- Infantil (menores de 10 anos):"Cantareas do faro" é un libro-disco que contén doce poemas escritos por Miguel Anxo Romero, acompañados por unhas simpáticas e coloridas ilustracións de Leandro Lamas e musicados pola pianista Bárbara Mourelo.
Son poemas infantís que tratan temáticas moi diferentes:
O primeiro fala dun neno ou nena que axuda a súa nai recollendo os ovos das galiñas cos que van facer unha tortilla.
O segundo de como xoga na area da praia cun papaventos verde limón.
O terceiro de que escoita a máquina de coser de súa nai que cose e cose sen parar.
O cuarto está dedicado a súa sombra, que a segue a todas partes.
O quinto presenta un galo que en vez de quiriquirear miañou.
O décimo que nos explica o son que emite o faro de Fisterra cando hai néboa.
Ou o último dedicado a falar baixo na escola.
No CD hai seis poemas cantados por Ana Rey e nos outros hai cancións interpretadas por Lorena Montero, por Leandro Lamas, ou polo propio autor dos textos, pero sempre acompañados ao piano por Bárbara Mourelo e nos que colaboran diversas nenas e nenos.
Lendo os poemas, escoitando as cancións, cantando e bailando poderán pasar uns momentos moi divertidos.
Neste ano en que o Día das Letras Galegas estivo dedicado ás cantareiras, esta tamén é unha forma moi agradable de celebralo.
- Mocidade e público adulto: É un libro de poemas ao que lle concederon o Premio Nacional de Poesía 2023, que entrega o Ministerio de Cultura, e Premio da Crítica en lingua galega no 2022.
Yolanda Castaño, Premio da Cultura de Galicia, é poeta, filóloga e unha activa xestora cultural, coa súa propia residencia para escritoras e escritores na Coruña. Hai moitos anos que colabora coas bibliotecas municipais de Oleiros realizando recitais de poesía, contacontos, obradoiros e diversos espectáculos poéticos dirixidos ao alumnado dos centros de ensino de Oleiros. Ademais dos premios citados, ten outros no seu haber como por exemplo: Premio Irmandade do Libro a autora do ano, Premio Fundación Novacaixagalicia, Premio Ojo Crítico, Premio Espiral Maior ou Premio Nacional da Crítica.
O poemario "Materia", segundo o xurado do Premio Nacional de Poesía “mostra unha poesía metafórica que dialoga coa memoria persoal e colectiva e, á vez, directa, radical e feminista. Explora, de forma non compracente, temas como a maternidade, a familia e os costumes”.
Figura dividido en tres partes: Un río subterráneo, Iceberg e Nube ou O peso da Ingrávida. Está formado por vinte nove poemas que non deixan indiferentes a ninguén. Por destacar algúns, o primeiro é o impáctante titulado “Algunhas estrelas non caen do ceo” que fala da memoria
histórica e dun represaliado; ou o atraente “A miña relación máis longa” no que explica a relación que ten coa súa casa; ou o afectuoso “Carta ao irmán”; o fermosísimo “Iceberg”; ou o que dedica as súas amigas; o evocador “A casa dos meus pais”; o emotivo “Non chegarei a” que explica a decisión persoal de non ser nai, e así poderíamos continuar...
Unha magnífica proposta poética. Poderán ler poesías que emocionarán.
La muy catastrófica visita al zoo, de Joël Dicker.
