Recomendacións en Radioleiros: 7 xuño 2019

- Infantil (menos de 6 anos):

Monstros na escuridade, de Kalle Güettler, Rakel Helmsdal e Áslaug Jónsdóttir
Sushi Books

Este conto forma parte da colección na que os protagonistas sempre son Monstro Grande e Monstro Pequeno. Son historias que poden axudar aos máis pequenos e pequenas a xestionar ou identificar certas emocións ou sentimentos que ás veces non entenden.

Monstro Pequeno está só na casa e de súpeto escoita un ruído no tellado. Empeza a imaxinarse as peores situacións: uns malvados ladróns, unha fera salvaxe, serpes, arañas... ai!!... e el soíño na casa!! Óense uns petos na porta e cando vai ver ponse contentísimo porque é o seu amigo Monstro Grande... que ben! El non ten medo a nada. Ata que escoitan un grande estrondo na ventá e ven... un Ogro!!

- Mozas/os e adultas/os:

La ciudad blanca, de Karolina Ramqvist
Anagrama

Un thriller psicolóxico que é o retrato dunha muller desesperada.

Karin era a muller de John, un home que se adicaba a negocios turbios. Ao seu lado levaba unha vida luxosa e despreocupada. Acababan de ser pais da pequena Dream cando John desaparece, e con el desaparecera tamén esa vida de excesos. As autoridades informárona de que en poucos días todos os seus bens, mesmo a casa na que vivía coa súa bebé, serían confiscados. Todos os antigos compinches de John que creía amigos danlle a espalda e néganlle todo tipo de axuda.

Enfrentámonos a unha historia na que, por riba de todo, o que prevalece é a soidade e o desamparo.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.