- Xuvenil:
"Escarlatina, a cociñeira defunta" texto de Ledicia Costas e ilustracións de Víctor Rivas, en Xerais.
Premio Merlín de Literatura Infantil 2014, Premio Fervenzas Literarias ao Mellor Libro Infantil 2014, Premio Fervenzas Literarias á Mellor Portada de LIX 2014, Premio Neira Vilas ao mellor libro Infantil e Xuvenil do ano 2014, Premio Nacional de Literatura Infantil y Juvenil, 2015.
Unha divertida obra que nos presenta a Román Casas, un neno de 10 anos, que quería ser
chef. Cando cumpriu 10 anos pediulles a seus pais de agasallo un curso de cociña. Como o seu aniversario é o 2 de novembro, sempre coincide co Día de Defuntos, e todos os anos ten que acompañalos na visita ao cemiterio, algo que non lle apetece nada. Pero este ano non tivo que ir debido a que un mensaxeiro ía traer o seu regalo de aniversario e era necesario que alguén quedase na casa para recollelo. Cando o abriu levou un gran susto, porque era un agasallo especial, un cadaleito acompañado dun sobre negro onde viñan as instrucións para activar a Escarlatina, unha cociñeira falecida no século XIX que nunca se separa de Lady Horreur, unha horrorosa, grande e peluda araña. A bordo do mortobús, viaxarán ao Inframundo, onde os defuntos viven baixo as ordes de Amanito, o tirano que goberna no Alén coa axuda dos seus terroríficos esbirros...
Non só se van divertir lendo esta estupenda obra, senón que tamén poderán realizar e saborear riquísimas receitas, mesturadas dun humor macabro que esperta o gusto pola lectura e pola cociña e poderán coñecer o Aquén, ou mundo dos vivos e o Alén, ou o mundo dos defuntos.
Un delicioso libro que presenta valores como a tolerancia ou a amizade e que desmitifica a morte ao presentarnos o avó de Román, xa falecido, como un auténtico piloto de carreiras, feliz de vivir no Inframundo.
Este entretido texto está acompañado dunhas ilustracións totalmente acaídas, con tétricas imaxes.
O xurado do Premio Nacional de Literatura Infantil y Juvenil di que é “unha obra extraordinaria, humorística e rompedora no contexto da literatura infantil e xuvenil actual que destaca tamén pola súa fácil lectura, polo seu humor arrepiante, e pola habilidade para desmitificar o mundo da morte”.
Orixinal e divertido libro que recomendamos para adolescentes a partir de 11 anos, que nos fala da necesidade de “perseguir os soños e pelexar por aquilo no que un cre e non renderse xamais fronte as adversidades”.
- Mozos-as e adultos-as:
"La felicidad conyugal" de Lev Tolstói, traducido do ruso por Selma Ancira, editado por Acantilado.
Unha novela escrita entre 1858 e 1859 que trata sobre o amor e o matrimonio. Céntrase no que o autor denomina amor verdadeiro, que é aquel que non está baseado unicamente na paixón.
Transcorre na Rusia do século XIX e narra a historia de Masha e Serguéi. Masha é unha
moza de 17 anos que se namora do seu titor. Ela é máis nova ca el, pero entre ambos xorde o amor e casan. Ao principio, mentres que residen no campo, transcorren tempos felices, pero os problemas comezarán cando marchan a vivir a San Petersburgo. O éxito de Masha na vida da alta sociedade provoca os celos do seu home e a alteración da felicidade conxugal. A relación deteriórase, aínda que grazas á honestidade dos dous, o matrimonio resistirá.
Podemos contemplar o namoramento destas dúas persoas, a ledicia e a ilusión dos primeiros momentos, pero tamén, as primeiras decepcións que darán paso ao verdadeiro amor.
Tolstói escribiu esta obra tres anos antes da súa voda coa súa futura esposa Sofía, e igual que na novela, el, un home maduro, casa cun moza nova.
Neste libro podemos admirar os magníficos retratos psicolóxicos dos personaxes e a preocupación do autor polas clases populares. Masha será a protagonista principal e a que irá narrando os acontecementos: a paixón dos primeiros momentos e a posterior relación de dúas persoas diferentes, un home maior decepcionado e unha moza nova que descubre a vida mundana e superficial de San Petersburgo (que tanto detestaba o escritor) e a súa evolución posterior.
Estamos ante un libro de só 173 páxinas, pero co que poderemos gozar da destreza narrativa deste escritor universal.
da Rede de Bibliotecas de Galicia
