiente. 

As-os cativas-os gozaredes coloreando as láminas de Emma Morales, entre as que podedes elixir, El oso pardo en nuestros bosques, La cabaña en el bosque, El arco iris y la corteza terrestre, Micología y amanitas. Cada semana terás unha máis para decorar. 

Máis que nunca, os bosques precisan de nós! Colle a caixa de cores e déixate inspirar pola natureza!

Ofrecémosche a lectura de "Magalina y el bosque de los animales mágicos" de Sylvia Douye e "Os tres osos" de Marisa Núñez, en GaliciaLe.

Miramos pola fiestra... as paredes soñadas de Lugrís #EuQuedoNaCasa

Finalizamos a celebración do Día Mundial da Arte cunha visita virtual á expo «Lugrís, paredes soñadas» do fantástico pintor atlántico organizada por Afundación. Celebrada en 2017, recolle un total de 106 obras que repasan o traballo realizado por Urbano Lugrís como decorador de espazos, obras moitas delas nunca exhibidas, como o bosquexo do artista para a igrexa de San Pedro de Visma (proxecto non realizado), o óleo Stella Maris, para a Confraría de Pontedeume; o gran mural que pintou no Sanatorio Álvarez, en Santiago de Compostela, etc.

En GaliciaLe podes ver o documental "Urbano Lugrís. A travesía do Océano".

#EuQuedoNaCasa #yomequedoencasa

Desde a fiestra vemos... a arte de non estar! #euquedonacasa

O fotógrafo, artista dixital, ilustrador e deseñador gráfico David Bokeh lanzou o proxecto "Desdibujar". A idea é poñer a arte en cuarentena, como ten feito o Covid-19 con todas-os nós. 

En Pandemiarte: el arte de quedarse en casa, elimina coñecidos rostros da pintura, quita corpos que enchen estancias, bota fóra do seu hábitat "natural" ás-aos protagonistas de célebres pinturas. Fican os escenarios espidos, nun desolador lenzo que por veces desacouga. Cal é a emoción que a ti che provoca? Bota un ollo a "O xardín das Delicias" de El Bosco sen os personaxes que o poboan ou "O Grito" de Munch sen o ser que todas-os coñecemos. 

Recomendamos "Esto es arte" de David Armengol, para as-os nosas-os lectoras-es infantís-xuvenís en GaliciaLe. E para mozas-os e adultas-os, a novela "Aníbal e a Pintora" de Xabier Paz.

#EuQuedoNaCasa #yomequedoencasa

Abrimos a fiestra e soa... a arte que se escoita! #euquedonacasa

Guernica de Picasso, Meninas de Velázquez, Columna rota de Frida Kahlo son algúns dos cadros "falados" nos podcasts de Encuádrate (Podium Podcast), explicados no seu contexto socio-histórico. Son entre 15 e 20 minutos que desvelan claves estilísticas e detalles da vida das-dos artistas.

Para "abrir orella", escoita o podcast "La pintura libre e independiente de Remedios Varo". 

"Como si pintase con la mirada y no con la mano", así  definía a arte de Remedios, o poeta Octavio Paz. Descubre a vida e a marabillosa arte desta pintora fascinante. Coñece a esta extraordinaria artista, nacida en Anglès (Girona), que desenvolveu case toda a súa carreira en México. Neste caso, escoita a obra "Mujer saliendo del psicoanalista".
Para desentrañar moitas claves da arte consulta en GaliciaLe o "Diccionario de símbolos" de Juan Eduardo Cirlot.

#EuQuedoNaCasa #yomequedoencasa

Pola nosa fiestra entra... a arte que se le! #euquedonacasa

Hoxe é o Día Mundial da Arte. A arte é unha das formas máis evoluídas da expresión humana. Sons, palabras, imaxes, recursos plásticos, o propio corpo, serve para comunicar aquilo que bule no espírito de cada persoa. Celébrase desde 2012, cada 15 de abril. Escoullese esta data porque ese foi día do nacemento de Leonardo Da Vinci, pintor, escultor, deseñador, arquitecto, poeta, biólogo... 

Para conmemorar este día temos varias propostas. 

Eis a primeira: a arte que se le. A revista Conde Nast traveler ofrece unha serie de artigos que falan de cadros, baixo o título Viaje a un cuadro. Pinturas coñecidas, de El Greco a Andy Warhol, comentadas dun xeito moi ameno e interesante. Xa que estamos de pleno na estación, vexamos e leamos "A primavera", de Giuseppe Arcimboldo, autor de personaxes con elementos da natureza e obxectos cotiáns. Completamos esta visita en GaliciaLe coa biografía de "Leonardo da Vinci" de Walter Isaacson e "El gran libro de inventos del pequeño Leo Da Vinci" de Christian Gálvez.

#EuQuedoNaCasa #yomequedoencasa

Deixamos que entre pola nosa fiestra... a natureza! #euquedonacasa

Os parques, xardíns e zonas verdes de Oleiros ocupan unha superficie considerable (729.000 m2). Botamos de menos saír e camiñar eses lugares onde se respira natureza. O Parque Ibarrola (Montrove, Liáns), xardín romántico para pasear ao abrigo das ruínas do antigo Pazo de A Capela. O Bosque dos Veciños (Liáns), pulmón verde do concello con arte e historia: Igrexa de Santa Eulalia de Liáns e Pazo de Lóngora. Parque as Galeras (Bastiagueiro, Liáns) ideal para pasear, xogar ou facer deporte ao carón do mar. Ten o "Miradoiro do eco" onde nos sorprenderá un espectacular efecto sonoro. E moitos máis. 

Se queres gozar, polo de agora, da visita virtual, a outros parques de España, coñece a web Vivirlosparques.es, páxina especializada para descubrir parques e xardíns españois de forma didáctica e interactiva. Neste escaparate tes paseos virtuais en 3D, mapas, fichas descriptivas, e outras ferramentas interactivas. Deixámosche dous exemplos: na cidade da Coruña podes visitar virtualmente os Xardíns de Méndez Núñez e en Barcelona, o Parc de la Ciutadella. 

Eis a suxestión de varias lecturas, á túa disposición en GaliciaLe: "O xardín das bolboretas" de Laura Weston, "O xardín das pedras flotantes" de Manuel Lourenzo González e "El mesías de las plantas: aventuras en busca de las especies más extraordinarias del mundo" de Carlos Magdalena.

Galicia, un relato no mundo... abre as súas fiestras! #euquedonacasa

Canto de cada un de nós procede doutro lugar, doutros países? Esta é unha exposición de vitorias, de derrotas, de traizóns, aventuras. Seis mil anos de historia, na procura dos momentos de formación de moitos dos trazos da identidade galega. Sirvan estas palabras de Manuel Gago Mariño, xornalista, profesor, escritor e comisario da exposición Galicia, un relato no mundo, a modo de resume do que foi esta extraordinaria exposición que pechou as súas portas físicas o 12 de abril. 

A pandemia obrigou a que as visitas se interrompesen o pasado 13 de marzo. Un percorrido que nos leva desde a prehistoria á actualidade e afonda nas relacións entre o territorio histórico galego e o resto do mundo. Foi o primeiro capítulo da triloxía de exposicións da Xunta con motivo do Xacobeo 2021. A exposición agrupou numerosas pezas de alto valor simbólico para a historia e a cultura do noso país, conservadas en prestixiosas coleccións museísticas de todo o mundo como a Cambridge University-Parker Library, as Bibliotecas Bodleian da Universidade de Oxford, o Museo del Prado, etc. En moitos casos, chegaron a Galicia por vez primeira para seren exhibidas nesta mostra. 

Para quen non puidera gozar dela pode facer un paseo virtual pola mesma e ver en liña o seu marabilloso catálogo.
Fonte: cidadedacultura.gal

Grazas por este inmenso relato de nós mesmas-os, grazas por amosar a fecunda presenza de Galicia en todo o mundo!

En GaliciaLe tedes á vosa disposición varias obras de Manuel Gago. 

#euquedonacasa #yomequedoencasa

Abrimos a fiestra e mandámosvos... bicos!!! #euquedonacasa

Disque hai un día para todo: hoxe é o Día Internacional do Bico. Polo visto, nun día como hoxe, unha parella tailandesa estableceu unha marca polo de agora inatinxible: un bico de 58 horas... Son días complicados para dármonos os bicos. 

Días de bicos aprazados, bicos adiados que agardan ser dados.  Botamos de menos a calor e o afecto que transmitides cando vos achegades ás bibliotecas: as Bibliotecas de Oleiros queremos mandarvos estes biquiños literarios con todo o noso afecto. E lembrade que en Oleiros, perpendicular á Avenida de Miguel Hernández, a quen pertencen estes fermosos versos, discorre a Rúa dos Bicos.

He de volverte a besar,

he de volver, hundo, caigo,

mientras descienden los siglos

hacia los hondos barrancos

como una febril nevada

de besos y enamorados.

Botámosvos estes "bicos literarios" a través de GaliciLe: 

"Bicos de música" de Mamá Cabra. A curiosa historia dun neno con febre e dunha repartidora de bicos en "O meu pesadelo favorito" de María Solar (Recomendado en Radioleiros), "Muriel" de María Canosa, tamén recomendado en Radioleiros. Muriel botaba de menos as conversas coa avoa e os seus bicos máxicos que curaban calquera dor. "El beso de la mujer araña" de Manuel Puig, "El coleccionista de besos" de Pedro Ángel Ramos García, "Los besos en el pan" de Almudena Grandes.