22/12/20

Recomendacións de Nadal 2020: 240 suxestións para todas as idades

Un ano máis, presentámosche 3 guías (Infantil, Xuvenil, Moz@s e Adult@s) con recomendacións para desfrutar durante o Nadal. 240 títulos de todos os xéneros literarios para todas as idades. 

Lecturas para compartir e gozar.

Desde as Bibliotecas Municipais de Oleiros desexámosvos feliz nadal e un venturoso ano novo!!!

AVISO: horario das Bibliotecas Municipais en decembro de 2020

Horario das Bibliotecas Municipais durante o mes de decembro de 2020:

- Biblioteca Central Rialeda (Perillo): Aberta no seu horario habitual. Pecha ao público o 24, 26 e 31 de decembro.
 - Biblioteca Municipal Rosalía de Castro (Santa Cruz): Aberta no seu horario habitual. Pecha ao público o 24 e 31 de decembro.
- Biblioteca Municipal "Mª José Trincado" (Mera): Aberta no seu horario habitual. Pecha ao público o 24 e 31 de decembro.
- Biblioteca Municipal "Mª José Ruso" (Dorneda): Aberta no seu horario habitual. Pecha ao público o 23, 24 e 31 de decembro.
- Biblioteca Municipal "Manuel María" (Oleiros): Aberta no seu horario habitual. Pecha ao público o 24, 26 e 31 de decembro.
- Biblioteca Municipal "Ánxel Fole" (Nós): Aberta no seu horario habitual. Pecha ao público o 24, 28, 29, 30 e 31 de decembro.
- Biblioteca Municipal "Xograr Mendiño" (Lorbé): Aberta no seu horario habitual. Pecha ao público o 24, 28, 29, 30 e 31 de decembro.

Desculpen as molestias. Bo Nadal!

18/12/20

Recomendacións en Radioleiros: 18 decembro 2020

- Xuvenil (a partir de 10 anos):

Quen salva un can, de Érica Esmorís ; ilustracións de Iria Fafián
Xerais, 2019

Por amor á súa cadela Nona, Rai lánzase a unha aventura disparatada e arriscada. Emoción e tamén humor nesta historia de busca e achados sorprendentes.

- Moz@s e adult@s:

Cafre, de Jean-Luc Deglin
Norma Editorial, 2019

A convivencia nun apartamento entre unha profesional urbana e un gato novo. Anécdotas con ironía e afecto en banda deseñada.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas. 

11/12/20

Recomendacións en Radioleiros: 11 decembro 2020

- Infantil (menos de 6 anos):

Que podes atopar? Na cidade, ilustrado por Maxine Davenport e Cindy Roberts
Engaiolarte, 2016

Unha oportunidade para aprender novas palabras dun xeito divertido, estimulando os hábitos de observación e preparando para o mundo escolar.

- Moz@s e adult@s:

Mirarse de frente, de Vivian Gornick
Sexto Piso, 2019

A soedade, a súa evolución como feminista, a experiencia como profesora universitaria xunto coa vida na cidade pasan por estas páxinas de contido autobiográfico e social, formando un conxunto de textos de peso literario e humano.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas. 

4/12/20

Nadal con contos en Bibloleiros: comezamos o 11 de decembro

Chegou o Nadal co seu inverniño! Daquela, quentémonos con historias marabillosas.

Non te perdas os Axóuxeres de Nadal de Soledad Felloza, os Contos para noites de Nadal de Fátima Fernández, os Contos para poder durmir en Noiteboa e Un Nadal nada normal de Ramiro Neira, a Estación Inverno de Charo Pita e os Dous contos de Nadal: Vai onde non che diga, trae o que non che pida de Paula Carballeira.

Estas sesións están dirixidas a nenas-os a partir de 6 anos. Lembra que has de reservar praza na biblioteca onde se celebre a actividade. Toda a info nesta ligazón.

Tertulia literaria en Rialeda: 9 decembro 2020 (Grupo B)

17:30 h. Sesión virtual (90 minutos)

Comentario de O exército de fume, de Manuel Gago
Coa colaboración da catedrática de Lingua e Literatura Galegas Rosa García Vilariño.
Documentación

Seguinte lectura: Las hijas de Hanna, de Marianne Fredriksson

Recomendacións en Radioleiros: 4 decembro 2020

- Infantil (a partir de 6 anos):

O apalpador e a nena sen medo, de Celtia Figueiras e Sonia García, baseado nun poema de Séchu Sende
Guindastre, 2019

A nena sen medo escribiulle unha carta especial ao Apalpador pedíndolle o que lle faltaba. Texto baseado nun poema de Séchu Sende e levado ao teatro por A Xanela do Maxín.

- Moz@s e adult@s:

Blanco letal, de Robert Galbraith
Salamandra, 2019

Da man de J. K. Rowling temos a serie protagonizada por Cormoran Strike, un detective privado de Londres, sen unha perna por ferida de guerra e cunha relación especial cos seus colaboradores. Trama situada no Londres das Olimpiadas de 2012 con protagonismo político e lembranzas do pasado.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

27/11/20

Recomendacións en Radioleiros: 27 novembro 2020

- Infantil (nenas-os a partir de 6 anos):  

"El hombre que compró la ciudad de Estocolmo" de Gianni Rodari. Ilustracións de Javier Zabala. En SM.

Divertido relato de Rodari cunha parte de humor absurdo no que un barbeiro merca a cidade de Estocolmo. Libro en formato grande cun fabuloso valor estético.

- Mozas-os e adultas-os:

"Servir era o pan do demo: historia da vida cotiá en Galicia: séculos XIX e XX" de Xavier Castro. Editado por Galaxia.

Cunha linguaxe achegada ao gran público, Xavier Castro achéganos a como bebían, comían, cantaban, namoraban… os galegos e as galegas en función da súa clase social. Unha viaxe no tempo de sumo interese. 

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

25/11/20

Exposicións en Bibloleiros para conmemorar o Día Internacional contra as Violencias Machistas

A pouca presencia da muller nos ámbitos literarios pode comprobarse fácilmente a través dos galardóns. O premio literario máis coñecido é, sen dúbida, o Nobel de Literatura. Desde a súa creación en 1901 e ata este ano foron premiadas tan só 16 mulleres frente a máis de 100 homes!!!
 
O 25 de novembro conmemórase o “Día Internacional contra as Violencias Machistas” e coas mostras bibliográficas nas Bibliotecas de Oleiros queremos denunciar a invisibilización da muller na literatura e render unha máis que merecida homenaxe a esas 16 mulleres e moi especialmente a Louise Glück, poeta estadounidense gañadora do Premio Nobel de Literatura 2020.
 
Louise Glück (Nova York, 1943) gañou o Premio Nobel de Literatura deste ano. A poeta norteamericana, que recibíu o Pulitzer de Poesía por "El iris salvaje" en 1993 foi recoñecida pola súa “inequívoca voz poética” e a súa “beleza austera”. Ademáis de escribir, Glück imparte clases na Universidade de Yale.
 
A escritora Luna Miguel analizou a obra da gañadora do Premio Nobel de Literatura 2020 na súa canle de YouTube e neste artigo xornalístico. Antes ca ela, os Nobel premiaron outras 15 mulleres, a última Olga Tokarczuk en 2018. Tendo en conta á recente gañadora, as premiadas nesta categoría son só o 13,79% do total de galardonadas-dos. Anónimas, famosas, esquecidas ou lembradas, sentaron un precedente para moitas outras escritoras da súa xeración e as posteriores.
 
As escritoras que precederon a Glück foron en 1909, Selma Lagerlöf. 1926, Grazia Deledda. 1928, Sigrid Undset. 1938, Pearl S. Buck. 1945, Gabriela Mistral. 1966, Nelly Sachs. 1991, Nadine Gordimer. 1993, Toni Morrison. 1996, Wislawa Szymborska. 2004, Elfriede Jelinek. 2007, Doris Lessing. 2009, Herta Müller. 2013, Alice Munro. 2015, Svetlana Aleksievich. 2018, Olga Tokarczuk.
Podes visitar a expo 16 Mulleres Nobel de Literatura na Biblioteca Central Rialeda (Perillo) e na Biblioteca Manuel María (Oleiros).
 
A Biblioteca e Centro de Documentación da Muller Rosalía de Castro (Santa Cruz) únese aos 16 días de activismo contra a violencia de xénero organizados por Nacións Unidas baixo o lema “Pinta o mundo de laranxa”, cunha mostra bibliográfica que recolle exemplares de banda deseñada sobre violencia de xénero. As mulleres son protagonistas de todas estas historias gráficas, escritas ou debuxadas por artistas que quixeron reflectir nelas o mundo romántico das relacións de parella e a crueldade que ás veces se ve asociada a elas. En moitas destas historias plásmanse situacións ou momentos violentos e/ou desigualdade que poñen de manifesto a necesidade de cambiar actitudes nas que prime o respecto pola outra persoa. 
Que todo o desamor do mundo se convirta en cartas de amor!!!

21/11/20

As bibliotecas de Oleiros, premiadas nos María Moliner!!!

Un ano máis, o proxecto presentado polas Bibliotecas Municipais de Oleiros foi seleccionado pola Comisión de Valoración da XX Campaña María Moliner do Ministerio de Cultura y Deporte en colaboración coa FEMP, neste caso, como beneficiarias dunha subvención en metálico de 2.000 € destinada á compra de libros.

O proxecto titúlase “Viaxando coa lectura”, en alusión á esta época na que non se poden facer moitos viaxes reais, pero si coa lectura e coa imaxinación. Nel descríbense as actividades de promoción da lectura e de extensión cultural planificadas pola Biblioteca Central Rialeda para o ano 2020 e que se puideron levar a cabo.

Seleccionaron 310 proxectos promovidos por bibliotecas de municipios con menos de 50.000 habitantes nos que se recoñecen as mellores iniciativas de promoción lectora a nivel de todo o Estado.

Esta subvención destinarase á adquisición de libros para as bibliotecas municipais, en función das súas necesidades, e para completar os seus fondos bibliográficos en beneficio de todos os veciños e veciñas do municipio.

Grazas por participar nas nosas actividades, grazas por facer biblioteca!!!

 

Tertulia literaria en Rialeda: 25 novembro 2020 (Grupo B)

17:30 h. Sesión virtual (90 minutos)
https://video.oleiros.org (PC / portátil) Jitsi Meet (Android / iOS)

Comentario de Vestido de novia, de Pierre Lemaitre
Documentación

Seguinte lectura: O exército de fume, de Manuel Gago

20/11/20

Recomendacións en Radioleiros: 20 novembro 2020

 - Infantil (a partir de 6 anos):

Miña guía, meu capitán
, de Gonzalo Moure con ilustracións de María Girón
Kalandraka

Fermoso libro que presenta a relación e o amor entre un pai e a súa filla. O pai é cego e a nena ve moi pouco. O pai lévaa e vaina buscar todos os días ao colexio. Os dous van felices. Avanzan “por unha sombra de luces e sombras. E de sons.”
 
Unhas veces xogan a acertar coches-animais, outras cantan, ou imaxínanse como está o mar, ou o estado de ánimo das persoas coas que se cruzan...

O recorrido á escola convértese nunha aventura onde a cidade se transforma nunha selva con diferentes animais e fascinantes sons. A través dunhas atractivas e coloridas ilustracións vemos uns espazos habitados por uns simpáticos animais, salvaxes e domésticos, que se suben aos coches, árbores ou ao distinto mobiliario urbano, e que viven na imaxinación da protagonista.

 
Estamos ante unha obra que causa emoción e tenrura, que contribúe a que teñamos sensibilidade por un mundo máis habitable e que nos axuda a traballar por unha sociedade máis inclusiva.

- Moz@s e adult@s:

O exército de fume, de Manuel Gago
Xerais

Novela de aventuras, de espionaxe e contraespionaxe, na que se mesturan realidade, lendas e ficción, sobre a guerrilla galega na loita contra Franco e os apoios de Franco aos nazis durante a II Guerra Mundial.

Estamos a principios de 1942, en Galicia hai unha guerrilla que se enfronta ao poder de Franco, a veces resistindo no monte para sobrevivir, coa axuda de labregos e labregas das diferentes zonas dos guerrilleiros e guerrilleiras. Paralelamente, asistimos ao apoio de Franco aos nazis durante a II Guerra Mundial.

Celia, a protagonista principal, é unha moza da burguesía coruñesa. Seu pai é un cardiólogo coruñés de sona e veranean en Oleiros. Está de mestra na escola de Arbia, no concello de Laxe. Ela preferiría estar nunha escola da Coruña ou dos seus arredores, pero seu pai pediulle que fose para Arbia e ela obedeceu. Non entendía ben que facía en Arbia axudando a salvar o mundo, pero, polo agarimo que lle ten a seu pai, e como persoa paciente e obediente que é, asumiuno.

No Atlántico, nazis e aliados combaten polo dominio do océano.

Os guerrilleiros enfróntanse ao poder establecido unhas veces con pequenos asaltos e outras con outros de maior importancia, mais tamén con loitas internas entre eles. Un destes guerrilleiros vai emprender unha perigosa misión: destruír unha base de submarinos alemáns situada en Valdareas.

Ao mesmo tempo, o pintor Lugrís acepta o encargo dos nazis de pintar un mural no café Savoia en Vigo.

Ao longo da novela comprobaremos que estas distintas pólas están relacionadas entre si.

Asistimos a uns acontecementos que desde o punto de vista histórico non sucederon, pero que se basean en diversos elementos históricos.
 
Para os nazis, Galicia era un lugar estratéxico para abastecer os seus submarinos na loita por eliminar Xibraltar como enclave desde o cal dominar o Mediterráneo. Para os aliados era importante que os nazis non puideran aprovisionar ou reparar os seus submarinos para garantir o seu poderío naval.

Neste contexto da novela é cando interveñen os guerrilleiros. Hai que ter en conta que neste momento a guerrilla galega tiña unha importante presenza social, e pensábase que a vitoria aliada axudaría a rematar coa ditadura franquista.

Vemos personaxes reais como Churchill, Samuel Hoare ou Urbano Lugrís; outros de ficción pero baseados en persoas reais e facilmente recoñecibles, como o guerrilleiro Ramallo; e uns terceiros que son totalmente ficticios.


Unha interesante e entretida novela que nos traslada a unha época de fame e miseria, unindo Galicia cos acontecementos que están pasando no resto de Europa.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

16/11/20

Luis Mateo Díez, Premio Nacional das Letras Españolas 2020

O escritor leonés e membro da RAE Luis Mateo Díez foi galardoado co Premio Nacional das Letras Españolas 2020, concedido polo Ministerio de Cultura e Deporte.

“Su singularidad como escritor en diversos géneros, y especialmente como narrador, es heredera de una cultura oral en la que nace y de la que registra su progresiva desaparición. A ello se suman una técnica y un lenguaje poético de extraordinaria riqueza y una preocupación constante por la dimensión moral del ser humano" segundo o xurado.

Luis Mateo Díez recibíu en 1986 o Premio Nacional de Literatura coa obra "La fuente de la edad" (lida nas tertulias literarias de Rialeda e Santa Cruz) que tamén obtén o Premio da Crítica. 

En relato curto foi igualmente galardoado co Premio Nacional de Literatura e o Premio da Critica pola súa obra "La ruina del cielo" (2000). No ano 2012 recibe o Premio Francisco Umbral ao libro do ano, coa obra "La cabeza en llamas".

Luis Mateo Díez considera o Premio Nacional das Letras Españolas un recoñecemento otorgado polos seus lectores e lectoras.

«Soy un autor extenso porque hay mucho que contar en mi mundo; es una fuente que sigue manando. Tengo el alma vendida al diablo desde hace mucho tiempo»

Luis Mateo Díez é o creador do territorio imaxinario de Celama, onde se desenrolan tres novelas "El espíritu del páramo", "La ruina del cielo" e "El oscurecer".

As súas novelas están protagonizadas por "heroes" do fracaso, xentes vitalistas e persoas apegadas á unha vida superada polos ímpetos.

Na Biblioteca Central Rialeda poñemos a túa disposición unha selección de obras para levar en préstamo. #bibliotecasegura #culturasegura

Obras de Luis Mateo Díez nas Bibliotecas de Oleiros

fontes: eldiario.es, diariodeleon.es

13/11/20

Recomendacións en Radioleiros: 13 novembro 2020

- Intantil (a partir de 10 anos):
"Plan de rescate" de Antía Yáñez. Ilustracións de Xiana Teimoy. Editado por Xerais.
Premio Agustín Fernández Paz pola Igualdade 2019 convocado polo Instituto de Estudos Chairegos, o Concello de Vilalba e a editorial Xerais.
Un libro de aventuras sobre o asalto a un colexio por uns encapuchados con escopetas. Encerran no comedor ao alumnado e ao profesorado, excepto a uns poucos alumnos e alumnas que estaban nunha clase de apoio pero que os secuestradores non o sabían.
Estes alumnos e alumnas son:
Xeila, guapa e fachendosa, cun pelo louro sempre perfecto, á que lle custa pronunciar os erres e os eses, a pesares de ser moi faladora.
Heitor, ten varios tics e a veces dálle un mal o que lle provoca que se mova de xeito incontrolado.
Aldán, un neno que ten dificultades para expresarse e utiliza pictogramas.
A narradora, Noela, anda nunha cadeira de rodas.
Cando estaban na clase oíron un estrondo enorme, polo que a profesora Xoana foi ver o que pasara. Como tardaba tanto, Noela decidiu acender o ordenador da clase e aí saben que na radio están falando do seu colexio, ao que acudiu a policía, e xa len “Posible asalto ao CEIP O Horreo”. Ante isto, urden un plan para axudar aos seus compañeiros e compañeiras e ao profesorado.
Unha obra que nos fala de amizade, de compañeirismo e a importancia de traballar por un mundo máis inclusivo.
 
- Mozas-os e adultas-os:
"Stoner" de John Williams. Editado en Baile del Sol.
Versión orixinal en inglés.
Para diversos críticos literarios e escritores “Stoner” é unha obra mestra que estivo ignorada durante algún tempo. Cunha  excelente narración, descríbenos a vida do profesor William Stoner. Naceu a finais do século XIX nunha pequena granxa no Misuri Central. Desde pequeno tiña que axudar na granxa familiar. Aos 17 anos os seus ombreiros comezaron a encurvarse polo peso das duras tarefas que desenvolvía nunha casa solitaria, onde el era o fillo único dunha familia metodista. Cando acabou a secundaria pensaba que tería que facerse cargo dos traballos máis duros, pero, grazas a que un representante do condado foi falar co pai, ese outono puido comezar os seus estudos de agricultura na universidade. Vivía na casa dun primo de súa nai, na que tamén tiña que traballar para poder pagar o aloxamento e a manutención.
No segundo curso vai desenvolver unha paixón pola materia de literatura inglesa, baixo a mestría dun profesor temido e aborrecido pola maioría dos seus alumnos. A causa disto, no segundo semestre interrompe os seus estudos na facultade de agricultura e cambia para os de literatura. Esta decisión cambiaría a súa vida, converténdose, nun futuro, en profesor de literatura da Universidade de Misuri-Columbia, onde levaría unha vida dedicada totalmente a este traballo, pero equivocándose na súa vida familiar.
Asistiremos a intrigas académicas, a un matrimonio desgraciado, unha filla moi querida pero pola que non loitou para educala el directamente e que acaba converténdose nunha muller infeliz, un amor extramatrimonial...
Cunha fermosa e precisa prosa, e un espléndido estilo, directo e convincente, estamos ante un libro que fala da cultura do esforzo, do amor pola literatura, da rectitude no exercicio da súa profesión e de non deixarse corromper.
 
Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.


12/11/20

En Bibloleiros celebramos os 100 anos de Gianni Rodari!

Celebramos o centenario do nacemento deste marabilloso escritor italiano sendo 2020 o ano no que se cumpren ademáis os 40 anos da súa morte e 50 da obtención do Premio Hans Christian Andersen, o galardón máis prestixioso da literatura infantil. Rodari foi xornalista, escritor, militante político, mestre, pedagogo, gramático da fantasía e "matemático" creador dos binomios máis imaxinativos da literatura infantil. Agasallounos con obras inolvidables (consulta a dispoñibilidade dos títulos que temos en Bibloleiros nesta ligazón) e a máis bela e revolucionaria das verdades: a imaxinación nos libera!
Le esta interesante conversa imaxinaria con Agustín Fernández Paz e visita a bonita web adicada ao seu centenario!
Bibloleiros únese a esta celebración con exposicións bibliográficas nas nosas bibliotecas. Visítaas! #bibliotecasegura #culturasegura

6/11/20

Aviso: Suspensión de actividades nas Bibliotecas Municipais

En cumprimento da Orde do 4 de novembro de 2020 (DOG nº 223, de 4 de novembro de 2020) pola que se establecen medidas de prevención específicas como consecuencia da evolución da situación epidemiolóxica derivada do COVID-19 na Comunidade Autónoma de Galicia e en aplicación das medidas de prevención específicas nos concellos a que se refire o número catro do punto segundo de dita orde, temos que suspender, desde o día 9 de novembro, as actividades programadas nas Bibliotecas Públicas Municipais, como son as sesións da Hora do conto e as Tertulias literarias.

Recomendacións en Radioleiros: 6 novembro 2020

 - Xuvenil (a partir de 10 anos):

Xelís, o guieiro das botellas de mar, de Rosa Aneiros, con ilustracións de Andrés Meixide
Xerais, 2019

Versión dixital en Galiciale

Xelís tenta impedir unha marea de plásticos que ameaza a illa de Otlic. Para iso conta coa axuda de Ilva, o avó Jónas e a súa extraordinaria fábrica de luz. Un libro con conciencia ecolóxica que potencia a autoestima.

- Moz@s e adult@s:


Las cartas de Chawton, de Jane Austen
Alba, 2019

Versión dixital en Galiciale

Esta escolma de Kathryn Sutherland permítenos coñecer o ambiente familiar no que vivía Jane Austen xunto a ideas, inquedanzas e as negociacións cos editores encargados da súa obra. Un documento de grande valor literario, social e histórico dunha muller que abriu camiños.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

4/11/20

Centenario do nacemento de Miguel Delibes en Bibloleiros

Infancia. Morte. Natureza. Castela. Mundo rural... eis os principais leitmotiv da obra literaria de Delibes. Temas recorrentes debatidos nas tertulias literarias das nosas bibliotecas e suxeridos nas Recomendacións en Radioleiros. O 17 de outubro de 2020 celebrouse o centenario do nacemento de Miguel Delibes. Bibloleiros súmase ao conxunto de institucións que conmemoran o nacemento do escritor nado en Valladolid e nas bibliotecas municipais de Oleiros ofrecémosche exposicións bibliográficas adicadas á obra do autor valisoletano. Entre moitas entidades que podes visitar vitualmente, a Fundación Miguel Delibes, a Biblioteca Nacional, o xornal El norte de Castilla, impulsan unha serie de actividades destinadas a divulgar aspectos da súa vida e da súa obra. Tamén podes gozar en GaliciaLe das seguintes obras: "La bruja Leopoldina y otras historias reales", "Cinco horas con Mario", "Siestas con viento sur", "El hereje", "Los niños", "El camino" e "Vivir al día". Na Rede hai moitos recursos audiovisuais sobre Miguel Delibes, seleccionamos para ti: "La voz de Delibes", "Delibes, la X de Max", "Miguel Delibes a fondo", "Miguel Delibes, 100 años", "Delibes a los cien".