2 de abril: Día do Libro Infantil

Desde 1967, o IBBY (International Board on Books for Young People) promove a celebración do Día Internacional do Libro Infantil o 2 de abril, conmemorando o nacemento de Hans Christian Andersen.  As Bibliotecas Municipais de Oleiros xunto a outras bibliotecas públicas, así como librarías e outras entidades, celebramos esta data organizando exposicións bibliográficas, contacontos e actividades diversas relacionadas co libro e a lectura.

 

- Biblioteca Central Rialeda (Perillo)

De 5 a 16 de abril, "Paxaros, bolboretas e elefantes" é unha actividade na que ofrecemos modelos destes animais para decorar e recortar e así acompañar con ilustracións o fermoso texto "A música das palabras" de Margarita Engle, escollido este ano para celebrar o Día Internacional do Libro Infantil a nivel mundial. A expo "Palabras con música", expón aqueles libros de/con cancións da nosa sección Letras e sons, que son un goce para a vista e o ouvido e convidamos a que leves para a túa casa.

 

- Biblioteca Municipal Rosalía de Castro (Santa Cruz)
De 5 a 19 de abril, convidamos as-os nosas-os usuarias-os a imaxinar o seu personaxe de ficción favorito, dentro da actividade “Imaxina personaxes”. Teremos un taboleiro onde poderán ir engadindo os nomes das figuras de conto que máis lles apeteza, pode ser dos libros da Mostra bibliográfica que temos na entrada da biblioteca (selección de libros gañadores do Premio Andersen ao longo dos anos), outros contos da biblioteca, dos que teñan na casa…
A biblioteca proporcionará recortables en forma de flor e nubes para que cada participante escriba dentro o nome do personaxe e o pegue no taboleiro habilitado.

- Biblioteca Municipal Mª José Trincado (Mera)

Poderás contemplar a Exposición bibliográfica de dúas grandes escritoras xa clásicas da literatura infantil e xuvenil a nivel mundial: son Maria Gripe e Christine Nöstlinger ambas con recoñecido prestixio, unha ampla traxectoría profesional e numerosos galardóns, entre eles o Premio Hans Christian Andersen.

- Biblioteca Municipal Mª José Ruso (Dorneda)
Durante o mes de abril podes ver "ExpoCómic", unha mostra das coleccións de banda deseñada infantil e xuvenil  dispoñibles na biblioteca. Ademáis, durante este mes, agasallaremos as-aos cativas-os cun orixinal marcapáxinas para colorear.

 - Biblioteca Municipal Manuel María (Oleiros)

De 29 de marzo a 9 de abril, Mostra bibliográfica das obras de Hans Christian Andersen e das súas posteriores adaptacións dispoñibles na biblioteca e a actividade “Teño moito conto”: a biblioteca proporcionará un pequeno libriño a cada nena-o para que confeccione nel a súa propia historia que despois será exposta na biblioteca.

- Biblioteca Municipal Xograr Mendiño (Lorbé)
Durante o mes de abril terás a ocasión de ver a Exposición bibliográfica de obras de H.C. Andersen. Ofrecerémosche marcapáxinas para colorear e o mural de recomendacións: as-os usuarias-os poden recomendar un libro (escribindo ou as-os máis pequenas-os debuxando) e colocarase nun mural para que as-os demáis usuarias-os podan consultalas.