1/3/19

Recomendacións en Radioleiros: 1 marzo 2019

https://youtu.be/LWe0bUQx4aU
https://catalogo-rbgalicia.xunta.gal/cgi-bin/koha/opac-detail.pl?biblionumber=1482091- Infantil (menos de 8 anos):

É tempo de Entroido!
, de Ramón D. Veiga e David Sierra
Xerais

Fermoso libro ilustrado infantil cunhas coloridas ilustracións e distintas rimas que presenta diferentes Entroidos e as súas comidas típicas. Co pretexto de preparar un bo cocido, percorre distintos lugares onde poderemos ver figuras como boteiros, volantes, pantallas, o loro Ravachol, choqueiros coruñeses etc. todos xuntos viaxando nun chimpín para organizar unha festa.

Con ilustracións de gran colorido e variados traxes, ao tempo que len o texto rimado, divertiranse pasando cada páxina e vendo os característicos traxes.


Un libro excelente para que as/os máis pequenos se vaian familiarizando cos singulares personaxes do Entroido galego.

- Mozas/os e adultas/os:

Antroidos e máscaras na Galiza rural, coordinación do monográfico, fotografías e comentarios de Alfonso García Santos
Sermos Galiza

Obra relevante para saber máis sobre o Entroido en Galiza. Comeza cun interesante texto do museólogo Felipe-Senén analizando esta conmemoración ao longo da historia e presentándoa como un tempo para a inspiración creativa, rexenerando tradición e innovación, sen esquecerse da importancia do encontro lúdico, como festa para compartir.

A partir desta introdución, cunhas magníficas e fermosas fotografías, Alfonso García Santos móstranos detalladamente como se celebra esta tradicional festa nas distintas localidades de Galiza. Son uns 50 personaxes, coas súas correspondentes fotografías e explicación: o lugar onde se realizan, como son os traxes, nalgúns casos que significaban, os actos e bailes que fan, etc. Comeza cos Xenerais do Ulla, pasa polos Cigarróns de Verín, os Peliqueiros de Laza, os Troteiros de Bande, ou as Madamas e Madamitos de Entrimo ata chegar a analizar as figuras dos animais no Entroido, para finalizar no folión, os Fareleiros e na queima do Meco.


Unha obra magnífica, cun enorme traballo detrás, que reflexa tanto as celebracións máis coñecidas como outras descoñecidas, que nos ensina as principais características deste ciclo festivo.
Unha excelente ocasión para convivir, compartir e divertirse.

Repetimos con Felipe-Senén, viva pois o Entroido galego!

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

27/2/19

Entroido 2019 en Bibloleiros: mira que máscaras!!!

Neste Entroido, como xa é "tradición", temos obradoiros de máscaras nas sete Bibliotecas Municipais de Oleiros nos que nos explican as características das máscaras do Entroido galego e cada nena-o realizamos a reprodución dunha delas: peliqueiro, cigarrón ou boteiro, decorada ao noso xeito persoal. Eis o resultado dalgunhas máscaras! A que quedaron moi bonitas!

Clica na imaxe e poderás ver a galería de fotos!

Tertulia literaria en Rialeda: 27 febreiro 2019 (grupo A)

http://bibliotecasoleiros.blogspot.com/search/label/Tertulias%20Literarias
http://www.oleiros.org/c/document_library/get_file?p_l_id=14092&folderId=36737&name=DLFE-29601.pdfBiblioteca Central Rialeda (Casiña de actividades)
17,30 a 19,30 h.

Comentario de "La estratagema" de Léa Cohen
Documentación

Seguinte lectura: "Manual de mujeres de la limpieza" de Lucia Berlin

25/2/19

Soledad Felloza alumea o Día de Rosalía en Rialeda

"Cómo chove miudiño,
cómo miudiño chove;
cómo chove miudiño
pola banda de Laíño,
pola banda de Lestrove"

A actriz e contacontos Soledad Felloza acudíu a Rialeda co seu espectáculo "Chove miudiño" para dar coñecer ao alumnado de 1º e 2º de Primaria do CEIP Juana de Vega de Nós a figura, tempos e obras de Rosalía de Castro.

Versos que se prenden na punta do pé, que debuxan árbores senlleiras, que bailan coas bolboretas e que bulen ao redor dunha nena que  "sube ás ponlas das figueiras e alí déitase a soñar"

Cantando e escoitando, e tamén degustando os "bolos do pote" con caldo cos que Rosalía ía medrando nuns tempos de escaseza material pero fértiles na imaxinación da nosa escritora.

¡Ai!, ¡qué miniña!
¡Qué nena preciosa!
Dempóis de lavada
parese unha rosa.

I este miniño
que teño no colo,
dempóis de lavado
parece un repolo. 

Chove miudiño no país enteiro, e a choiva non é de auga, non:- é de versos!