Recomendacións en Radioleiros: 13 outubro 2023

- Infantil (a partir de 5 anos):

Bajo las olas, de Meritxell Martí con ilustracións de Xavier Salomó
Flamboyant

Dous nenos, unha praia. Un leva flotador e o outro non. Cando un pregunta ao outro "Non sabes nadar?", este séntese avergoñado, pero descubrirá que baixo as ondas todo é distinto, que hai tesouros agochados no mar que lle mostrarán sensacións novas e moi reconfortantes.

Unha historia moi emotiva que nos fará reflexionar sobre o medo ao rexeitamento, a vergoña e sobre todo ensinará a nenas, nenos e pesoas adultas a respetar e normalizar todo tipo de situacións.

- Mocidade e persoas adultas:

As alumnas, de Paula Carballeira
Galaxia

"As alumnas" é unha peza de teatro que reivindica a figura da mestra e pedagoga María Barbeito a partir da visión que dela teñen dúas das súas alumnas, Rosa e Elvira, que se atopan no enterro desta muller que foi unha peza chave na educación antes de que o Comité de Depuración implantado pola reforma educativa franquista a apartase das aulas.

Con esta peza a autora gañou o Premio Nacional de Literatura Dramática deste ano.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.