19/7/13

Recomendacións en Radioleiros: 19 de xullo

- Infantil:
"Acuario", texto de María Canosa e ilustracións de Dani Padrón, editado por Embora.
Acuario de María Canosa é un singular dramatis personae no que os protagonistas son os peixes e outros habitantes dos fondos mariños. Marta, Xoán e demáis amigos queren saber de todo ese mundo dos mares e océanos e achéganse ao acuario para coñecer a peixes, cetáceos e moluscos descritos con musical rima por Canosa e imaxinados polos ollos coloristas de Dani Padrón para conxuntar un diálogo creativo que se goza con sumo agrado.
- Mozos-as e adultos-as:
"La ciudad de Los Ángeles o el abrigo de Dr. Freud" de Christa Wolf, en Alianza
Christa Wolf, a escritora máis coñecida da Alemaña oriental, trasládase a Los Ángeles despois da caída do muro para unha estancia duns meses. Seguindo a pegada de Brecht, Mann, Schönberg e Adorno entre outros, Wolf reflexiona sobre o modo de vida americano e o acontecido nas dúas Alemañas das catro últimas décadas. Unha mestura entre a creación e o xénero de memorias que produce un libro distinto e á vez de total actualidade.
Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.