Recomendacións en Radioleiros

Títulos recomendados o venres 8 de outubro:

- Infantil (de 6 a 8 anos):

As luces que se acenden e se apagan, de Ramón Trigo

Editado por Kalandraka.

Historia de Lusco, un pintor que ten a idea de pintar un gran bodegón. Ponse ao traballo pero o asunto non é tan simple.

Libro de formato grande, texto escaso e grande calidade plástica.

- Mozos-as e Adultos-as:

Viaje al fin de la noche, de Louis-Ferdinand Céline
Editado por Edhasa

Autor que viviu entre 1894 e 1961, polémico polas súas posturas políticas, dase a coñecer no ano 1932 con este libro de matiz autobiográfico. É unha viaxe a través do século XX: a guerra, a vida nas colonias e e emigración a Norteamérica. O propio autor participou na I Guerra Mundial na que foi ferido, traballou para a Sociedade de Nacións como experto en hixiene (era médico), viaxou frecuentemente a América e África e exerceu a medicina en París. Foi un libro novidoso no seu momento pola linguaxe que empregaba.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas

Recomendacións en Radioleiros

Títulos recomendados o venres 1 de outubro:
- Infantil (nenos e nenas de 8 a 10 anos): "Taller de corazóns". Texto de Arturo Abad e ilustracións de Gabriel Pacheco, en OQO.

É un fermoso álbum ilustrado onde nos presenta a Matías que ten un taller de corazóns. Matías fabrica todo tipo de corazóns: brandos como os de mazapáns, duros como os de porcelana, transparentes, como os de cristal, pero ten un segredo. Cada primavera vai visitar á súa amada Beatriz.... Estamos ante un texto poético e unhas singulares, suxestivas e delicadas ilustracións que nos falan das emocións e os sentimentos para introducirnos nun máxico mundo de fantasía e de soños.

- Mozos-as e adultos-as: "Sol de inverno" de Rosa Aneiros, en Xerais.

Sol de inverno gañou o Premio Xerais de Novela 2009.Narra a historia dunha nena chamada Inverno e cóntanos un terrible suceso provocado por celos, acaecido antes da Guerra Civil no lugar onde vivía, en Antes. Como eses acontecementos a marcaron totalmente.Ao estalar a Guerra civil tiveron que escapar para Barcelona. Describe como era a súa vida alí, a fuxida a Francia, o barco Ipanema que as levará ao exilio a México e a Cuba, país onde se reencontra cos seus antepasados.A Inverno roubáronlle a infancia e durante toda a súa vida loitará por recuperar ese tempo. O seu exilio non é solo dun país, senón tamén a súa loita interior.Esta obra fala de acontecementos e personaxes reais como por exemplo as Misións Pedagóxicas da II República con Rafael Dieste e Carmen Muñoz, da Guerra Civil e de Castelao, de José Martí e a Revolución Cubana, pero tamén doutros inventados. É moi entenrecedor o personaxe de Rebeca, a irmá pequena, que a raíz de visitar en Francia unha praia onde estaban concentrados os homes republicanos españois, polo horror que alí viu e o frío que pasou quedoulle para sempre un tremor nos pes, coa sensación de que tiña area neles.Rosa Aneiros di que "Sol de Inverno non é unha novela histórica, senón que é a historia de cómo Inverno procura recuperar o paraíso perdido da súa infancia no territorio de Antes".

Estamos ante unha interesante novela, máis de cincocentas páxinas con moito simbolismo, onde nos presenta unha memoria do exilio.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas

Dirixido por Jean Jacques Annaud

Heterodoxo director, amplamente galardoado (recentemente coa medalla Carlomagno) Jean Jacques Annaud acadou recoñecemento mundial con El nombre de la rosa (1986). Sempre inclinado á transgresión, tanto narrativa en En busca del fuego (1981) ou El oso (1988), como á moral, aunque en este caso desde actitudes casi opuestas, en El amante (1992). A miúdo é visto como un antropólogo ao que gusta recrear nos seus filmes as diferentes culturas dende unha perspectiva de conflicto, de transformacións emocionais.

Entrevista en "Hoy Cinema"

A Biblioteca Central Rialeda ofrece na súa colección de dvd os seguintes títulos:

- Enemigo a las puertas (2001)

- Siete años en el Tíbet (1997)

- El amante (1992)

- El oso (1988)

- El nombre de la rosa (1986)

- En busca del fuego (1981)

Os títulos atópanse expostos no mostrador do 2º andar da biblioteca (Sala de audiovisuais)

Recomendacións en Radioleiros

Títulos recomendados o venres 24 de setembro:
- Infantil (nenos e nenas menores de 6 anos):

"O oso e o corvo" textos de Monika Klose e ilustracións de André da Loba. Editado por OQO. Premio Visual de Ilustración outorgado pola revista de deseño Visual.
"O oso e o corvo", fálanos dun oso que quería voar polo que fixo un trato cun corvo. El deixáballe os seus brazos ao corvo e este deixáballe as súas alas. Ao corvo pareceulle ben porque xa había tempo que quería ser forte como un oso.
Un libro fermoso cunha divertida historia sobre desexos e acordos incumpridos, pero coa mensaxe de que todos os seres temos cousas de valor.
Destaca a proposta plástica que deseñou o ilustrador portugués André da Loba. Ilustrou este libro a partir dunha serie de esculturas de cartón.
- Mozos-as e adultos-as:

"El maestro de almas" de Irène Némirovsky, en Salamandra.
"El maestro de almas" é unha novela que trata sobre o desarraigo e a obsesiva busca de prestixio social.
Darío Asfar é un médico novo que chega desde Crimea a Niza acompañado pola súa muller e ou seu fillo, aínda bebé. Este médico monta unha consulta e loita por conseguir pacientes, pero a súa cor de pel algo máis escura e a súa condición de estranxeiro inspira desconfianza. Asfixiado polas débedas, Darío loita desesperadamente por conseguir unha clientela, pero a súa orixe provoca rexeitamento. A precaria situación da súa familia, a súa obsesión por medrar e as débedas que se van acumulando obrígao a realizar traballos pouco claros. Aproveita a necesidade de confianza dos enfermos para dedicarse á psicanálise sen os coñecementos necesarios e sen ningún escrúpulo ofrecendo falsas seguridades e grazas á súa facilidade de palabra. Darío transfórmase en terapeuta, ofrece o que desexan oír as persoas con cartos. Desta forma a autora vainos presentando unha serie de mulleres e homes poderosos que acoden á súa consulta. O protagonista irá medrando socialmente, pero este ascenso terá unhas consecuencias inesperadas para el. Di que todo o fai pola súa muller e polo seu fillo, pero tamén vemos as súas ansias por medrar.
Irene Nemirovsky é unha escritora cunha gran capacidade psicolóxica para crear personaxes moi verosímiles e profundamente humanos. El maestro de almas é unha excelente novela, moi fácil de ler, pero que tamén nos fai pensar e reflexionar.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas

Tertulias Literarias: Preinscrición Tempada 2010-2011

O luns 27 de setembro ábrese a pre-inscrición para participar nos grupos de Tertulias Literarias, na Biblioteca Central Rialeda e na Biblioteca e Centro de Documentación da Muller "Rosalía de Castro" de Santa Cruz.

Moi importante: a participación final estará condicionada á existencia de vacantes con respecto á participación da tempada 2009-2010. A tal efecto créase unha lista de espera.

Máis información:

981639511 - Biblioteca Central Rialeda

981626338 - Biblioteca de Santa Cruz

A actividade comenzará no mes de outubro, en datas todavía por determinar.

Recomendacións en Radioleiros

Títulos recomendados o venres 17 de setembro:

- Infantil (nenos e nenas menores de 6 anos):

"El arca de Noé" de Lluís Farré e Mercé Canals. Editado por Combel.
Libro móbil con poucas páxinas baseado na coñecida historia bíblica. Grande calidade estética e visual. Ideal desde o punto de vista pedagóxico.

- Mozos-as e adultos-as:

"Tres vidas" de Gertrude Stein, en Galaxia.
Libro da primeira mecenas de Picasso no que en tres relatos retrata a outras tantas mulleres: Ana, ama de chaves que sofre ao partir a súa ama.
Malanchtha, mulata que namora dun médico branco.
Lena, que casa dun xeito amañado cun xastre.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Pósit poemas

Seguen chegando poemas para Pósit. Neste caso son dous: un de Paulo Coelho e o outro de Gustavo Alejandro Castiñeiras. A nosa doadora de versos foi Mª Carmen Costoya González.

Grazas por compartir estes versos connosco!!!

Destino SCQ. Volume 4

"Santiago de Compostela é unha creación sorprendente. Naceu dunha estrela que indicaba unha tumba e floreceu sobre ese sepulcro. En todo caso falamos dunha obra aberta, con páxinas de cronoloxía en espiral que se solapan como pétalos dunha enigmática rosa". Estas palabras do escritor Manuel Rivas poden estimularnos a seguir abrindo esas páxinas-pétalos das obras que che presentamos sobre a cidade-rosa...de pedra.

Recomendacións en Radioleiros

Títulos recomendados o 10 de setembro

- Infantil (menores de 8 anos):

"Olladas" de Dieter Wiesmüller.
Editado por Kalandraka

Un libro de formato grande con magníficas ilustracións que nos ofrece unha viaxe polo mundo visto a través da óptica dos animais.
- Adultos:
"La sal de la vida" de Anna Gavalda.
Editado por Seix Barral
Tres irmáns, Simon, Garance e Lola, fuxen dunha voda para ir visitar a Vincent, o seu outro irmán quen vive nun pobo. Un día de descanso lembrando os tempos pasados que constitúe unha historia afectiva e amena, propia de Anna Gavalda.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

O cine dos irmáns Coen

Os irmáns Joel e Ethan Coen sempre amosaron sinais de identidade dun estilo inconfundible, dotado dun ácido, corrosivo e xudeu sentido do humor. No cine dos Coen, os persoaxes están por enriba da historia, e os diálogos resultan intelixentes. Na súa extensa filmografía, que arranca a mediados dos anos oitenta, ollamos os lugares máis agochados do mid west americano, o sur de Missouri ou os desertos de Arizona. No cine dos Coen o lugar onde transcorre a acción é sumamente importante, asociándose intrínsecamente cos personaxes.
Enlace ao artigo completo (en castelán)

A Biblioteca Central Rialeda ofrece na súa colección de dvd os seguintes títulos (consultar dispoñibilidade):

- Quemar después de leer (2008)

- No es país para viejos (2007)

- Ladykillers (2004)

- O brother! (2000)

- El gran Lebowski (1998)

- Fargo (1996)

- Barton Fink (1991)

- Muerte entre las flores (1990)

- Arizona Baby (1987)

Os títulos atópanse expostos no mostrador do 2º andar da biblioteca (Sala de audiovisuais)

Recomendacións en Radioleiros

Títulos recomendados o 2 de setembro:

- Infantil (de 12 anos en adiante):

"Lluvia de millones" de Frank Cottrell Boyce editado por Salamandra.
Que farías se atopases no teu xardín unha bolsa repleta de cartos e só tiveses un par de semanas para gastalos?

- Mozos-as e adultos-as: "Lavinia" de Ursula K. Le Guin, en Minotauro.
Lavinia vive en paz e liberdade ata que os pretendentes acuden para pedir a súa man, a man da filla do rei Latino, e uns estranxeiros navegan Tibet arrriba cargados de malos augurios.
Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Destino SCQ. Volume 3

Presentámosche esta terceira entrega de Destino SCQ. Seleccionamos catorce títulos para nenos e nenas de diferentes idades. O Camiño de Santiago é un itinerario cheo de aventuras e sorpresas e a cidade do santo dos croques está chea de reviravoltas que poderás percorrer da man destes e outros libros.
Proba e déixate engaiolar!!!

Pósit Poemas

Ola: seguimos recibindo versos para Pósit Poemas. Hoxe son catro poemas que che ofrecemos nesta galería.
Anímate!!, manda os teus. Clica na imaxe da dereita e segue as instruccións de uso.

Recomendacións en Radioleiros

Títulos recomendados o 27 de agosto:
- Infantil (de 6 a 8 anos): La gran caja de Toni Morrison e Slade Morrison con ilustracións de Giselle Potter, en Ediciones B

"A gañadora do Nobel de literatura no 1993, tráenos unha historia de tres nenos que viven nunha caixa da que non poden saír. Unha testemuña sobre a percura da felicidade, algo que non se pode comprar."

- Mozos-as e adultos-as:

New York, New York de Inma López Silva editado por Galaxia.
"Textos curtos nos que a autora relata diferentes aspectos da súa estadía laboral en NY durante uns meses a cabalo entre o 2005 e 2006. Unha visión con moito humor e ironía."

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Agora serache máis doado atopar os teus favoritos!!!

Agora serache máis doado atopar os teus libros favoritos, en concreto, novelas e relatos. Ademáis da clasificación por autores-as que figura nas etiquetas na parte inferior dos lombos dos libros, colocamos un icono (na parte superior do lombo) que representa a clasificación de novelas e relatos por xéneros literarios. Son 11 grupos: Aventuras, Ciencia ficción, Erótica, Fantástica, Histórica, Humor, Intriga e misterio, Romántica, Social e política, Terror, e Vida cotiá, con cadanseu icono.

Sabemos de libros que teñen algo así como o "don da ubicuidade" e poderían levar varios signos identificativos, pero eleximos o que o representa mellor dentro dos nosos 11 grupos. De todos os xeitos son benvidas as túas suxestións.