Recomendacións en Radioleiros: 8 maio 2020 #euquedonacasa #yoquedoencasa

- Xuvenil (14 a 16 anos):

A cova das vacas mortas, de Jaureguizar
Xerais

Xoel, un mozo de Negueira de Muñiz vive coa súa nai nunha comuna. A súa vida muda cando o seu avó chega dende Berlín enfermo e cunha maleta dun contido moi interesante. Relato que mestura o amor coa historia da II Guerra Mundial nunha trama ben traballada.

Premio Fundación Caixa Galicia de Literatura Xuvenil.

Dispoñible en GaliciaLe #euquedonacasa #yoquedoencasa

- Mozos/as e adultas/os:

Para tener casa hay que ganar la guerra, de Joan Margarit
Planeta

O poeta vivo máis laureado da literatura catalana tráenos este relato autobiográfico: a orixe familiar, casas diversas, os seus pais e avós, inquedanzas varias que conformaron unha vocación literaria que leva máis de setecentos poemas, conformando un texto que tenta explicar a razón de escribir.

Dispoñible en eBiblio Galicia #euquedonacasa #yoquedoencasa

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Abrimos a nosa fiestra ás palabras de Delibes que se cruzan coa ollada de Raso #EuQuedoNaCasa #YoMeQuedoEnCasa

O 17 de outubro de 2020 celébrase o centenario do nacemento de Miguel Delibes. A Fundación Miguel Delibes impulsa unha serie de actividades destinadas a divulgar aspectos da súa vida e da súa obra, así como a Biblioteca Nacional. Hai iniciativas que se van adiantando a este aniversario como a do fotoxornalista Fidel Raso, afincado na fermosa vila de Urueña, quen realizou a exposición fotográfica "El jinete amarillo" (organizada pola Fundación Jorge Guillén de Valladolid, e o centro e-LEA e a Librería Primera Página, de Urueña), que ilustra con 53 instantáneas párrafos da obra "Un mundo que agoniza" do escritor vallisoletano, unha reflexión adiantada ao seu tempo sobre a destrución do medio ambiente e os riscos para o presente e o futuro da Humanidade. As 53 imaxes foron tomadas por Raso en distintos lugares do mundo e ainda que lamentablemente a expo tivo que pechar fisicamente en Urueña, pode verse a través da Rede na web da Mas Context de Chicago e da Fundación Jorge Guillén. Podes gozar en GaliciaLe das seguintes obras de Delibes: "La bruja Leopoldina y otras historias reales", "Cinco horas con Mario", "Siestas con viento sur", "El hereje", "Los niños", "El camino" e "Vivir al día". Cando volvamos a vernos, poderás levar en préstamo "Un mundo que agoniza".

Fonte: libreriaprimerapagina

#EuQuedoNaCasa #YoMeQuedoEnCasa

O audiovisual galego abre a súa fiestra! #EuQuedoNaCasa #YoMeQuedoEnCasa

CREA, a Asociación de Directores e Realizadores de Galicia, ofrece 150 producións audiovisuais en libre acceso a través de Internet. Esta proposta reúne proxectos audiovisuais de socias-os da entidade que agora se poden ver na súa web. Son longametraxes de ficción, longas documentais, curtas de ficción e documentais e a sección videopoema, experimental. Non te perdas estas interesantísimas producións que podemos gozar grazas á xenerosidade das-dos súas-seus creadoras-es!

#EuQuedoNaCasa #YoMeQuedoEnCasa

Parabéns, Raúl Dans! #EuQuedoNaCasa #MesDasLetras

O dramaturgo coruñés Raúl Dans, veciño de Oleiros, gaña o Premio Laudamuco de textos teatrais convocado polo Concello de Brión, a Academia Galega de Teatro e Edicións Positivas. Este premio ten o obxectivo de conmemorar a estrea, o 16 de maio de 1978, de "Laudamuco, señor de ningures" de Roberto Vidal Bolaño, considerado o momento fundacional do teatro profesional galego e incentivar a creación de textos teatrais en galego. Raúl Dans é o gañador da segunda edición deste galardón teatral coa obra "Só un home bo". Edicións Positivas publicará a peza de Dans.
O actor de dobraxe e escritor, gañou os máis prestixiosos premios para textos teatrais, como o Rafael Dieste, o Álvaro Cunqueiro, o Barriga Verde, Born, etc.

Fonte: fervenzasliterarias

Cando volvamos a vernos, lévate en préstamo as obras de Raúl Dans que temos en Bibloleiros.

Parabéns, Raúl!

#EuQuedoNaCasa #YoMeQuedoEnCasa #MesDasLetras

Abre a súa fiestra... Alessandro Baricco! #EuQuedoNaCasa #YoMeQuedoEnCasa

O escritor italiano Alessandro Baricco lanzou a "Fiesta immobile", un programa de radio para levar mellor a corentena no seu país. Este podcast literario reproduce en cada episodio un fragmento clave da historia da literatura universal, lido e comentado por unha-un escritor-a que conversa logo co anfitrión. Media hora de lectura e música, voces de escritoras-es ás 18:30 en Radio Casa Bertallot. Esta iniciativa comezou o 11 de marzo e rematou o 3 de maio. Podes escoitar todos os podcast nesta ligazón. Se che gusta a literatura e queres practicar os teus coñecementos de italiano escoita a "Festa inmóbil" de Baricco. O primeiro en comezar foi o propio Baricco cos "Papeles póstumos del Club Pickwick" Dickens. Feliz escoita!

Fonte: laRepubblica

Alessandro Baricco é un "vello" coñecido das Tertulias Literarias de Bibloleiros. Le a Baricco en lingua orixinal na obra "Melville Tre scene da Moby Dick", o ensaio "The Game", a obra de reflexión sobre os libros "Una cierta idea de mundo", e as novelas "Seda" e "La esposa joven", todos en GaliciaLe.

#EuQuedoNaCasa #YoMeQuedoEnCasa

Obradoiros chulos para divertirse e aprender! #EuQuedoNaCasa #YoMeQuedoEnCasa

O Museo de Historia Natural da Universidade de Santiago de Compostela propón estes divertidos "Obradoiros para o confinamento": os caracois, masa para modelar biodegradable, pintura de dedos biodegradable, etc. 

Ponte mans á obra e comparte os teus traballos en redes sociais! Poderás gañar unha visita de balde ao Museo, unha libreta, unha maqueta de madeira...

Aproveita a "visita" e mira a expo “Outbreak: epidemics in a connected world” (Abrochos: Epidemias nun mundo conectado). O 12 de decembro de 2019, case simultaneamente coa descuberta do primeiro caso de COVID-19 en China, inaugurouse esta exposición que foi realizada en conmemoración do centenario da chamada gripe española e respondía a grande preocupación amosada por expertas-os e organizacións sanitarias mundiais do enorme perigo potencial dun novo brote epidémico nun mundo tan globalizado. Lamentablemente o temor resultou premonitorio. Apenas tres meses despois da súa inauguración, o 11 de marzo, a OMS declarou unha nova pandemia, orixinada polo SARS-CoV-2, coas consecuencias que xa todas-os coñecemos.

Fonte: mhn

#EuQuedoNaCasa #YoMeQuedoEnCasa

Orellas como fiestras... abertas á música en galego!!! #EuQuedoNaCasa #MesDasLetras

Dúas fabulosas iniciativas que coñecemos a través da marabillosa web Aulas Galegas (portal educativo realizado por un colectivo de profesoras e profesores sen ánimo de lucro que ante a situación de illamento provocada polo Covid-19 ofrece unha axuda educativa á sociedade): a primeira, "Canta música en galego coñeces?" da profesora Rosa Alonso, quere darnos a coñecer grupos que fan música en galego. Descubre os que che gustan clicando en cada unha das "teselas" deste mosaico musical e goza escoitándoos!!!

A segunda suxestión é a "Pequena guía de música en galego" de Elia Lago e Paula Lago. A música en galego ten séculos de historia. Desde as cantigas medievais, as coplas populares que se cantan na casa, ata algún himno rock na nosa lingua, hai moita música. Moitas artistas procuran reinventar esta tradición, outras crean pezas e motivos novos. Esta guía  procura que poidas coñecer grupos e artistas que fan música en galego. Emprega as frechas que están situadas ao longo da guía para desprazarte polos distintos apartados.
Para escoitar as cancións, preme nos símbolos, que te levarán a unha ligazón de YouTube. Moitas das artistas teñen perfís onde penduran a súa música, anímate a apoiar e compartir música en galego!
Fonte: aulasgalegas

En GaliciaLe podes gozar do docu "Torre de Breoghán" da banda de folk Luar na Lubre.

#EuQuedoNaCasa #YoMeQuedoEnCasa #MesDasLetras

Oleiros fermoso ábrenos a súa fiestra! #EuQuedoNaCasa #YoMeQuedoEnCasa

Coñecer a natureza é o primeiro paso para amala e protexela. Imos coñecer o noso entorno ambiental da man do CEIDA: tres espazos senlleiros de Oleiros dignos de seren percorridos e amados. Non te perdas estes paseos virtuais porque vas descubrir unha morea de datos interesantes sobre o marabilloso patrimonio que temos ben preto: "Durante os 20 anos de actividade da institución, o CEIDA leva traballando en moitos espazos, pero hai tres que son a nosa casa, por onde pasaron centos de grupos educativos, familias e outros colectivos, e sentiron xunto a nós a necesidade de conservalos: o Castelo de Santa Cruz, a Costa de Dexo e os Faros de Mera". A través deste programa de visitas guiadas virtuais "revivimos" estes tres significativos lugares de interese ambiental, histórico e artístico do noso concello. Aquí vai a programación:

O xoves 30 de abril tivo lugar "O Castelo de Santa Cruz: Unha viaxe de 400 anos de historia". 

O venres 8 de maio. "A Costa de Dexo: sobrevivindo entre a terra e o mar". Declarado Monumento Natural e Rede Natura 2000, ocupa o tramo costeiro comprendido entre os faros de Mera e o porto de Lorbé, tamén na costa oleirense, e os seus cantís son o refuxio de moitos sobreviventes de mar e aire e o venres 15 de maio: "Os Faros de Mera: de casa do fareiro a Aula do Mar". Transformada no Centro de Recepción de Visitantes do Monumento Natural Costa de Dexo, a Aula do Mar está chea de historia e convértese na porta natural deste espazo protexido.

As visitas serán retransmitidas en directo, ás 19:00, a través da canle de Youtube do CEIDA. 

Fonte: CEIDA

Cando volvamos a vernos, convidámosche a visitar o Fondo Local de Oleiros de cada unha das Bibliotecas Municipais, que son centros de interese onde poder consultar e levar en préstamo documentos relacionados con Oleiros desde distintos puntos de vista: historia, arte, roteiros culturais e literarios, medio ambiente, natureza, datos económicos, socio-demográficos, publicacións municipais, etc. 

#EuQuedoNaCasa #YoMeQuedoEnCasa

Vemos pola fiestra a... Jacqueline e Albertine! #EuQuedoNaCasa #yomequedoencasa

A escritora estadounidense Jacqueline Woodson e a ilustradora suíza Albertine foron as gañadoras do Premio Hans Christian Andersen 2020. O Premio Hans Christian Andersen outórgao cada dous anos o International Board on Books for Young People (IBBY). 

Este galardón está considerado como o pequeno Premio Nobel da narrativa infantil. É o máis alto recoñecemento internacional outorgado a autoras-es e ilustradoras-es de libros infantís e xuvenís e os criterios utilizados para avaliar as nominacións teñen en conta a calidade estética e literaria, o frescor e innovación do traballo das-dos nominadas-os, a capacidade de ver o punto de vista da-do nena-o e estimular a súa curiosidade. O premio básase en toda unha traxectoria, non só nunha obra. 

Parabéns, Jacqueline e Albertine!

Cando volvamos a vernos, leva en préstamo algún dos libros ilustrados por Albertine que temos en Bibloleiros. Non te podes perder os preciosos álbumes "Los pájaros" e "Los rascacielos".

#EuQuedoNaCasa #YoMeQuedoEnCasa

Pola fiestra vemos... un malévolo virus que imos vencer! #EuQuedoNaCasa #yomequedoencasa

Existen numerosos contos infantís para explicar ás-aos peques que é o coronavirus e por que temos que esmerarnos coa hixiene, etc.
Esta escolla de Julián Marquina ofrece 13 libros de historias entretidas e divertidas, con explicacións sinxelas e educativas. Uns poden ser lidos polas-os cativas-os sen necesidade de acompañamento. Para a lectura doutros títulos, é mellor que esta se realice en compañía dunha-dun maior.

Uns amosan a maneira en que as-os adultas-os entenden e axudan a xestionar os sentimentos e emocións das-dos pequenas-os, outros, de que maneira nenas e nenos poden resolver moitas das súas dúbidas con explicacións básicas.

Ofrecen retos a conseguir e técnicas para crear rutinas, como o lavado de mans... Son moi recomendables para familias, persoal docente, bibliotecario …
Fonte: Julián Marquina

Grazas a todas-os as-os creadoras-es que ofreceron o seu talento de xeito altruista para axudar a parar o contaxio da enfermidade e da desinformación!

#EuQuedoNaCasa #YoMeQuedoEnCasa

Abrimos a fiestra e vemos a... Galdós! #EuQuedoNaCasa #yomequedoencasa

Este é o ano Benito Pérez Galdós. Un dos escritores realistas máis representativos do século XIX europeo. Celébrase o centenario do pasamento do escritor canario. Canarias é a terra de Galdós; é por iso que nas illas programáronse representacións escénicas, concertos, exposicións, libros, charlas, obradoiros... para coñecer a biografía e a obra do escritor nado nas Palmas de Gran Canaria. A Biblioteca Nacional de España organizou a exposición "La verdad humana", que se puido contemplar en Madrid ata febreiro deste ano. Neste momento en que temos que ficar na casa podemos ler a Galdós en formato dixital e de balde.

A Consejería de Cultura do Cabildo grancanario, propúxose en 2005 a tarefa de publicar a obra completa do escritor canario baixo o título "Arte, Naturaleza y Verdad". Máis dun oitenta por cento das obras están aloxadas na web da Casa-Museo Pérez Galdós. Esta colección reúne por vez primeira en España a obra completa e revisada de Pérez Galdós. Despois de oito anos de traballo a colección quedou conformada por 29 tomos. ‘Arte, Naturaleza y Verdad’ quere dar a coñecer a inmensa aventura literaria de Galdós acompañada da mirada de grandes escritores e estudosas-os galdosianas-os que foron prologando cada un dos títulos. 

Adéntrate en cincuenta anos de escritura, mergúllate na realidade do tempo galdosián, no seu universo de ficción ben armado e congruente de vontade de constancia socio-histórica! 

#EuQuedoNaCasa #YoMeQuedoEnCasa

Abre a fiestra que... Aí vén o maio de frores cuberto!!! #MesDasLetras #EuQuedoNaCasa

Chegou maio a toda Galicia e nalgúns lugares, os maios, celébranse (neste momento de xeito virtual) con moita forza. Este ano toca facelo de xeito diferente. Eis algunha das convocatorias como "Cantádeme un maio", iniciativa que puxeron en marcha diferentes colectivos que participan desta festa en Ourense. O proxecto propón elaborar maios co material que haxa na casa e coplas para os acompañar. O web da proposta publicará o material recibido, ademais de achegar axudas á composición de coplas e falar sobre a festividade. A Youtubeira "Nubes baixo ti" elaborou na súa canle un titorial sobre a elaboración destas composicións tradicionais. O Consello da Cultura Galega estreou o primeiro de maio no seu web e redes sociais esta fermosa versión do poema "O maio" de Manuel Curros Enríquez, intepretado por nov@s músic@s galeg@s.
Fonte: culturagalega
Anímate a facer un maio caseiro e compartilo connosco! Envíanos foto a biblioteca.rialeda@oleiros.org ou a través do noso Contacta

#EuQuedoNaCasa #YoMeQuedoEnCasa #MesDasLetras

Abrimos o luns a fiestra a... "Luns" de Eli Ríos! #MesdasLetras

Comezamos o mes de maio cun certo alivio nas condicións de vida destes últimos 50 días. Seguiremos administrando con responsabilidade a recuperación de hábitos como... camiñar ao aire libre!
Comezamos maio con sol e calor e as Letras Galegas petando na porta. Ricardo Carvalho Calero será celebrado nas nosas entradas e con el a lingua e literatura galegas. 

Comezamos este primeiro luns de maio coa suxestión de lectura de, precisamente, "Luns" de Eli Ríos. Este libro foi recomendado en Radioleiros. Escoita aquel consello de lectura e estoutro que ven a través do podcast de "Nalingua, lecturas dun neofalante", proxecto desenvolvido polo Laboratorio de Radio para Vinte co apoio da Secretaría Xeral de Política Lingüística. Como di a cabeceira do podcast "Aquí non temos presa falamos a modiño, dámoslle conversa aos vellos e aos meniños, mediante un debate ben feitiño e relaxante, impresións interesantes dun neofalante...". Outras suxestións de lectura de Nalingua foron, "O misterio dos fillos de Lúa", "A Esmorga" e "Anagnórise". Lucía Abarrategui e Sergio Pascual forman Laboratorio de Radio, un proxecto profesional de xornalismo e educación que buscar usar a radio como ferramenta social.

En GaliciaLe podes ler "Luns" de Eli Ríos. 

#EuQuedoNaCasa #YoMeQuedoEnCasa #MesDasLetras