Recomendacións en Radioleiros: 18 de xullo

- Infantil:
"16 escritores muy, muy importantes" texto de Concha López Narváez e ilustracións de Violeta Monreal. Editado por Bruño.
Paseo pola historia no que atopamos datos curiosos desde Homero a Saint-Exupèry cunhas magníficas ilustracións de Violeta Monreal. Libro de coñecementos moi recomendábel para o verán.
 

- Mozos-as e adultos-as:
"Huesos en el jardín" de Henning Mankell, en Tusquets.
O inspector Wallander atopa un cadáver mentras visita unha casa nos arredores de Löderup. Este é o comezo dun novo libro da serie xa clásica escrita por Mankell e que figura entre as mellores da novela negra europea.
 

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Os + prestados nas Bibliotecas de Oleiros

As oito Bibliotecas Públicas Municipais de Oleiros realizaron un estudo sobre os fondos bibliográficos máis prestados aos seus socios/as e a clubs de lectura durante este ano e os datos resultantes son os seguintes:

Libros para adultos/as en lingua castelá:
- El cielo ha vuelto de Clara Sánchez
- Y las montañas hablaron de Khaled Hosseini
- El cumpleaños secreto de Kate Morton
- Dispara, yo ya estoy muerto de Julia Navarro

Libros para adultos/as en lingua galega: 
- A praia dos afogados de Domingo Villar
- O achado do castro de M. Carlos Núñez Singala
- Enderezo descoñecido de Kressmann Taylor
- Ardalén de Miguelanxo Prado

Libros para clubs de lectura de toda Galicia: 
- El proyecto esposa de Graeme Simsion
- Crematorio de Rafael Chirbes
- La vida de las mujeres de Alice Munro
- El amor no es un verso libre de Susana Fortes

Libros infantís e xuvenís en castelán: 
- Todo Mortadelo y Filemón de Francisco Ibáñez
- Diario de Greg de Jeff Kinney
- El fantasma de Canterville de Oscar Wilde
- Los juegos del hambre de Suzanne Collins

Libros infantís e xuvenís en galego: 
- Palabras envelenadas de Maite Carranza
- O último traballo do señor Luna de César Mallorquí
- O raposo e a mestra de Manuel Rivas
- O emocionante día de Piti o caracol de Sandrine Lhomme
- Cocorico de Marisa Núñez.

Os DVD, con películas e series para adultos/as máis prestados foron:
- Matalobos (serie de tv)
- Juego de tronos (1ª tempada)
- Intocable
- Lo imposible

DVD infantís e xuvenís: 
- Érase una vez... el cuerpo humano
- El maravilloso mundo de los animales
- El diario de Greg
- Enredados

CDs máis prestados: 
- Na lingua que eu falo de Najla Shami
- English audio inglés (Play & Learn Multimedia)
- Antología de Paco de Lucía
- Lo mejor de Luar na Lubre
- Galiza de Kepa Junkera

CDs e libros-disco infantís e xuvenís: 
- Bicos de música de Mamá Cabra
- Na punta do pé de Pesdelán
- Rosalía pequeniña de Uxía
- Pan de millo de Migallas

Con respecto ás revistas para adultos/as, a máis prestada, con moita diferenza sobre as demais foi Integral, seguíndolle, Saber vivir, Muy interesante e XL Semanal.

Nas revistas infantís e xuvenís as máis prestadas foron: Leo leo, tamén con moita diferenza sobre as Reportero Doc, Caracola e Okapi.

Desde as Bibliotecas Municipais de Oleiros invitamos a toda a poboación a que visiten as distintas bibliotecas e a que leven libros, discos ou películas en préstamo.

O máis doce aniversario: 50 anos da publicación de "Charlie e a fábrica de chocolate”

En 2014 cúmprense os doces cincuenta anos da publicación da primeira edición de "Charlie e a fábrica de chocolate" de Roald Dahl. 

A divertida historia de Charlie Bucket, os cinco billetes dourados, os malignos Oompa-Loompas e o extraordinario Willy Wonka foi traducida a cincuenta e cinco idiomas e leva vendidos case que vinte millóns de exemplares en todo o mundo. 

Neste 2014 haberá centos de actos para celebrar a conmemoración dos cincuenta anos de "Charlie e a fábrica de chocolate", de feito comezaron xa no mes de febreiro, tal e como ocorre no libro, no que o señor Wonka reabre as portas da factoría no primeiro día dese mes. En http://www.roalddahl.com/roald-dahl/timeline/2010s/1st-february-2014 podes atopar información sobre os actos que se realizarán durante este ano para celebrar tan saboroso aniversario.  
 

Na Biblioteca Central Rialeda queremos convidarte a visitar a pequena expo adicada a Roald Dahl e os seus libros así como as adaptacións cinematográficas.

Como Willy Wonka di, Espérante cousas espléndidas! Sorpresas marabillosas!

1914-1918: I Guerra Mundial, 100 anos dunha traxedia

A Biblioteca Municipal Xograr Mendiño de Lorbé adica unha exposición bibliográfica á I Guerra Mundial, conflito que comezou un 28 de xullo de 1914 e rematou catro anos máis tarde, o 11 de novembro de 1918.
 
Os libros que podes ver na biblioteca ou levar en préstamo son:
"Breve historia de Europa", "Só o silencio me responde: poemas escollidos", "Baixo o sinal da guerra", "14", "La caída de los gigantes", "Los siete pilares de la sabiduría: un triunfo", "Biff, Bang, Pow: novela case negra", "La verdad sobre el caso Savolta", "Sin novedad en el frente".

Recomendacións en Radioleiros: 11 de xullo

- Infantil (a partir de 11 anos): 

"Paulina", de Ana María Matute.

Lumen

Paulina é unha nena de 10 anos, orfa de  pai e nai,  que a levan para a casa de seus avós, na montaña, despois dunha grave enfermidade. Alí comeza a plantexarse cousas que pouco a pouco van medrando no seu interior e atrévese a pedirllas aos seus avós e amigos. Nesta nova vida  tamén  coñece o amor polos animais e a natureza, a soidade dos maiores cando os fillos medran, vanse e perden o apego pola terra, o efémero da infancia, e a confianza en si mesma.

- Mozos-as e adultos-as:

"84, Charing Cross Road" de Helene Hanff.

Anagrama

Helene Hanff é unha escritora neiorquina autodidacta que descobre por un anuncio no Saturday Review, unha librería en Londres especializada en libros de segunda man, á que decide escribir para solicitar edicións difíciles de atopar en New York. Así comeza unha correspondencia epistolar que durará vinte anos, entre Helene e Frank Doel, o empregado da librería, encargado dos seus pedidos.

A medida que a novela avanza, o peso das palabras que non se din, das cousas que ningún menciona, a ausencia “desas palabras” que faltan, faise máis presente na obra, como un xogo que habilmente atrapa ao lector.

84 Charing Cross Road, que se corresponde coa dirección da librería é a historia de dúas persoas unidas pola paixón da lectura e dos libros, como portas abertas cara outros mundos fantásticos.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Tertulia literaria en Rialeda: valoración final dos títulos da tempada 2013-2014

Unha vez rematada a tempada de Tertulias literarias na Biblioteca Central Rialeda, é hora de facer balance das propostas literarias que fomos ofrecendo ao longo dos pasados meses.

En total léronse 17 títulos de autores/as galegos/as, españois e internacionais, dos que os mellor valorados polos participantes foron:

Grupo A: 

1º) La ignorancia de Milan Kundera
Unha muller e un home atópanse por casualidade durante a súa viaxe de regreso ao país natal do que emigraron fai vinte anos. Poderán reemprender unha estraña historia de amor, apenas iniciada entón na súa terra?

2º) Claus y Lucas de Agota Kristof
Coa simplicidade sórdida dun conto de fadas, esta triloxía explícanos a historia de dous irmáns xemelgos, Claus e Lucas, condicionados por un vínculo agonizante, que se converte tamén nunha alegoría das forzas que separaron a Europa desde a Segunda Guerra Mundial.

3º) Una temporada para silbar de Ivan Doig
Ivan Doig está considerado como un dos mellores cronistas contemporáneos do Oeste americano, alumno avantaxado de autores como Wallace Stegner ou Norman Maclean. Una temporada para silbar é unha das súas mellores novelas, froito do seu particular xeito de entender a vida e a impoñente natureza de Montana.

4º) El proyecto esposa de Graeme Simsion
Don Tillman, profesor universitario, é un home atrapado nunha visión da realidade tan ríxida que nunca tivo unha segunda cita cunha muller. Coñecedor dos estudos que demostran que os homes que viven en parella son máis felices que os solteiros, embárcase no que bautiza O Proxecto Esposa para atopar a parella perfecta. Un relato hilarante e irresistiblemente romántico.

5º) La noche de los tiempos de Antonio Muñoz Molina

Grupo B:

1º) La noche de los tiempos de Antonio Muñoz Molina
En outubro de 1936 o arquitecto español Ignacio Abel chega a Pennsylvania procedente de España, deixando atrás a súa familia incomunicada nun país crebado pola guerra. Durante a viaxe lembra a historia de amor clandestino coa muller da súa vida e a crispación e desconcerto que precederon ao conflito fratricida.

2º) Una temporada para silbar de Ivan Doig


3º) El reflejo de las palabras de Kader Abdolah
Os lazos profundos e indestrutibles entre un pai e un fillo, capaces de perdurar a través do tempo e do espazo grazas ao poder aglutinante da arte e da lingua, son o fundamento narrativo desta novela orixinal e conmovedora, de marcado carácter autobiográfico. Así pois, por medio dos escritos do pai e os interrogantes do fillo, xorde a apaixonante historia do Irán do século XX, desde a implacable obstinación de Reza Kan en modernizalo ata a feroz represión do réxime dos aiatolás.

4º) Antoloxía do conto galego: século XX
Esta Antoloxía pretende ser unha panorámica do conto literario galego ao longo do século XX, desde a Xeración Nós aos escritores que comezaron a publicar durante os últimos anos do franquismo. Un período fundamental no que o conto galego acadou gran variedade de temas e unha extraordinaria e singular riqueza expresiva.

5º) La gran casa de Nicole Krauss

Imaxinemos un gran escritorio roubado, unha peza impoñente, con 19 caixóns cheos de segredos de todos os seus usuarios. Puido pertencer a Federico García Lorca, o primeiro dunha insólita cadea que conecta ao poeta con Daniel Varski, un autor chileno desaparecido baixo o terror de Pinochet e trasunto de Roberto Bolaño, veciño ocasional de Nova York que presta o escritorio a unha narradora en crise.

No mes de setembro abrirase de novo o prazo para inscribirse na próxima temporada desta actividade. As sesións comezarán a principios de outubro na Biblioteca Rialeda e serán os mércores, ás 17:30 horas.
Na Biblioteca Municipal Rosalía de Castro de Santa Cruz comezarán a mediados de outubro e terán lugar os luns ás 18:30 horas.

 

Os mundiais de fútbol e baloncesto 2014 xóganse nas Bibliotecas de Oleiros: sede Rialeda

O mundial de fútbol está na súa recta final. Pouco a pouco vai finando para dar paso ao Mundial de Baloncesto 2014, que comenzará o próximo 30 de agosto. Deixámosche as suxestións que a Biblioteca Central Rialeda pon á túa disposición para coñecer máis destes dous deportes e seguir a literatura do balompé e da canastra.

Chégannos "Un mar de soles" desde a Biblioteca Pública da Coruña Miguel González Garcés

A Biblioteca Pública da Coruña Miguel González Garcés publicou dúas guías de lectura para este verán dirixidas aos-ás nenos-as de 3 a 12 anos. Unha para os-as cativos-as de 3 a 8 anos e outra para o público infantil a partir dos nove anos.
 

Grazas polas vosas achegas desde o outro lado da ría.                                                          Feliz verán! 

 

Recomendacións en Radioleiros: 4 de xullo

- Infantil (maiores de 7 anos):
"Rajá: el mago más poderoso del mundo" de Carl Norac, ilustracións de Aurélia Fronty, en Edelvives.
Un álbum de gran formato con espléndidas ilustracións cheas de cor, que narra unha  historia de amor inspirada na India, na que Rajá, un aprendiz de mago, ten que superar múltiples probas para obter a credibilidade da súa familia e lograr o amor da súa amada. A familia de Rajá é desde hai máis de cen anos un clan de magos, pero Rajá non desexa pasar a vida ensaiando a diario os mesmos trucos. Para el o segredo da felicidade está nas cousas sinxelas: respirar o aire que nos rodea, rir e xogar e o que máis lle gusta de todo é executar malabares con ovos para entreter á fermosa Devika, a filla do marajá. Pero un día o pai chámao e dille que se ten que converter nun auténtico mago, senón será a deshonra de toda a familia, para isto terá que pasar por unha serie de vicisitudes que as nenas e os nenos que queiran coñecelas, deben achegarse ata a biblioteca, levar este libro en préstamo  e lelo.

É unha obra que nos presenta aspectos dos contos tradicionais como a posta a proba do protagonista a través dunha viaxe iniciática e de aprendizaxe, ou a recompensa  que é o triunfo do amor. É un libro para ver e observar pois as fermosas ilustracións, que ocupan a maior parte das páxinas, deléitannos segundo as imos contemplando.
 
- Mozos-as e adultos-as:
"A viaxe de Gagarin" de Agustín Fernández Paz, editado por Xerais.
Emotiva historia na que o protagonista, Miguel Mendiguren, un home duns sesenta anos, (mentres acompaña a súa nai nun hospital, nos últimos días da súa vida) lembra a súa adolescencia e primeira mocidade, na Coruña dos anos 60. Retrata a Coruña do franquismo, unha época de represión, de brigadas político-sociais, do Tribunal de Orden Público, pero tamén da resistencia anti-franquista, e aproveita para comentar a cultura pop da época: o cine e a música dos 60.
Chamábanlle Gagarin por un premio que gañou de neno por un traballo escolar sobre esa primeira viaxe espacial e pola súa afección por esta temática. Nesta obra, Agustín Fernández Paz, coa mestría que o caracteriza e a súa excelente prosa, irá contando a vida de Gagarin e a súa familia (unha familia sinalada pola policía) nestes duros anos do franquismo; ao mesmo tempo que nos narra unha fermosa historia de amor. Segundo comenta o autor  en varias entrevistas, esta obra é unha homenaxe á resistencia franquista, é un libro contra a desmemoria, e así di: “Sen memoria, non somos”. Unha fermosa novela que nos vai atrapar, que nos fará lembrar ou dará a coñecer (para os/as máis novos/as) eses terribles anos do franquismo, ao mesmo tempo que nos presenta unha emocionante historia de amor.

Di o autor que lle levou máis tempo buscar a documentación  que o que foi a propia escritura da obra e para compartir con todos nós esa información abriu un blog http://agustinfernandezpaz.eu/gagarin no que todas as persoas que queiran poden achegarse ao que foron os anos sesenta.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Lecturas ao sol: guía de suxestións para o verán 2014

As Bibliotecas municipais de Oleiros elaboraron unha guía de lectura titulada  "Lecturas ao sol", formada por 262 recomendacións de libros, DVD e CD.
Esta escolla foi realizada por todo o persoal das bibliotecas municipais e nela poden atopar publicacións moi diversas. Trátase dunha selección de creacións de autoras e autores galegos, españois e internacionais, para diferentes idades, distintos gustos,  intereses e preferencias.  Os libros que se recomendan para nenos/as e adolescentes figuran clasificados por idades, para as que se considera que son máis axeitados. A idade para a que se suxire cada obra é só de forma orientativa, xa que cada  nena ou neno ten un grado de desenvolvemento mental que debemos respectar.

Desde as Bibliotecas municipais ofrécese esta guía de lectura cun dobre obxectivo: presentar obras de calidade literaria, artística ou científica para animar a súa lectura, audición ou visionado e lembrar que un libro, un CD e un DVD son tamén un bo agasallo.
Nesta época en que hai máis tempo libre, na que nos deleitamos co sol e o mar, desexamos compartir libros, discos e películas que nos agradaron. Boas historias e bos libros para divertir e emocionar, reflexionar e aprender, mirar e observar, ver e escoitar.
Son 262 libros, DVD e CD que hai nas bibliotecas municipais e que se poden levar en préstamo para as casas. Uns divirten, outros emocionan, fan pensar, provocan a reflexión ou aportan novos coñecementos.

Realizáronse dúas publicacións distintas:
Unha formada por todas as recomendacións infantís e xuvenís da que se editaron 3000 exemplares que se repartiron a todo o alumnado de educación infantil ( a partir de 3 anos) e a todo o de ensinanza primaria dos centros de ensino público deste Concello.
Outra que é a guía completa, coas recomendacións infantís e xuvenís, pero tamén as de libros, DVD e CD para adultos/as que se está a repartir nas bibliotecas municipais, pero que tamén se vai enviar en formato dixital a todos os socios e socias das bibliotecas que teñan correo electrónico.

Agora que se achegan as vacacións do verán, animamos a todas as persoas a que dediquen parte do seu tempo libre a ler algún libro, ver algunha película e escoitar música, pero principalmente aos nenos/as, adolescentes e mozos/as que teñen máis tempo libre e lembramos a importancia da lectura na formación integral da persoa.  A facultade lectora non é innata, vaise adquirindo pouco a pouco, por este motivo gustaríanos contribuír a espertar unha sensibilidade que faga descubrir o pracer que pode proporcionar a lectura dun bo libro, ver unha boa película ou escoitar un bo disco.  

Feliz verán e un cordial saúdo desde as bibliotecas municipais de Oleiros!!!

Expo de Eduardo Blanco Amor na Biblioteca de Lorbé

Na Biblioteca Municipal Xograr Mendiño (Lorbé) podes ver a exposición adicada ao escritor ourensán Eduardo Blanco Amor no 35 aniversario do seu pasamento. 

Clica nas ligazóns e accede aos rexistros bibliográficos das obras existentes na Biblioteca Xograr Mendiño da autoría de Blanco Amor ou títulos adicados á súa obra.

Ana María Matute 1925 - 2014

Con motivo do pasamento de Ana María Matute, ofrecemos senllas exposicións adicadas á súa obra, na Biblioteca Xograr Mendiño de Lorbé e na Biblioteca Central Rialeda.  

A xenial novelista nacida en Barcelona foi Premio Cervantes en 2010 e pertenceu á Real Academia Española, onde ocupaba o asento «K». Foi a creadora de títulos como 'Olvidado Rey Gudú', 'Pequeño teatro', 'El verdadero final de la bella durmiente', 'El polizón del Ulises', ou 'El árbol de oro y otros relatos'.

Recomendacións en Radioleiros: 27 de xuño

- Infantil (nenos-as a partir de 5 anos):
"Ricitos de oso" texto de Stéphane Servant e ilustracións de Laetitia Le Saux, en Juventud.
A familia Oso está a preparar os disfraces para a gran festa de carnaval que se vai celebrar no bosque, Mamá Osa ten o seu disfraz de Bela Durminte, Papá Oso está moi ledo co seu de Lobo Feroz, e osiño quere disfrazarse de Ricitos de Oso….Por moito que o seu pai intenta convencelo que de bombeiro ou policía estaría moito mellor, osiño non cede.
 
- Mozos-as e adultos-as:
"O derradeiro libro de Emma Olsen" de Berta Dávila, editado por Galaxia.
Este libro foi Premio de Narrativa Breve Repsol 2013. A protagonista e narradora Emma Olsen, escritora famosa, sofre un cancro terminal que a leva a voltar á vila que a víu nacer e da que fuxíu, co fin de escribir a súa derradeira novela, buscando conseguir esa paz ou… ese final feliz.
 
Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Recomendacións en Radioleiros: 20 de xuño

- Álbum ilustrado:
"A miña primeira viaxe" de Paloma Sánchez Ibarzábal, ilustracións de Maximiliano di Lauro, editado por OQO.
Unha linguaxe onírica e poética para acompañar a viaxe dun bebé na súa transformación. Magníficas ilustracións de M. di Lauro.
 

- Mozos-as e adultos-as:
"14" de Jean Echenoz, en Anagrama.
O inicio da Primeira Guerra Mundial visto cos ollos da xente común: un carniceiro, un oficinista, unha nai solteira… todo coa prosa precisa de Echenoz. Unha obra breve e á vez intensa, potente e cunha gran carga de sentimentos. Outro texto de alta calidade do autor de “Correr".
 

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Lembranza das Bibliotecas de Oleiros a María Wonenburger

O sábado, 14 de xuño, finou a insigne matemática María Wonenburger. Nacera en Montrove (Oleiros) no ano 1927. Amosa desde a infancia unha grande inclinación polos números e as matemáticas polo que no 1945 desprázase a Madrid para realizar a licenciatura nesta materia. Con 26 anos marcha para Estados Unidos cunha beca Fullbright. Abandona país, familia e amizades por unha carreira catalogada (nesa época) coma non feminina. Pertence á primeira promoción de licenciados en Matemáticas, a primeira española en acadar unha beca Fullbrigt, para realizar o doutoramento en matemáticas, nos Estados Unidos. Todo iso en 1953. Unha vez máis vai abrindo camiños, pois grazas á súa dedicación e valentía convértese nunha auténtica pioneira e espello para moitas outras mulleres. 

Exerceu como profesora de matemáticas en universidades de Canadá e de Estados Unidos, onde se relaciona e coñece os máis grandes matemáticos do momento, converténdose nunha referencia internacional en álxebra. 

Dúas profesoras da Universidade da Coruña, Ana Dorotea Tarrío Tobar e Mª José Souto Salorio, van facer visible, para toda Galicia e España,  a figura e o traballo da magnífica científica María Wonenburger. A partir das súas publicacións e divulgacións, chéganlle en vida numerosos recoñecementos. No ano 2012, o Concello de Oleiros, no seu lugar de nacemento, Montrove, vai honrar a súa persoa cun fermoso parque denominado Parque María Wonenburger Planells. En maio deste ano, a Concellaría de Cultura de Oleiros, a través  do Sistema de Bibliotecas Públicas Municipais, o Servizo de Normalización Lingüística e o Instituto Miraflores de Oleiros inclúen o seu nome no Roteiro Cultural e Literario desta localidade e levan a cabo unha publicación que distribúen entre máis de 300 alumnos e alumnas dos centros de ensino público, na que os textos foron realizados por alumnado de 1º de bacharelato do mencionado instituto, dirixido polas profesoras Rosa García Vilariño, Mercedes Agra Ramírez e Mª Carmen Peñamaría. Con estes actos, o Concello de Oleiros homenaxeou a súa figura e quere conservar a lembranza desta ilustre matemática e excelente persoa.