25/10/13

28 de outubro: Visitas do alumnado do IES Mosteirón á Biblioteca Central Rialeda

O día 28 de outubro recibiremos na Biblioteca Central Rialeda ao alumnado de 1ºe 2º de ESO do IES O Mosteirón.

- 8,45 h.: 1º ESO
- 12,00 h.: 2º ESO

Explicaráselles a historia do edificio, coñecendo as diferentes salas e servizos, xunto cunha demostración audiovisual sobre o funcionamento do catálogo.

Ao remate da visita, o actor Ramiro Neira de Artestudio Teatro realizará unha dramatización baseada nos relatos de Álvaro Cunqueiro.

Aviso importante: o 2º andar da biblioteca (Sala de audiovisuais e ordenadores) verá restrinxido o seu uso durante a visita do alumnado.

Recomendacións en Radioleiros: 25 de outubro

- Adolescentes (a partir de 12 anos): 
"La isla de Bowen" de César Mallorquí, editado por Edebé. Premio Nacional de Literatura Infantil y Juvenil 2013, Premio Edebé de Literatura Juvenil 2012, Lista de Honor do IBBY, Premio El Templo de las Mil Puertas. 
Esta obra trasládanos ao ano 1920 en Noruega, o mariñeiro inglés Jeremiah Perkins, tripulante do vapor Britannia, foi asasinado. A policía interroga ao práctico do porto que o único que puido dicir, segundo a documentación, foi que o barco pasara o inverno ártico nunha illa case deserta perdida na fin do mundo, a menos de mil quilómetros do Polo Norte e que o Britannia fora a este porto para buscar provisións e volver á mesma illa. Pero o mariñeiro Perkins, antes de morrer, enviou un pequeno paquete a Lady Elisabeth Faraday.
O fotógrafo Samuel Durango, despois de ver un anuncio na prensa, decidiu unirse á expedición científica do profesor Ulises Zarco, director da sociedade xeográfica SIGMA.  Nela tamén irían, ademais do profesor Zarco e o fotógrafo, o axudante Adrián Cairo, o capitán Gabriel Verne e toda a súa tripulación, o químico García e dúas señoras inglesas (Elisabeth Faraday e a súa filla Katherine Foggart) e debían dirixirse, no navío Saint Michael,  á Illa de Bowen, máis aló do Círculo Polar Ártico...
Unha magnífica e fermosa obra de viaxes, aventuras e misterio, sen esquecerse dunha pequena historia de amor, que nos levará a unha travesía chea de sorpresas.
É de destacar que o capitán se chame Gabriel Verne, unha homenaxe a Julio Verne (que se chamaba Jules Gabriel Verne) por parte do autor,  ademais de menciónarnos varias veces ao Capitán Nemo e o seu Nautilus. No libro tamén nos fala da obra “El mundo perdido” de Conan Doyle. 
- Mozos-as e adultos-as:
"Intemperie" de Jesús Carrasco, en Seix Barral.
Narra a fuxida da súa casa dun adolescente a través da España central, nun país castigado pola seca e gobernado pola violencia. Un neno escapa da súa casa e agáchase nun burato
nas aforas do pobo, na zona das oliveiras. A maioría dos homes saen a buscalo. Non o atopan. Esperou ata o atardecer para saír do seu agocho. Despois de beber e comer algo das provisións que levaba no morral, no medio da noite púxose a camiñar en dirección ao norte tratando de evitar os sendeiros. Camiñando cara ao norte afastábase do pobo, do alguacil e de seu pai. Nese camiñar atópase a un pastor que o acolle e lle axudará...
Segundo transcorre a narración o autor vainos presentando unha paisaxe seca, árida, sen auga e con moi poucas árbores, baixo un clima duro, caloroso, sufocante, no que ten que sobrevivir á intemperie, como moi ben nos indica o título. Moitas persoas comparan a este autor con Miguel Delibes debido ao protagonismo e á importancia da paisaxe. Descoñecemos o nome dos personaxes, incluso o do protagonista, preséntanolos como: chico, pastor ou cabreiro, alguacil ...
Un excelente e conmovedor relato, cunha linguaxe sobria, na que a presenza da natureza é fundamental.
Intemperie é o debut literario de Jesús Carrasco, pero editores de trece países xa se puxeron de acordo para publicar simultaneamente esta obra.
Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.


Hora do conto: de 28 a 31 de outubro

Salvo indicación, todos os actos terán lugar ás 18,30 h.
Biblioteca Pública Municipal "Mª José Ruso". Dorneda
Luns 28 de outubro
CONTACONTOS: Marisa Irimia
TÍTULOS:  "A ovella negra", "O meniño Nito", "Miña tía é verde"
Biblioteca Pública Municipal "Manuel María". Oleiros
Martes 29 de outubro
CONTACONTOS: Caxoto
TÍTULOS:  “Unha melodía doutro mundo”: “Sabela na granxa”,

“Bailaches Carolina”
Biblioteca Pública Municipal "Rosalía de Castro". Santa Cruz
Mércores 30 de outubro
CONTACONTOS: Paula Carballeira
TÍTULOS: "Unine", "A vaca, a cabra e o can"
Biblioteca Central "Rialeda". Perillo
Xoves 31 de outubro
CONTACONTOS: Soledad Felloza
TÍTULOS: "Contos para nenas e nenos valentes” 
(AVISO: Os títulos programados poden sufrir variacións en función do público asistente)

21/10/13

Día da Biblioteca, 24 de outubro: celébrao connosco durante esta semana

O día 24 de outubro celébrase o Día da Biblioteca, co obxectivo de difundir a existencia dun servizo público de proximidade ao cidadán que contribúe de xeito eficaz a facilitar o acceso ao coñecemento a todas as persoas.
Para conmemorar esta data, nas Bibliotecas Municipais de Oleiros levaranse a cabo unha serie de actividades entre as que destacamos as seguintes:
BIBLIOTECA CENTRAL RIALEDA. PERILLO
Para mozas/os e adultas/os:
Uva e tinta: libros e películas na estación das vendimas: Selección de cine e literatura que ofrecemos para compracer os padais neste outono. Cátaos!
Outono e outras historias:
Exposición de películas con temática outonal. Unhas nas que o outono é o protagonista, outras cun tempo, cores ou luces outonais,  hainas tamén con romances de personaxes maduros, policiais, misterio ou terror...
Sobre sorpresa:
Suxerimos unha “cita a cegas” con diversos libros, discos ou películas, baixo  títulos ficticios como: “Menos é máis...”, “All that Jazz...”, “Voy cruzando el río...”, “Viaxes...”, “Bon appétit!!!...” etc. Queremos "xogar" coa curiosidade do lector ou lectora que leve o "sobre sorpresa" en préstamo e contar coa súa complicidade.
Para nenas e nenos:
O día 24, ás 18:30 horas terá lugar a Hora do conto a cargo de Pablísimo que contará “Ras!: contos batracios”.
Para todas/os:
Agasallo dun libro a todas as persoas que ese día leven fondos bibliográficos en préstamo.    

@bibloleiros: o 24 de outubro,  Día da Biblioteca, comezarán a "piar" as bibliotecas municipais de Oleiros na rede social twitter. Faremos o noso primeiro chío (tuit) neste servizo de microblogging. Daremos a coñecer as nosas actividades, convocatorias, programacións e todas aquelas novas que consideremos de interese.
BIBLIOTECA PÚBLICA MUNICIPAL ROSALÍA DE CASTRO. SANTA CRUZ
O día 23, A Compañía Trinke Trinke na actividade da Hora do conto  realizará un contacontos teatralizado titulado “O cole de Lonxedetodo”.
Os teus debuxos: As nenas e nenos que o desexen están convidados a realizar unha ilustración ou un debuxo sobre o último libro que leron.
Cal é a túa opinión sobre o último libro que liches:
Aos mozos/as e adultos/as preguntarémoslle a súa opinión sobre o último libro que leron.
Sorteo de libros a todas as persoas que ese día leven fondos bibliográficos en préstamo.
BIBLIOTECA PÚBLICA MUNICIPAL ÁNXEL FOLE. NÓS
O día 18, a actriz Soledad Felloza na Hora do conto narrará "La escoba de la viuda”, “¡Shrek!”, “Yo mataré monstruos por ti”.
Obradoiro de marcapáxinas:  Cada usuario/a decorará un marcapáxinas ofrecido pola biblioteca. 
Exposición de marcapáxinas: Todos os marcapáxinas realizados no obradoiro serán expostos nos taboleiros da biblioteca.
BIBLIOTECA PÚBLICA MUNICIPAL Mª JOSÉ TRINCADO. MERA
O día 25, o actor Ramiro Neira na Hora do conto, narrará os contos titulados: “A granxa”, “A aposta “ e “O cubo de leite”.
Obradoiro de marcapáxinas: As nenas e nenos que o desexen están invitados a  pintar e decorar os marcapáxinas do Día da Biblioteca. Os máis creativos tamén poderán elaborar os seus propios marcadores coa axuda dos libros de manualidades que temos na biblioteca.
Libro de agasallo: Todas as persoas que ese día  se fagan socias ou  leven algún fondo bibliográfico en préstamo recibirán un libro de agasallo.
BIBLIOTECA PÚBLICA MUNICIPAL XOGRAR MENDIÑO. LORBÉ
O día 23, o actor Ramiro Neira  na Hora do conto contará “Quero unha fantasma”, “Bolboretas”, “Preparados, listos, xa”.
Concurso de debuxos: “Ti e a biblioteca”, dirixido a nenas e nenos de entre 3 e 12 anos. 
Obradoiro de marcapáxinas: Para usuarios/as de entre 3 a 14 anos.
Agasallo dun pin de Bibloleiros
  a todas as persoas que ese día leven fondos bibliográficos en préstamo.
BIBLIOTECA PÚBLICA MUNICIPAL FEDERICO GARCÍA LORCA. MONTROVE
O día 22, a actriz Paula Carballeira na Hora do conto narrará “Contos de Cabo Verde”.
Bibliotecas cheas de libros e libros cheos de bibliotecas:
Exposición de fondos bibliográficos especiais que falen das bibliotecas ou nos que algún personaxe é bibliotecario/a.
Agasallo dun libro a todas as persoas que ese día leven fondos bibliográficos en préstamo.
BIBLIOTECA PÚBLICA MUNICIPAL Mª JOSÉ RUSO. DORNEDA
O día 28, a contadora Marisa Irimia na Hora do conto narrará  "A ovella negra", "O meniño Nito", "Miña tía é verde".
Realiza o encrucillado: a biblioteca e o seu contido: Entregaremos pasatempos, (encrucillados, sopa de letras...) que deberán resolver para atopar nuns casos a palabra oculta e noutros as diferentes cousas que se poden atopar ou facer na biblioteca.
Exposición bibliográfica: para ler e encantar
BIBLIOTECA PÚBLICA MUNICIPAL MANUEL MARÍA. OLEIROS
O día 29, o contador Caxoto na Hora do conto narrará  “Unha melodía doutro mundo”.
 
Realiza o encrucillado: a biblioteca e o seu contido: Entregaremos pasatempos, (encrucillados, sopa de letras...) que deberán resolver para atopar nuns casos a palabra oculta e noutros as diferentes cousas que se poden atopar ou facer na biblioteca.
Os teus debuxos: Todas as nenas e nenos que o desexen están invitados a realizar unha ilustración ou un debuxo sobre o último libro que leron.
Elabora un cartel: Elaboración de carteis alusivos á celebración.