Recomendacións en Radioleiros: 21 de outubro 2016

- Infantil - xuvenil (nenas-os de 8 a 10 anos):
"Cama e conto", texto de Gonzalo Moure. Ilustracións de Lucía Serrano, traducido por Fran Alonso. En Xerais.
"Cama e conto" narra a historia de Malva, unha nena moi esperta e chea de imaxinación que devece porque chegue o momento do día en que a súa nai lle lea un conto antes de durmir. Con cada historia, Malva, é quen de imaxinar mundos de maxia e fantasía onde todo é posible. O momento en que a súa nai lle di: “Malva, cama e conto” supoñía para ela o mellor instante do día. Pero Malva faise maior. Cando cumpríu os seis anos as cousas cambiaron e xa non houbo “cama e conto". Desde entón, a nai de Malva cre que ela xa pode ler os contos soa, o que a rapaza lle pareceu unha traizón. Mais Malva tivo unha gran idea para mudar a súa vida. Unha idea estupenda, que fará pensar a calquera nai ou pai con fillas-os nesas idades en que queremos que collan autonomía e fagan cousas por elas-es soas-sós.

- Mozas-os e adultas-os:
"Alguien" de Alice McDermott, editado por Libros del Asteroide.
MacDermott narra a vida de Marie Commeford, unha nena de nai e pai irlandeses que observa atenta todo canto acontece tras os cristais dos seus lentes.
A narración vai seguindo as lembranzas aparentemente dispersas e desordenadas de Marie: a súa peculiar infancia, o seu despertar sexual, a súa primeira ruptura amorosa que a levará ao seu primeiro traballo, a relación co seu irmán solteiro, a maternidade, os cambios que acontecen no barrio, naquel Brooklyn, uns anos antes da Gran Depresión.

Escenas que van encaixando cunha naturalidade pasmosa, ata compoñer unha poderosa historia: a historia dunha vida real e intensa, como tantas outras.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

In Itinere: no camiño, on the road, sur la route, unterwegs

50 suxerencias na Biblioteca Central Rialeda

Inicio 1º trimestre no grupo A da Tertulia Literaria de Rialeda

Biblioteca Central Rialeda. Perillo
Hora: 17,30 a 19,30 h.

Comenzamos o 1º trimestre coa seguinte programación:

- "Tantos días felices" de Laurie Colwin
- "Adiós, Hemingway" de Leonardo Padura
- "O coitelo en novembro" de Marilar Aleixandre
- "Canadá" de Richard Ford

Datas:
- Outubro: día 26
- Novembro: días 9 e 23
- Decembro: día 21

Nestes intres o grupo está completo. As novas solicitudes pasarán a formar parte da lista de espera.

Inicio 1º trimestre no grupo B da Tertulia Literaria de Rialeda

Biblioteca Central Rialeda. Perillo
Hora: 17,30 a 19,30 h.

Comenzamos o 1º trimestre coa seguinte programación:

- "Alguien" de Alice McDermott
- "Izan o da saca" de Xabier Quiroga
- "Tantos días felices" de Laurie Colwin
- "Las reputaciones" de Juan Gabriel Vásquez
- "Soy Pilgrim" de Terry Hayes

Datas:
- Outubro: día 19
- Novembro: días 2, 16 e 30
- Decembro: día 14

Nestes intres o grupo está completo. As novas solicitudes pasarán a formar parte da lista de espera.

Inicio 1º trimestre na Tertulia Literaria de Santa Cruz

Biblioteca e Centro de Documentación da Muller "Rosalía de Castro"
Hora: 18 a 19,30 h.

Comenzamos o 1º trimestre coa seguinte programación:

- "Un paraíso inalcanzable" de John Mortimer
- "El lector" de Bernhard Schlink
- "Charlotte" de David Foenkinos
- "Non hai noite tan longa" de Agustín Fernández Paz

Datas:
- Outubro: día 17
- Novembro: días 7 e 21
- Decembro: día 12

Nestes intres o grupo está completo. As novas solicitudes pasarán a formar parte da lista de espera.

Recomendacións en Radioleiros: 14 de outubro 2016

- Xuvenil (a partir dos 10 anos):

Historias de emigrantes, de Xosé Neira Vilas
Ediciós do Castro

Cun texto magnífico de Luis Seoane que serve de introdución, Xosé Neira Vilas desenvolve un feixe de relatos sobre a emigración galega en Bos Aires. Homes e mulleres que loitan todos os días para saír adiante, vitorias e derrotas no económico que son tamén historias afectivas. Soños, desexos e anceios nestas páxinas que forman un estudo sociolóxico de grande valor literario.

- Mozos/as e adultos/as:

David Golder, de Irène Némirovsky
Salamandra

A autora da "Suite francesa" deuse a coñecer literariamente con esta obra que ten matices autobiográficos. O mundo de David Golder é dos grandes negocios onde a voracidade dos protagonistas é tan grande como a precariedade das fortunas. A creba económica fai que se vexa só, nun piso en París cunha relación conflitiva familiarmente. O desexo de lucrarse novamente é o comezo doutra aventura co obxectivo de recuperar á súa filla.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Recomendacións en Radioleiros: 7 de outubro 2016

- Xuvenil (de 10 a 12 anos):

Prohibido leer a Lewis Carroll, de Diego Arboleda
Anaya

A protagonista, Eugène Chignon, é unha rapaza torpe pero moi simpática e lista que desexa ser institutriz. Lánzase á aventura tras ver un anuncio no xornal no que se buscan mozas que saiban mentir, e ademáis que o fagan ben. O obxectivo non é outro que cuidar dunha rapaza chamada Alice e tratar de quitarlle da cabeza a famosa obra de Lewis Carroll “Alicia no país das marabillas”. É un tema prohibido na casa, se se le a obra, compréndese o motivo. Así que Eugène cambia a súa querida Francia por Nova York. A primeira responsabilidade da institutriz é evitar que Alice se entere de que a verdadeira Alice Liddell, de 83 anos, á que inspirou a Lewis Carroll para o personaxe de Alicia, se encontra na cidade por invitación da Universidade de Columbia.
A historia irá avanzando a través dunha serie de situacións divertidas, curiosas e sen sentido.

Obra galardoada co Premio Nacional de Literatura Infantil e Xuvenil 2014.

- Mozos/as e adultos:

Os elefantes de Sokúrov, de Antón Riveiro Coello
Galaxia

Unha historia coral ambientada en Santiago no Nadal do ano 2012. Janis, a súa protagonista, ten trinta anos, un expediente académico exemplar e está a preparar oposicións para o ensino. Mentres, fai crítica de cine e coida anciás nunha casa de Santiago.
Almorza todas as mañáns nunha cafetería da zona vella onde un descoñecido escribe e le deseguido. Janis adoita observalo e queda engaiolada coa súa presenza ata que un día el desaparece. A partir dese momento, a protagonista inicia unha pescuda que a levará a revivir momentos da súa infancia, o pasado dos seus país, a descuberta dun segredo que vai marcar a vida de Janis.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Recomendacións en Radioleiros: 30 de setembro 2016

- Infantil (a partir de 6 anos):

Amizades secretas, de Agustín Fernández Paz
Rodeira

Beatriz, a protagonista infantil femenina, será a encargada de poñer o punto de imaxinación nas tarefas cotiás da familia cando chegan a súa nova casa, sobre todo cando coñece á ratiña Ollos Grandes, o único membro feminino da última camada da familia ratonil que disfrutaban da casa moito antes de que eles chegaran. As dúas protagonistas fanse amigas e deste xeito a nai de Beatriz descobre a gran afeción ao queixo de tetilla galego da súa filla, o que non sabe é que toda a familia de Ollos Grandes alimentase grazas a Beatriz, deste xeito a vida dos ratos non periga nas trampas que o pai de Beatriz pon pola casa, nunha declaración de guerra ao que el considera bichería perigosa.

- Mozos/as e adultos/as:

La casa de las miniaturas, de Jessie Burton
Salamandra

Ambientada na cidade de Amsterdam no século XVII, Nella Oortam é unha moza de pouco máis de dezaoito anos que chega á porta da casa dunha das familias máis acomodadas da cidade para comezar a vida en común co seu flamante esposo, nun matrimonio de conveniencia polas dúas partes. Na mesma casa viven unha irmá solteira de Johannes e dous fieis criados. A xoven esposa recibe como regalo de vodas do seu home unha réplica do seu fogar, unha casa de miniaturas, a súa decoración vaille descubrindo os misteriosos segredos que ocultan os habitantes da casa.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Boletín de novidades: 30 setembro 2016

27 e 29 de setembro: Visita de alumnado do IES María Casares á Biblioteca Central Rialeda

Esta semana recibiremos na Biblioteca Central Rialeda ao alumnado de 2º de ESO do IES María Casares de Bastiagueiro.

Martes 27 - 2ºA e B ESO (9,30 e 11,30 h.)
Xoves 29 - 2ºC e D ESO (8,40 e 10,40 h.)

Ao remate das mesmas, o actor Ramiro Neira de Artestudio Teatro realizará unha dramatización baseada nos relatos da obra "Os outros feirantes" de Álvaro Cunqueiro.

Aviso importante: o 2º andar da biblioteca (Sala de audiovisuais e ordenadores) verá restrinxido o seu uso durante a visita do alumnado.

Tertulias Literarias en Rialeda e Santa Cruz: inscrición a partir do martes 27 de setembro

BIBLIOTECA CENTRAL RIALEDA

O prazo de inscrición para as Tertulias literarias na Biblioteca Central Rialeda ábrese o martes 27 de setembro ás 8,15 h.*

A inscrición poderá facerse dos seguintes xeitos:
- A través da páxina web do Concello de Oleiros.
- Persoalmente na Biblioteca Central Rialeda.
- Por teléfono (981 639 511) no horario da biblioteca (luns a venres de 8,15 a 21,15 h.).

40 prazas por orde de inscrición. As 20 primeiras solicitudes constituirán o grupo A e as 20 restantes o grupo B.

As persoas que queden sen praza entrarán a formar parte dunha lista de espera, sendo avisadas cando haxa unha vacante.


BIBLIOTECA E CENTRO DE DOCUMENTACIÓN DA MULLER "ROSALÍA DE CASTRO". SANTA CRUZ

A inscrición para as Tertulias literarias na Biblioteca de Santa Cruz ábrese o martes 27 de setembro ás 10 h.*

A inscrición poderá facerse dos seguintes xeitos:
- Persoalmente na Biblioteca de Santa Cruz.
- Por teléfono (981 626 338) no horario da biblioteca (martes a xoves de 10 a 13,30 h.; luns a venres de 16 a 20 h.; primeiro e terceiro sábado de mes de 10 a 14 h.).

20 prazas por orde de inscrición. As persoas que queden sen praza entrarán a formar parte dunha lista de espera, sendo avisadas cando haxa unha vacante.


*Non se admitirán solicitudes previas á data sinalada.

IMPORTANTE: A inscrición en liña está dispoñible únicamente para as tertulias da Biblioteca Rialeda.

Poden inscribirse todos/as os/as maiores de 16 anos que desexen participar.

Comentaranse obras de distintos xéneros literarios, principalmente narrativa contemporánea, pero tamén se le poesía, teatro e ensaio, nun ambiente de familiaridade, procurando o lado formativo e á vez, lúdico da lectura.

O principal obxectivo é animar a ler lendo, gozar da literatura como un desenvolvemento da capacidade de creación e comunicación a través da lectura, de maneira que compartindo ideas, reflexionando sobre temas diversos poidamos enriquecernos cos diferentes puntos de vista.

As programacións inclúen obras de autoras e autores da literatura galega, española e internacional.

Datas de inicio da actividade:
- Grupo A de Rialeda: mércores 26 de outubro, das 17,30 ás 19,30 h.
- Grupo B de Rialeda: mércores 19 de outubro, das 17,30 ás 19,30 h.
- Tertulia de Santa Cruz: luns 17 de outubro, das 18 ás 19,30 h

As sesións teñen un carácter quincenal. A actividade remata no mes de xuño de 2017 

 

Recomendacións en Radioleiros: 23 de setembro 2016

- Infantil (a partir de 12 anos):

Os seres con Raíces na Cara, de An Alfaya ; ilustracións de Xosé Cobas
Galaxia

Adentrarse neste libro é facelo noutra forma de entender o mundo. Un mundo poboado de seres diferentes. Os seres con Raíces na Cara. Como? Non sabes quen son? Velaquí a porta de entrada ao lugar no que eles habitan. Un libro distinto, de fantasía nos que os trasnos Papabicos son os protagonistas.

- Mozos/as e adultas/os:

Eifel Blues, de Jacques Berndorf
Funambulista

Unha nova aportación para os lectores en castelán do xénero negro na figura do xornalista Baumeister. Xubilado nun pobo alemán próximo a Bélxica e Luxemburgo, fumador en pipa, amante dos gatos e do jazz, protagoniza unha investigación con varios mortos, a presenza do exército e a xa desaparecida RDA. Unha trama que lembra a tensión da Guerra Fría dun xeito aséptico e á vez cun alto grao de implicación.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Ler conta moito e actividades infantís de setembro a decembro 2016: avanzamos a programación!!!

A partir de 21 de setembro nas Bibliotecas Municipais de Oleiros realizaranse 45 actividades de promoción da lectura dirixidas a nenas e nenos desde 1 a 12 anos. Levaranse a cabo nas sete bibliotecas municipais e serán actividades moi diversas. Desde os tradicionais contacontos até obradoiros de encadernación de libros, ilustración, cantacontos, creación de fósiles de dinosauros, etc.

Participarán Soledad Felloza, Maumarela, Juste Kamishibai papel e teatro, Os Quinquilláns, Crearte Servizos Culturais, Pablo Díaz, OQO, Luís Vallecillo, Xulio Varela, Elefante Elegante, Teatro de Marionetas Trécola, A Illa d@s Nen@s, Chío Couto, Efervesciencia, Vicente Mohedano, Mirari Urruzola, Sonia Ojea, Charo Pita e a Compañía Trinke-Trinke cos “Ratos da biblioteca”. Estas actividades de animación á lectura realizaranse de forma lúdica, activa e participativa, fomentando a imaxinación e a creatividade.
Algúns destes actos están incluídos no programada Rede de Bibliotecas de Galicia

Recomendacións en Radioleiros: 16 de setembro 2016

- Infantil (nenas e nenos  maiores de 12 anos):
"Solos", debuxos de Bruno Gazzotti, guión de Fabien Vehlmann. Editado por Dibbuks.
Da noite para a mañá, un pequeno grupo de nenos espértase nunha cidade na que o resto de habitantes desapareceron misteriosamente sen deixar rastro. A partir de aí, e como ben indica o título, terán que defenderse sós (aínda que a medida que avanza a historia descubriremos que non o están tanto coma semellaba). Cinco rapaces que non se coñecían de nada nas rúas da cidade: o duro Dodji, a perspicaz Leila, a “empollona” Celia, o imaxinativo Iván e o impertinente Terry. Ningún sabe que ocorreu mentres durmían, nin como enfrontarse a un mundo hostil no que os seus pais e o resto de adultos xa non están para dicirlles o que está ben ou mal.
 

- Mozas-os e adultas-os:
"Aqueles días en que eramos malas" de Inma López Silva. En Galaxia.
Nun módulo do Centro Penitenciario de A Lama conviven un grupo de mulleres bastante desigual: unha prostituta enganchada á droga, unha rapaza colombiana atrapada cando entraba no país cun pequeno alixo de droga, unha monxa, unha funcionaria de prisións e unha escritora que decide relatar o que alí acontece. Segundo avanzan as historias da cada unha, chegas á convicción que o concepto de maldade non é intrínseco ás persoas senón que ás veces son as situacións e a falla de recursos o que as leva a actuar deste xeito o cal conleva unhas consecuencias funestas.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Recomendacións en Radioleiros: 9 de setembro 2016

- Xuvenil:
"Mentira" de Care Santos, en Edebé.
Premio Edebé de Literatura Juvenil 2015
 

Unha novela xuvenil dividida en tres partes: a primeira e a terceira están narradas en primeira persoa por Xenia e a segunda por Marcelo e está escrita en forma de carta.
 

Xenia é unha moza, unha boa estudante de 2º de bacharelato, curso no que estaba especialmente interesada en sacar boas notas para poder entrar na carreira de Medicina na Universidade. Pero, ultimamente o seu rendemento baixou. Coñeceu, a través de Internet, un mozo do que namorou. Entrou en contacto con el dunha maneira bastante casual. A profesora de filosofía recomendoulles, para subir nota, a lectura da obra El guardián entre el centeno de Salinger e cando colleu o libro na biblioteca no seu interior traía un punto que dicía “comparte a túa lectura con outros mozos coma ti no fórum da nosa páxina web”. Entrou no fórum e noutras páxinas de Internet para ver que dicían desa obra e aí atopou un comentario curioso ao que decidiu contestar. Así  se puxo en contacto cun mozo que se presenta como Marcelo López de 17 anos. Empezan a intercambiar correos e ela proponlle quedar para coñecerse. Como el se nega, Xenia comeza a facer indagacións ...
 

A autora di que á hora de escribir esta narración pensou en que “debíamos formularnos algunhas preguntas incómodas e reflexionar sobre algún asuntos que nunca son tan simples como nos empeñamos en pensar” e aclara que o personaxe de Marcelo López está baseado nunha persoa real e que para ela é o verdadeiro protagonista da obra.
Unha obra interesante que fala da delincuencia xuvenil e da súa reinserción na sociedade, pero tamén da amizade, do amor, da familia e da solidariedade. Móstranos como o amor pode transformarnos, tanto para ben como para mal.
 

- Mozas-os e adultas-os:
"O anxo negro" de Manuel Gago, editado por Xerais.
O anxo negro é unha novela negra e de misterio, pero tamén histórica. O autor mestura realidade e ficción, polo que ao lado de feitos e de personaxes históricos atoparemos ficción.

Na parroquia montañesa de Cereiro, na costa da Morte, a principios de decembro do ano 1981, roubaron a figura dunha santa Mariña da que a poboación era moi devota. Esta santa estaba situada nunha zona non moi visible do mosteiro de Cereiro. Era unha imaxe pequena, á que lle faltaba unha man dereita e case todo o brazo esquerdo, pero iso non impedía que case sempre estivese rodeada de candeas prendidas polos fregueses.
Reunidos todos os veciños deciden falar con Nicolás Bren, capitán retirado da Mariña Mercante para que sexa el o encargado de buscala, axudado por Andreu Meis un mozo que ten un bar na zona e algo implicado no contrabando de tabaco.
Segundo van investigando descobren que noutras igrexas tamén desapareceron imaxes relixiosas pero que ninguén deu parte á garda civil e poderán ver que existe todo unha trama para o roubo sistemático de patrimonio relixioso galego. Descubrirán que esta imaxe está relacionada con importantes momentos da historia europea da época do Renacemento.

Con esta obra poderemos viaxar no tempo pasando polo século XVI con María Estuardo, a desamortización no XIX, a Guerra Civil española e os anos 80 do século XX, pero tamén viaxar por distintos lugares: desde Galicia a Roma, París, Sheffield, Namur ou Escocia.

Estamos ante unha boa e moi interesante narración, que engancha ao pouco de comezar a lela, cun ritmo áxil e unha historia que parte das raíces da cultura popular galega mesturada con doses de novela negra, e coa que, ademais de divertirnos, aprenderemos sobre a cultura galega e a historia de Europa. 

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.