25/4/20

Abrimos a fiestra e vemos... Portugal! #EuQuedoNaCasa


https://youtu.be/cHSBQHWtNZk
Portugal festexa o 25 de abril, Día da Liberdade, e sairá á xanela ás 15:00 a cantar a Grândola. Este ano o país veciño non poderá botarse á rúa a celebrar a vitoria da democracia sobre a ditadura. "É tempo de… ler Portugal" de descubrir o país de Saramago, de Sophia de Mello Breyner Andresen, de Pessoa, de Florbela Espanca, a través dos libros, como promove esta campaña de fomento do turismo.

Ofrecémosche libros da plataforma GaLiciaLe que nos amosan Portugal a través da literatura. Abrimos a fiestra e vemos... Portugal cos ollos de "Resistencia" de Rosa Aneiros (libro comentado nas Tertulias Literarias). "Arraianos" de Méndez Ferrín, "Por que as sombras non teñen ollos" de Luís Manuel García Mañá. En eBiblio, podes ler en portugués: "O ano sabático" de João Tordo, "Luanda, Lisboa, Paraíso" de Djaimilia Pereira de Almeida, "E a noite roda" de Alexandra Lucas Coelho, "Adivinha quem sou esta noite" de Megan Maxwell. 

Para facer a espera máis agradable, co desexo de volvermos a cruzar a raia o máis axiña posible, deixámocheste tema de Salvador Sobral, "Anda estragar-me os planos".

24/4/20

Recomendacións en Radioleiros: 24 abril 2020 #euquedonacasa

https://catalogo.galiciale.gal/Record/Xebook1-244
https://youtu.be/ZUdKRr5rulQ- Xuvenil (a partir de 10 anos):

Soños de mar, de X. H. Rivadulla Corcón, con ilustracións de Viki Berre
Xerais

O escritor e realizador audiovisual vencellado ao mundo do mar tráenos este relato dun neno de sexto de primaria que atopa un poema inacabado do século XII. Un texto inspirado pola lírica medieval galega e pola cultura mariñeira. Ilustracións de Viki Berre, deseñadora gráfica, que emprega cores contrastadas dun xeito dinámico.

Dispoñible en GaliciaLe #euquedonacasa

- Mozas/os e adultas/os:

Diario de inverno, de Paul Auster
Galaxia

O xogo da memoria artella este texto de Auster (Nova Jersey, 1947) nunha narración que nos leva pola súa vida desde o nacemento até a idade madura. Prosa honesta e de gran claridade conformando un texto de calidade do Premio Príncipe de Asturias das Letras do 2006.

Dispoñible en GaliciaLe #euquedonacasa

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Os libros, poemas, fanse... cancións! #EuQuedoNacasa #yomequedoencasa

https://youtu.be/XV5CC0tBYe4
Caetano Veloso é cineasta, pintor e fundamentalmente cantor e compositor brasileiro. Un dos líderes do tropicalismo, que en 1997 lanza case simultáneamente un libro e un disco. Ao disco chamouno "Livro" e o libro titulouno "Verdade Tropical". A unión máis profunda entre ambos acabouse materializando na canción Livros
De libros, poemas e fragmentos da literatura inspiradores de cancións vai esta escolla. Dese frutuoso cruzamento xorden acordes e letras marabillosas. Abre esta escolma pois, o grande Caetano Veloso con Livros
... Quase não tínhamos livros em casa
E a cidade não tinha livraria
Mas os livros que em nossa vida entraram
São como a radiação de um corpo negro
Apontando pra a expansão do Universo
Porque a frase, o conceito, o enredo, o verso
E, sem dúvida, sobretudo o verso
É o que pode lançar mundos no mundo...

- Todas-os lembramos "Wuthering heights": Os cumios borrascosos de Emily Brontë fanse canción na voz de Kate Bush.

- Basado nunha historia de Boris Vian, nace "Lobo Hombre en París", a icónica canción do grupo español La Unión.

- "Chove en Santiago", poema de Federico García Lorca (do que escollemos esta "Antología selecta" en GaliciaLe), inspira a canción do grupo galego Luar na Lubre

- "Rocket Man" de Elton John. Ray Bradbury escribíu unha historia curta sobre un home que deixa a súa familia para emprender unha viaxe espacial. E de aí, á canción do músico inglés. Ofrecemos, de Bradbury, "Las doradas manzanas del sol", en GaliciaLe

Días de libro e rosas ou libros que falan de libros #EuQuedoNaCasa #yomequedoencasa

https://get.google.com/albumarchive/112968433170961771213/album/AF1QipNak0EZElOBa7l-ognD3uG6RL2yhB0GyJZUCuxO?feat=directlink
Hai un tempo, organizamos a expo bibliográfica "Días de libro e rosas", para celebrar o Día do Libro. Nesa escolla de libros que falan de libros, pretendíamos fuxir dos títulos máis habituais para unha antoloxía sobre este tema. Buscamos autoras-es e novelas nos que os libros digan algo, ou moito, ás-aos súas-seus protagonistas. Títulos que conmocionan a vida dalgún personaxe, que fan cambiar o rumbo da historia ou son meros pretextos para iniciar conversas literarias de fondo calado. Canetti, Paul Desalmand, Karen Joy Fowler, Quint Buchholz, Alan Bennett, Penelope Fitgerald, Agustín Fernández Paz, Alessandro Baricco, Ursula K. Le Guin e Manuel Rivas, entre outras-os, puxéronnos en conexión con libros que viven na alma doutros libros. 
Deixámosche aquí os títulos dispoñibles en GaliciaLe.
"O único que queda é o amor" de Agustín Fernández Paz (Recomendado en Radioleiros). Os libros como compañeiros na aventura de amar.
"La librería" de Penelope Fitzgerald. O nacemento dunha libraría nunha pequena vila abonda para alterar a toda a veciñanza.
"O último día de Terranova" de Manuel Rivas (Recomendado en Radioleiros). Liquidación total de existencias por peche inminente dunha libraría.
"La sociedad literaria y del pastel de piel de patata Guernsey" de Mary Ann Shaffer (Recomendado en Radioleiros). Reunións literarias en plena guerra en torno a unha sobremesa de pela de pataca.
Podes consultar a escolma completa de libros nesta ligazón e para cando volvamos a vernos, poderás levalos en préstamo das nosas bibliotecas.  E se o teu é o cine, mira nesta ligazón as películas que seleccionamos para a exposición. Seguimos gozando do Día do Libro!

23/4/20

Día do Libro 2020: Lecturas para Espazos Reducidos #euquedonacasa #yoquedoencasa

http://www.oleiros.org/c/document_library/get_file?p_l_id=32371&folderId=124736&name=DLFE-31946.pdf

"Hibernación", "retiro"... hai quen prefire denominar de formas diversas este período de distanciamento social que estamos a vivir. Cando toca quedar dentro das nosas casas, nunca como neste momento "colonizaremos" tan intensamente cada espazo do noso fogar. 

pois ti tes o teu recuncho preferido para a lectura.
Neste Día do Libro en Espazos Reducidos ofrecémoschas e agardamos que sexan do teu agrado.
#euquedonacasa         #yoquedoencasa

Ler ábrenos as portas do mundo agora que non podemos abrir a porta da nosa casa! Feliz Día do Libro #EuQuedoNaCasa

https://youtu.be/uRBfV8aTLAw
"Ler ábrenos as portas do mundo agora que non podemos abrir a porta da nosa casa". "Ler permítenos imaxinar, sorrir, compartir... cambiar a nosa mirada e acadar unha nova mirada moito máis libre". Estas son algunhas das fermosas reflexións, que sobre o libro, queren compartir as participantes nas Tertulias Literarias da Biblioteca Central Rialeda (Perillo) no vídeo que realizaron expresamente para celebrar o Día do Libro. Nel comparten connosco o fragmento dun libro que é unha extraordinaria suxestión de lectura. Queremos agradecer a todas elas a elaboración deste vídeo así como a súa participación nas Tertulias Literarias de Bibloleiros! Moitas grazas por facer biblioteca!
Por orde de aparición, Charo comparte "En una selva oscura" de Nicole Krauss (dispoñible en eBiblio). Rachi, "Instrumental" de James Rhodes. Digna, "El libro de los abrazos" de Eduardo Galeano. Mª Luz, "Yo, Gaudí" de Xavier Güell (dispoñible en eBiblio). Nina, "También esto pasará" de Milena Busquets. Chelo, "El verano de mi vida" de Maryann McFadden. Pilar, "Epidemia" de Frank G. Slaughter. Rose, "La isla de las mujeres del mar" de Lisa See (dispoñible en eBiblio). Fina, "Siempre es ahora" de Alicia Pérez-Hervada. Mila, "En las orillas del Sar" de Rosalía de Castro (dispoñible en eBiblio). Pura, "Cuadernos de todo" de Carmen Martín Gaite.  
Feliz Día do Libro 2020 a todas-os as-os nosas-os lectoras-es e usuarias-os!

Abrimos a fiestra ao entretemento... no Día do Libro! #EuQuedoNaCasa #YoMeQuedoEnCasa

Para celebrar o Día do Libro a Biblioteca Municipal "Xograr Mendiño" (Lorbé) proponnos este divertido entremento a base dos emojis, que todas-os nós usamos en redes sociais, plataformas de comunicación, etc.
A ver se acertas os títulos dos libros!
Se te rendes, nesta ligazón vai a solución!

22/4/20

Abrimos a fiestra e vemos... Kuala Lumpur! #EuQuedoNaCasa

https://es.unesco.org/world-book-capital-city-2020
Celebramos mañán, 23 de abril, o Día do Libro. Este ano dunha forma bastante "estraña", sen a vosa presenza nas actividades que adoitamos organizar para esta data. Ao longo desta semana iremos presentando actividades e propostas para vós.  En setembro de 2018, a UNESCO escolleu Kuala Lumpur, a capital de Malaisia, como capital mundial do libro en 2020.
Co lema "KL Baca: o coidado a través da lectura", o programa céntrase en catro aspectos: lectura en todas as súas formas, desenvolvemento da infraestrutura da industria do libro, inclusión e accesibilidade dixital e empoderamento das-dos nenas-os a través da lectura. Algúns dos eventos que terán lugar na cidade do sueste asiático, coñecida entre outros exemplos da súa arquitectura, polas emblemáticas Torres Petronas, auténticas iconas da capital, é a construción dunha cidade do libro (o Complexo Kota Buku), unha campaña de lectura para as-os viaxeiras-os do tren, a mellora dos servizos dixitais e a accesibilidade da Biblioteca Nacional de Malaisia e novos servizos dixitais para doce bibliotecas nas zonas más empobrecidas de Kuala Lumpur.
O obxectivo da cidade é fomentar unha cultura de lectura e inclusión: “Unha cidade que le é unha cidade que se preocupa”, enfatizando o acceso aos libros en toda a cidade. O ambicioso programa da Capital Mundial do Libro está vinculado á "Visión 2020 para Kuala Lumpur" e ao proxecto de ecocidade chamado "O río da vida" con librarías e bibliotecas ao aire libre que poboan as vías fluviais recentemente restauradas da cidade.

Para coñecer máis de Malaisia, recomendamos a lectura de "A la vuelta: dos hermanos por el mundo" de Germán Kronfeld e a guía "Sureste asiático para mochileros", ambos en GaliciaLe.

21/4/20

Artistas que quedan na casa e conversan desde... os seus balcóns! #EuQuedoNaCasa

https://masdearte.com/especiales/artistas-en-cuarentena
Artistas en cuarentena é unha iniciativa da confederación de museos europeos L’Internationale, entre os que está o Museo Nacional Centro de Arte Reina Sofía. 16 artistas de diferentes partes do mundo reflexionarán, desde os seus balcóns, sobre os efectos da pandemia. 
As-os artistas conversarán sobre os seus actuais espazos de traballo, as relacións que se plantean entre o público e o privado en tempos de confinamento ou sobre como exercer, nas actuais circunstancias, a solidariedade e a crítica.
As súas intervencións iranse publicando, unha a unha, a partir de hoxe 21 de abril e a través das web dos museos de L’Internationale e das redes sociais, incluidas as do Reina Sofía (Facebook, Twitter e Instagram). Colgaranse os martes e xoves das tres próximas semanas. 
Podes ler esta interesante reflexión sobre a arte no libro "Dios salve el arte contemporáneo: descubre los más sorprendentes pecados cometidos por los artistas de nuestro tiempo" de Óscar García García, en GaliciaLe

Luz que non se apaga #EuQuedoNaCasa

http://arbor.revistas.csic.es/index.php/arbor/article/view/46/46
Luz Pozo Garza, poeta nacida en Ribadeo en 1922, deixounos onte. A escritora e profesora universitaria Carmen Blanco expresa como ninguén, no artigo "Luz Pozo Garza: memoria radiante de una mujer solar" publicado na revista do CSIC, "Arbor: ciencia, pensamiento y cultura" como é a poesía dunha das máis destacadas escritoras galegas da segunda metade do século XX: a poesía de Luz Pozo Garza é un cosmos fulgurante de beleza platónica rexida pola claridade, a profundidade e a harmonía simbolizadas no nome que llo deu a luz, o dunha “muller solar” plenamente autoafirmada na súa vida e na súa obra, unidas no “corazón de Luz” da súa poesía. "Memoria solar", o título da súa obra poética completa contén a súa memoria radiante de muller solar, un cosmos curvo de plenitude que garda un microcosmos primeiro, o da súa poesía de mocidade, de froito vermello, cal laranxa ou mazá da carne, e un microcosmos segundo, o da súa poesía de madurez, de flor branca ou azul da total lucidez mística, cal camelia, rosa ou loto solares. 

En GaliciaLe tes á túa disposición "Rosa tántrica" de Luz Pozo Garza. 

20/4/20

Pedro Mairal abre a súa fiestra de tertulias e músicas! #EuQuedoNaCasa

https://soundcloud.com/pedro-mairal
O escritor arxentino Pedro Mairal, coñecido autor nas Tertulias Literarias de Bibloleiros e nas Recomendacións en Radioleiros, presenta e dirixe o programa radiofónico de libros e música  "Tachame el Nóbel" (na emisora arxentina Radio Ciudad AM 1110)

Está feito desde dentro dos libros e a música, desde o lugar onde se fan as historias e as cancións. Son entrevistas a escritoras-es (como Leila Guerriero e Hernán Casciari), compositoras-es e cantantes (Jorge Drexler, Julieta Venegas, por exemplo) para explorar con elas-es as distintas maneiras de axitar a creatividade. Déixate levar por ondas que veñen do outro lado do océano, por estas tertulias e estas músicas! Grazas, Pedro!

En GaliciaLe, podes ler  "La uruguaya" de Pedro Mairal.

Abrimos a fiestra a máis lecturas! ##EuQuedoNaCasa

http://eleo.mecd.gob.es/opac/?locale=es&fbclid=IwAR2AeZ_RMgdObFpXLF-oxuGqGA25KG3ehQH0iupyDYTb8kkaDxwCNolb0H8#indice
O Ministerio de Educación e Formación Profesional ten miles de títulos na súa biblioteca dixital. Eleo, a Biblioteca Digital dos Centros de Recursos do Ministerio ofrece de maneira gratuíta os seus máis de 4000 títulos e recursos didácticos do español.
Con só rexistrarte, podes acceder aos recursos. Achégate a títulos clásicos e modernos desde esta enorme biblioteca que abarca todos os xéneros, poesía, teatro xuvenil, aventuras, intriga...

Comeza a semana e a nosa fiestra musical ábrea... Mercedes Peón! #EuQuedoNaCasa

https://youtu.be/zOXBautXggMDesexamos feliz semana a todas as-os nosas-os lectoras-es. E que mellor que comezar con boas cancións! Hoxe é Mercedes Peón, quen non precisa de presentación ningunha, a que abre a nosa fiestra musical. Mercedes Peón comezou moi nova a amar a música: aos 13 anos oíu algunhas mulleres cantando na Costa da Morte. O tocar de pandeiro e o cantar o ribeirana foron as detoantes para escoller as cancións, danzas, historias e experiencias dos seus contemporáneos. Transmitido todo este coñecemento a través da docencia nas escolas municipais, na Televisión de Galicia e nas Universidades da Sorbona, Oporto, Gales, etc.

Escollemos estes "Olores perdidos", que agardamos recuperar axiña: como di esta marabillosa canción, "Voltarei aos mundos dos aires que me levan aos olores, olores perdidos, aromas perdidos, os ollares agochados no sorrisos d´a cotío..." Grazas pola túa música, Mercedes!
Recomendamos a lectura de "Galeg@s sen fronteiras" de José Colmeiro en GaliciaLe. Libro de conversas con algunhas das figuras máis relevantes da efervescencia cultural galega contemporánea. Creadoras-es de todas as artes examinan a profunda transformación cultural acontecida en Galicia nos últimos anos e a construción posible da Galicia do século XXI. Mercedes Peón participa deste fecundo diálogo con José Colmeiro.