Ler conta moito e actividades infantís: 8 a 11 de outubro 2018

Biblioteca Pública Municipal Mª José Ruso. (Dorneda)
Luns 8 de outubro, ás 17:30     
Para nenas-os a partir de 6 anos (imprescindible reservar praza, tlf.: 981 626 638)
MONITORADO: Diseño & Creatividad
OBRADOIRO: “Constrúe o teu propio superheroe ou superheroína”

Biblioteca Pública Municipal Manuel María. (Oleiros)
Martes 9 de outubro, ás 18:30    
Para nenas-os a partir de 3 anos (imprescindible reservar praza, tlf.: 981 610 700)
CONTACONTOS: Pablísimo
TÍTULO: “O paroleiro”

Biblioteca Pública Municipal Rosalía de Castro. (Santa Cruz)
Mércores 10 de outubro, ás 17:30  
Para nenas-os a partir de 6 anos   Aforo completo!!!
MONITORADO: Ciencia en ruta
OBRADOIRO: “Obradoiro de foguetes espaciais”

Biblioteca Central Rialeda. (Perillo)
Xoves 11 de outubro, ás 18:30 
Para nenas-os de 1 a 3 anos   Aforo completo!!!
CONTACONTOS: Ramiro Neira
TÍTULO: “Abrindo os ollos” 

Algúns destes actos están incluídos no programada Rede de Bibliotecas de Galicia

Bibloleiros en Kalandraka TV

A bibliotecaria municipal do Concello de Oleiros, Luz Corral, inaugura coa súa entrevista o espazo adicado ás bibliotecas "Onde habitan os libros", de Kalandraka TV, que ofrece un lugar para dar a coñecer bibliotecas e librarías de Galicia. Esta canle de televisión a través de internet pretende dar maior visibilidade á literatura infantil e xuvenil e vai dirixida a todas as persoas e institucións implicadas na animación á lectura.

Kalandraka é unha editorial especializada en literatura infantil e xuvenil que conta cunha traxectoria de máis de 20 anos. Neste momento bota a andar unha canle de televisión en liña a través da que será posible coñecer as-os creadoras-es de libros e saber máis das súas obras e do seu proceso de traballo. Este espazo permitirá descubrir os lugares onde habitan os libros, como as Bibliotecas Públicas Municipais de Oleiros, e servirá tamén como punto de información de novidades editoriais, recomendacións e últimas actividades arredor do libro e da lectura.

Parabéns Kalandraka TV!!!

Recomendacións en Radioleiros: 5 outubro 2018

- Infantil (a partir dos 6 anos):

El mejor regalo del mundo, de Ricard Ruiz Garzón; ilustracións de Claudia Degliuomini
Pirueta

Fermoso libro con delicadas ilustracións en tons pastel. Anita, unha nena de 5 anos, cada vez que celebra o seu aniversario recibe un libro de agasallo do seu padriño Gerard. Son libros especiais que a achegan a países exóticos. Son sempre diferentes e falan de mundos incribles:
- Un de África que está cheo de leóns, desertos, homes altos que levan roupas de cores e de mulleres de branco sorriso.
- Outro do Polo Norte, cheo de neve e de iglús feitos con bloques de xeo e esquimós que pescan a través de buratos que fan no xeo.
- Outro de China, no que lle mostra a gran muralla, pagodes e ideogramas.
Pero este último ano o seu padriño a agasalla con decenas de libros en branco...
Hai xogos, sorpresas e un algo moi especial: o mesmo que agardan todos os nenos e nenas que soñan co mellor agasallo do mundo...
A obra finaliza co carné do Club dos Exploradores que converte a cada lector ou lectora no seu membro honorífico/a.

Estamos ante unha encantadora obra que nos fala de amizade e do agarimo dos nosos seres queridos.

- Mozas/os e adultas/os:

Camuflaxe, de Lupe Gómez
Chan da Pólvora

Camuflaxe é unha excelente obra de poesía que a autora escrebe a partir da morte da nai e que lla dedica con estas palabras “Á miña nai, na fraxilidade íntima da lúa. Ás cousas e flores gardadas dentro dos corpos das nosas devanceiras”.

Coller este libro nas mans e observalo é como coller unha obra de arte.

Nunha coidada e delicada edición vemos na cuberta a fotografía da bisavoa da autora, coñecida como “Pepa da Visa” que mira directamente á cámara e na que destacan unhas mans de muller traballadora, unhas mans que nos falan.

Contén 107 páxinas poboadas de fermosas e curtas poesías que chegan ao profundo da sensibilidade do lector ou lectora.

Dividido en seis partes tituladas: Enerxía secreta, Como por ensalmo, As fontes salvaxes do paraíso, Salmo Responsorial, O límite de Galicia, Dar a extremaunción.

Estamos ante unha obra impactante, que toca no profundo do ser. A partir da memoria da autora fálanos da relación con súa nai e outros seres queridos, da vida no rural galego, dos traballos do campo, da natureza, da paulatina desaparición da cultura do mundo rural. 

Un libro delicioso que nos presenta un canto de amor á nai e á cultura do mundo rural galego.

QUÉROTE, cos meus dedos mudos.
Coas bolboretas do aire fago para ti un encaixe.
Coa forza cega dos meus ollos tristes
ensaio para ti unha obra de teatro.

Co meu amor fágoche
un bosque.

Aprendo a escoitar as nubes, a traballar a terra e a ler o ceo,
no teu colo.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Tertulias Literarias en Rialeda e Santa Cruz: inscrición a partir do luns 8 de outubro

BIBLIOTECA CENTRAL RIALEDA

O prazo de inscrición para as Tertulias literarias na Biblioteca Central Rialeda ábrese o luns 8 de outubro ás 8,15 h.*

A inscrición poderá facerse dos seguintes xeitos:
- A través da páxina web do Concello de Oleiros.
- Persoalmente na Biblioteca Central Rialeda.
- Por teléfono (981 639 511) no horario da biblioteca (luns a venres de 8,15 a 21,15 h.).

40 prazas por orde de inscrición. As 20 primeiras solicitudes constituirán o grupo A e as 20 restantes o grupo B.

As persoas que queden sen praza entrarán a formar parte dunha lista de espera, sendo avisadas cando haxa unha vacante.


BIBLIOTECA E CENTRO DE DOCUMENTACIÓN DA MULLER "ROSALÍA DE CASTRO". SANTA CRUZ

A inscrición para as Tertulias literarias na Biblioteca de Santa Cruz ábrese o luns 8 de outubro ás 16 h.*

A inscrición poderá facerse dos seguintes xeitos:
- Persoalmente na Biblioteca de Santa Cruz.
- Por teléfono (981 626 338) no horario da biblioteca (martes a xoves de 10 a 13,30 h.; luns a venres de 16 a 20 h.; primeiro e terceiro sábado de mes de 10 a 14 h.).

20 prazas por orde de inscrición. As persoas que queden sen praza entrarán a formar parte dunha lista de espera, sendo avisadas cando haxa unha vacante.


*Non se admitirán solicitudes previas á data sinalada.

IMPORTANTE: A inscrición en liña está dispoñible únicamente para as tertulias da Biblioteca Rialeda.

Poden inscribirse todos/as os/as maiores de 16 anos que desexen participar.

Comentaranse obras de distintos xéneros literarios, principalmente narrativa contemporánea, pero tamén se le poesía, teatro e ensaio, nun ambiente de familiaridade, procurando o lado formativo e á vez, lúdico da lectura.

O principal obxectivo é animar a ler lendo, gozar da literatura como un desenvolvemento da capacidade de creación e comunicación a través da lectura, de maneira que compartindo ideas, reflexionando sobre temas diversos poidamos enriquecernos cos diferentes puntos de vista.

As programacións inclúen obras de autoras e autores da literatura galega, española e internacional.

Datas de inicio da actividade:
- Grupo A de Rialeda: mércores 24 de outubro, das 17,30 ás 19,30 h.
- Grupo B de Rialeda: mércores 17 de outubro, das 17,30 ás 19,30 h.
- Tertulia de Santa Cruz: luns 15 de outubro, das 17,30 ás 19 h

As sesións teñen un carácter quincenal. A actividade remata no mes de xuño de 2019.

Aviso importante!

- Biblioteca Pública Municipal "Xograr Mendiño" (Lorbé): pechada os días 5, 8, 9 e 10 de outubro.

- Biblioteca Pública Municipal "Ánxel Fole" (Nós): pechada de 8 a 11 de outubro.

Desculpen as molestias!

Exposición bibliográfica adicada a Ana Romaní

Ana Romaní foi galardoada co Premio Nacional de Periodismo Cultural do Ministerio de Cultura y Deporte. O xurado motivou a elección de Romaní “na súa longa traxectoria no xornalismo, o seu constante traballo de promoción da cultura e da radio con formatos propios”, así como pola “súa visión de feminismo crítico e compromiso social”.
o Ministerio de Cultura y Deporte recoñece con este premio o labor de profesionais do xornalismo que, ben coas súas obras, ben a través da súa participación activa en diversos ámbitos da creación artística ou literaria, fomentan as actividades culturais contribuíndo ao enriquecemento do patrimonio cultural de España.
Naceu en Noia (A Coruña) en 1962. Ana Romaní conta cunha longa traxectoria no ámbito xornalístico, ademáis de ser poeta e escritora. É Académica de Número da Real Academia Galega.
Romaní comezou os seus pasos no xornalismo en 1983, ao participar na creación da revista Carabela de Xiada. A partir de 1988 encamiña a súa traxectoria profesional ao mundo da radio. Tras os seu paso por Radio Nacional de España, co programa La Viborona, dirixe o informativo Diario Cultural de Radio Galega, programa desde o que espallou a diario a actividade cultural de Galicia, incluíndo crítica especializada, monográficos e especiais.
A través deste espazo Ana Romaní participou na posta en marcha da publicación do libro "Narradio: 56 historias no ar" (2003); do Premio Diario Cultural de Teatro Radiofónico, que se outorga desde 2006 co obxectivo de recuperar textos dramáticos para a radio; e do proxecto "De Cantares hoxe: os Cantares Gallegos de Rosalía de Castro no século XXI".
Ana Romaní recibíu numerosos premios, entre os que destacan o Premio al Fomento de la Lectura, que lle outorgou a Federación de Gremio de Editores de España en 2007; o Premio Atlántida, do Gremi de Editors de Cataluña, en 2008; o Premio da Asociación de Escritoras e Escritores en Lingua Galega á ‘mellor xornalista cultural’ en 2012 e de poesía en 2011; e o Premio da III Gala do Libro Galego á traxectoria en xornalismo cultural en 2018.
A Biblioteca Central Rialeda adica unha exposición bibliográfica a Ana Romaní para dar a coñecer as súas obras e animar ás-aos súas-seus lectoras-es a que gocen delas.
 

Parabéns, Ana!!!

Ler conta moito e actividades infantís: 3 a 5 de outubro 2018

Todos os actos serán ás 18:30!!!

Biblioteca Pública Municipal Rosalía de Castro. (Santa Cruz)
Mércores 3 de outubro    
Para nenas-os a partir de 4 anos   Aforo completo!!!
CONTACONTOS: Pakolas
TÍTULO: “As parábolas de Pakolas”

Biblioteca Central Rialeda. (Perillo)
Xoves 4 de outubro
Para nenas-os a partir de 4 anos (imprescindible reservar praza, tlf.: 981 639 511)
CONTACONTOS: Raquel Queizás
TÍTULO: “Raposadas”

Biblioteca Pública Municipal Xograr Mendiño. (Lorbé)
Xoves 4 de outubro 
Para nenas-os a partir de 3 anos (imprescindible reservar praza, tlf.: 981 618 201)
CONTACONTOS: Pablísimo
TÍTULO: “O paroleiro”

Biblioteca Pública Municipal Mª José Trincado. (Mera)
Venres 5 de outubro
Para nenas-os a partir de 4 anos (imprescindible reservar praza, tlf.: 981 628 507)
MONITORADO: OQO
CONTACONTOS e OBRADOIRO: “Un OQO para a sopa”

Biblioteca Pública Municipal Ánxel Fole. (Nós)
Venres 5 de outubro
Para nenas-os de 1 a 3 anos (imprescindible reservar praza, tlf.: 981 664 257)
CONTACONTOS: Migallas
TÍTULO: “Contos do chupete”

Algúns destes actos están incluídos no programa

da Rede de Bibliotecas de Galicia

Recomendacións en Radioleiros: 28 setembro 2018

- Infantil (nenas-os a partir de 6 anos):
"Azadah" de Jacques Goldstyn. En Juventud.
Azadah, a protagonista, é unha nena que vive nun país no que se convive a diario coa guerra e a pobreza. Ata alí chega Anja, unha fotógrafa da ONU, da que se fai amiga. Cando Anja abandona o lugar, Azadah abatida,  prégalle que a leve con ela, porque añora vivir nun país no que poda cumprir os seus soños. Pero Anja sabe que por desgraza se necesitan permisos, o que non están ao alcance de ningunha delas. A lealdade e a forza de Azadah tena impresionada e regálalle a súa propia mochila: esta pequena equipaxe será suficiente para que con enxeño e determinación, Azadah consiga conquistar todo aquilo que arela.
 

- Mozas-os e adultas-os:
"Abril encantado" de Elizabeth von Arnim. Editado por Alfaguara.
O anuncio de aluguer dun pequeno castelo italiano amoblado durante o mes de abril que se publica no Times e ao cal responderán catro mulleres que viven en Londres pero que non se coñecen nin teñen nada en común como non sexa, aínda que algunha non o sabe, que a infelicidade reina nas súas vidas, será o detonante para que cada unha delas tome conciencia de que a súa función non se limita a “ser muller, nai ou filla de…”. Para ser felices teñen que comezar por sentirse ben consigo mesmas.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Ler conta moito e actividades infantís: 24 a 28 de setembro 2018

Todos os actos serán ás 18:30 agás a sesión na Biblioteca "Rosalía de Castro" (Santa Cruz) que terá lugar ás 17:30!!!

Biblioteca Pública Municipal Mª José Ruso. (Dorneda)
Luns 24 de setembro     
Para nenas-os a partir de 6 anos (imprescindible reservar praza, tlf.: 981 626 638)
MONITORADO: Teatro Babaluva
OBRADOIRO: “Obradoiro de ilustración”

 

Biblioteca Pública Municipal Manuel María. (Oleiros)
Martes 25 de setembro     
Para nenas-os a partir de 3 anos (imprescindible reservar praza, tlf.: 981 610 700)
CONTACONTOS: Carmen Domech
TÍTULO: “Orellas de trapo”

Biblioteca Pública Municipal Rosalía de Castro. (Santa Cruz)
Mércores 26 de setembro     
Para nenas-os a partir de 6 anos   Aforo completo!!!
MONITORADO: O faiado de Nin
OBRADOIRO: “Deseño de mochilas para lectoras-es”

Biblioteca Central Rialeda. (Perillo)
Xoves 27 de setembro 
Para nenas-os de 1 a 3 anos   Aforo completo!!!
CONTACONTOS: Pablo Díaz
TÍTULO: “Cantacontos para bebés”

Biblioteca Pública Municipal Xograr Mendiño. (Lorbé)
Xoves 27 de setembro  
Para nenas-os a partir de 3 anos (imprescindible reservar praza, tlf.: 981 618 201)
CONTACONTOS: Leo Leíño
TÍTULO: “A maxia de Mary Poppins”

Biblioteca Pública Municipal Mª José Trincado. (Mera) 
Venres 28 de setembro 
Para nenas-os a partir de 4 anos (imprescindible reservar praza, tlf.: 981 628 507)
CONTACONTOS: Migallas
TÍTULO: “Canta connosco!”

Biblioteca Pública Municipal Ánxel Fole. (Nós) 
Venres 28 de setembro
Para nenas-os a partir de 4 anos (imprescindible reservar praza, tlf.: 981 664 257)
CONTACONTOS: Tarabelos
TÍTULO: “Debulendo lendas... galegas”

Algúns destes actos están incluídos no programa

da Rede de Bibliotecas de Galicia

Recomendacións en Radioleiros: 21 setembro 2018

- Infantil:
"Dez dedos nas mans e dez dedas nos pés" de Mem Fox. Ilustracións de Helen Oxenbury. En Kalandraka.
Con frases curtas Mem Fox constrúe un relato para lembrarnos que todas-os somos iguais a pesar das apariencias externas. Con exemplos procedentes de diferentes zonas xeográficas, razas e sexos distintos e un ritmo propicio para a lectura ás-aos cativas-os, Fox tráenos esta mensaxe axudada polas magníficas ilustracións de Helen Oxenbury. Un texto perfecto para ler en voz alta cunhas imaxes moi expresivas que forman un conxunto do máis afortunado para estas primeiras idades.

- Mozas-os e adultas-os:
"Una vida prestada" de Berta Vias Mahou. Editado por Lumen.
Vias Mahou tráenos esta nova aportación ao mundo da novela biográfica co seu estilo característico e a calidade habitual. Nesta ocasión a escollida é Vivian Maier (1926-2009), fotógrafa norteamericana descoberta de xeito póstumo que traballou coidando nenas-os durante décadas en Nova Iorque e Chicago mentras facía fotos de xeito amateur que nunca deu a coñecer. O seu legado de arredor de 150.000 fotografías mostra a vida diaria dos barrios destas cidades a partir dos anos cincoenta até os oitenta, retratando persoas, animais, edificios, tendas, interiores de autobuses, cinemas, campañas políticas xunto a un feixe de autorretratos, sumando o que hoxe se considera unha das principais obras desta disciplina do século XX.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

37 sesións de actividades de promoción da lectura e Ler conta moito de setembro a decembro!!!

Unha tempada máis, as Bibliotecas Municipais de Oleiros organizan actividades de promoción da lectura dirixidas a nenas, nenos e adolescentes. Nos meses de setembro a decembro, nas sete bibliotecas municipais levaranse a cabo 37 sesións de diferentes actividades infantís para fomentar á lectura e animar a que as nenas, nenos e adolescentes visiten as bibliotecas no seu tempo libre. Xa que o aforo é limitado é imprescindible reservar praza na biblioteca en que se desenvolva cada unha das actividades, isto pode facerse chamando por teléfono ou achegándose persoalmente.
Realizarase a programación de Ler conta moito, de contacontos para nenos/as de 1 a 3 anos, da Hora do conto dirixida a partir de 3 anos e de diversos obradoiros para distintas idades.
Ler conta moito é un programa de dinamización da lectura nas bibliotecas públicas promovido pola Secretaría Xeral de Cultura da Xunta de Galicia, a través da Rede de Bibliotecas Públicas de Galicia e en colaboración coas Bibliotecas Municipais de Oleiros.
A hora do conto é unha actividade tradicional nas Bibliotecas Municipais de Oleiros na que se levan a cabo diferentes sesións de narración de contos dirixidos a nenas e nenos menores de 11 anos. Nárranse ou dramatízanse un ou varios contos, cun enfoque lúdico e unha vivencia activa e participativa cos libros, fomentando a creatividade, como unha invitación a viaxar a un mundo máxico de imaxinación e fantasía.
Tamén se levarán a cabo obradoiros de maxia, ilustración, realización de bolsas e mochilas,  deseño de superheroes ou superheroinas,  construción de pequenos foguetes espaciais, ecoloxía, libros ilustrados, como facer debuxos animados, etc.
Con todas estas actividades as nenas, nenos e adolescentes poderán fomentar a creatividade, divertirse e aprender con sinxelos experimentos, gozar e escoitar  cos contacontos ou entreterse con talleres de maxia.

Os obxectivos que se intentan conseguir son a promoción da lectura, pero tamén que os/as participantes se divirtan escoitando contos, facer novas lectoras e lectores ou consolidarlles este hábito, que descubran a diversidade dos libros e o pracer pola lectura e que vivan o libro en colectividade xunto con outras nenas e nenos.

Preténdese introducir ás nenas e aos nenos no mundo dos libros a través dunha lectura que poidan comprender, coa que gocen e se entreteñan. Tratarase de espertar unha sensibilidade que faga descubrir o pracer que pode proporcionar a lectura, que os nenos e as nenas vexan que tamén se divirten e pasan momentos agradables cos libros.
Poden solicitar a información en calquera das sete bibliotecas municipais, pero tamén se distribuirá nas escolas infantís e nos colexios públicos de ensinanza primaria de Oleiros.
Na semana do 17 ao 21 de setembro terán lugar as seguintes actividades:
 

Todos os actos serán ás 18:30 agás a sesión na Biblioteca "Mª José Trincado" de Mera que terá lugar ás 17:30!!!

 
Biblioteca Pública Municipal “Mª José Ruso”. Dorneda
Luns 17 de setembro, ás 18:30
Para nenas-os de 1 a 3 anos (imprescindible reservar praza, tlf.: 981 626 638)
CONTACONTOS: Migallas
TÍTULO: “Os contos do chupete”

Biblioteca Pública Municipal “Manuel María”. Oleiros
Martes 18 de setembro, ás 18:30
Para nenas-os a partir de 4 anos (imprescindible reservar praza, tlf.: 981 610 700)
CONTACONTOS: Elefante Elegante
TÍTULO: “O xigante”

Biblioteca Pública Municipal “Rosalía de Castro”. Santa Cruz
Mércores 19 de setembro, ás 18:30
Para nenas-os a partir de 4 anos (imprescindible reservar praza, tlf.: 981 626 338)     
MONITORADO: Leo Leíño 

OBRADOIRO: “Maxia e libriños”

Biblioteca Central Rialeda. Perillo
Xoves 20 de setembro, ás 18:30
Para nenas-os a partir de 4 anos  Aforo completo!!!     
ARTISTA: Paco Nogueiras
CONCERTO: “Radio Bulebule”

Biblioteca Pública Municipal "Xograr Mendiño". Lorbé
Xoves 20 de setembro, ás 18:30
Para nenas-os a partir de 4 anos (imprescindible reservar praza, tlf.: 981 618 201)     
CONTACONTOS: Pallaso Piruleta
TÍTULO: “A aventura máxica na biblioteca”

Biblioteca Pública Municipal "Mª José Trincado". Mera
Venres 21 de setembro, ás 17:30
Para nenas-os a partir de 6 anos (imprescindible reservar praza, tlf.: 981 628 507)     
MONITORADO: O faiado de Nin
OBRADOIRO: “Deseño de bolsas/mochilas para lectoras/es”

Biblioteca Pública Municipal "Ánxel Fole". Nós
Venres 21 de setembro, ás 18:30
Para nenas-os de 1 a 3 anos (imprescindible reservar praza, tlf.: 981 664 257)     
CONTACONTOS: Pablo Díaz
TÍTULO: “Cantacontos para bebés”

Algúns destes actos están incluídos

no programa da Rede de Bibliotecas de Galicia

Recomendacións en Radioleiros: 14 setembro 2018

- Infantil - xuvenil:
"Mi hermano persigue dinosaurios: la historia de Gio, un niño con un cromosoma de más" de Giacomo Mazzariol. Editado por Nube de tinta.
Este libro, que comezou sendo un video que o autor lle fixo ao seu irmán, foi tan viral que se converteu nun fenómeno instantáneo en Italia. O día que os seus pais lle anuncian a Giacomo que ía ter un irmán foi moi especial, pero cando naceu Giovanni (Gio) e escoitou as palabras “síndrome de Down”, todo foi decepción. O libro trata da loita persoal do autor para superar a vergoña inicial. De como se deixou contaxiar pola vitalidade de Giovanni ata converterse no seu mellor amigo. Un amigo ao que lle encantan os dinosauros, a cor vermella e que ten un sorriso máis ancho que os seus lentes.
 

- Mozas-os e adultas-os:
"Blues para Moraima" de Miguel Anxo Fernández. En Galaxia.
Segundo palabras do propio autor, “Blues para Moraima” é unha novela na que se mestura o thriller político e a memoria histórica, xa que transcorre en dous mundos: un centrado na guerra civil española, a diáspora e o exilio e outro que conta a historia dun vello cineasta exiliado que nos anos 80 regresa a España para traballar nunha serie sobre a memoria histórica e que dá pé a toda a trama posterior. Grazas aos diferentes puntos de vista,“Blues para Moraima" constitúe un percorrido intelixente e efectivo polo noso pasado ao son de blues e con intrigas do mellor thriller.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Recomendacións en Radioleiros: 7 setembro 2018

- Infantil (menores de 6 anos):
"O un era Xoán: un libro para contar" de Maurice Sendak; versión de Xosé Ballesteros. En Kalandraka.
Orixinal libro sobre os números no que do un ao dez vanse sumando personaxes e acontecementos. Publicado orixinariamente no 1962, parte da lectura como algo individual no que Xoán e varios personaxes animais (rato, gato, can, tartaruga… ) xúntanse nun xogo numérico e visual. Un libro con moi pouco texto para as-os máis novas-os e tamén para todos os demáis.
 

- Mozas-os e adultas-os:
"El monarca de las sombras" de Javier Cercas. Editado por Random House.
Da man do sempre interesante Javier Cercas, un novo libro que xunta a investigación histórica e a literatura na figura do seu tío avó Manuel Cercas. Un protagonista da Guerra Civil, voluntario do bando sublevado nun pequeno pobo extremeño e morto na batalla do Ebro, que foi sempre unha persoa lembrada na familia e á vez, un episodio a superar. Un texto de grande calidade humana.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Recomendacións en Radioleiros: 31 agosto 2018

- Infantil - xuvenil:
"As terapias da doutora Ledicia" de Raquel Castro. Ilustracións de Almudena Aparicio. Editado por Galaxia.
Esta obra de teatro infantil desenvólvese na consulta da psicóloga Ledicia, quen axudada por Carolina, atenden con afán e agarimo os conflitos persoais das-dos estrafalarias-os e divertidas-os personaxes que acoden á súa consulta para unha sesión de risoterapia. O Home do Saco, o Apalpador, o Lobishome ou as tres Marías conformarán o plantel das-dos doentes da doutora. Unha hilarante comedia na que se recrea o poder curativo da alegría.   

- Mozas-os e adultas-os:
"Entre cielo y tierra" de J.K. Stefánsson. En Salamandra.
Primeiro volume da triloxía “do rapaz”. Ambientada en pequenas aldeas do oeste de Islandia narra a historia dos seus mariñeiros a principios do século XX. A tristura pola perda dun ser querido e o poder de superación serán os seus argumentos principais xunto coas reflexións sobre a vida e a morte. Unha linguaxe traballada e moi rica en imaxes e metáforas para describir unha climatoloxía dura e implacable.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Recomendacións en Radioleiros: 24 agosto 2018

- Infantil (nenas-os a partir de 6 anos):
"Grazas!" texto de Charo Pita. Ilustracións de Anuska Allepuz. Editado por La Fragantina.
Un fermoso álbum ilustrado no que unha nena lle fai preguntas a súa avoa para as que ela non ten resposta:
Por que o mar se detén na area e non traga coa súa boca de auga a vila enteira?
Que sostén á lúa para que non caia do ceo?
Quen pinta as nubes?
Quen abre o foco do sol?... A avoa descoñece as respostas pero si sabe que a natureza é fermosa e marabillosa e que a debemos coidar, respectar e agradecer por poder desfrutala.
Un delicioso conto, cunhas atractivas ilustracións, que nos presenta a excelente relación dunha avoa e a súa neta, a sabedoría das-dos maiores e o agradecemento que lles debemos por todo o que nos dan. Unha obra que fala da gratitude.
Un estupendo libro para ler en familia, observar, gozar e compartir.
- Mozas-os e adultas-os:
"Néctar en un tamiz" de Kamala Markandaya. En Ediciones del Viento.
Está considerada unha obra clásica contemporánea sobre a vida rural da India e é obxecto de análise en colexios e universidades inglesas e americanas.
Narrada en primeira persoa por Rukmani, unha muller campesiña, que conta a historia da súa vida como unha loita pola supervivencia na India rural nos últimos anos da ocupación inglesa. Ela era a cuarta filla dunha familia na que despois de casar ás tres irmás, para ela non quedou unha boa dote e tiveron que organizarlle un casamento por debaixo da súa posición social. Casárona cun agricultor pobre que traballaba terras arrendadas. Ao longo da novela vai narrando a súa vida de casada.
Utiliza un estilo que semella sinxelo porque a narradora é unha muller con poucos estudos, pero, en realidade, está moi traballado. Presenta diversos problemas fundamentais para as persoas: a propiedade da terra, a loita contra as inclemencias do tempo, o maltrato á natureza co conseguinte deterioro do medio ambiente, que para ela vai unido a unha degradación da vida do seres humanos e o contraste da vida rural coa da cidade como un escenario deshumanizado.
É a ollada dunha autora hindú, pertencente a unha casta superior, nacida a principios do século XX, que presenta a forma de vida dunha familia da India de poucos recursos, as súas tradicións, costumes, pero que non as cuestiona. Unha muller marcada polo contexto histórico que viviu (dominación inglesa, independencia da India), as relacións entre a cultura inglesa e a hindú, pero sobre todo critica a chamada modernización do país e a destrución do medio ambiente.
Unha obra moi interesante para todas as persoas que queiran coñecer como era a vida rural na India, a mediados do século XX,  principalmente a das familias que non eran propietarias das súas terras. Unha historia de superación persoal e de canto á esperanza e á loita por sobrevivir nun mundo adverso.

 
Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas