Recomendacións en Radioleiros: 28 febreiro 2020

- Infantil (de 2 a 6 anos):

El monstruo de colores va al cole, de Anna Llenas
Flamboyant

Anna Llenas escribiu co mesmo personaxe El monstruo de colores e El monstruo de colores va al cole.

El monstruo de colores foi o primeiro álbum que asinou como autora e ilustradora e é un dos principais libros cos que se traballa a educación emocional (alegría, tristeza, ira, nerviosismo, etc.) nas nenas e nenos máis pequenos.

O monstro de cores é un simpático monstro que lle gusta ao público infantil, que cambia de cor en función das emocións. Se está tranquilo adquire a cor verde, se está contento ponse amarelo, etc.

No título que recomendamos, ao principio o monstro está de cor verde porque está en calma pero unha nena chamada Nuna dille que hoxe vai ser o seu primeiro día de colexio, polo que o monstro vólvese de todas as cores, debido a que esta acción provócalle nerviosismo, medo, alegría, etc. Que será iso do cole?, pregúntase.

Nuna acompáñao e móstralle a súa clase. O monstro agáchase detrás dunha cortina. Vai cambiando ao presentarlle os compañeiros e compañeiras, ir a clase de música, saír ao patio, xantar, etc. O cole non está tan mal e o monstro pasouno ben, está alegre polo que o vemos de cor amarela.

Obra ideal para ler e mostrar aos máis pequenos, principalmente ao comezar o cole ou se non lles gusta moito. Se os nenos e nenas xa coñecen o primeiro libro, mellor, porque así vanse fixando de que cor está o monstro. No caso de que non o coñezan é necesario explicarlles o que lle vai acontecendo, o motivo polo cal vai cambiando de cores.

- Mozas/os e adultas/os:

La mujer del pelo rojo, de Orhan Pamuk
Penguin Randon House

Orhan Pamuk foi Premio Nobel de Literatura no ano 2006.

Tráxica novela contemporánea que explora temas como a culpa, o desexo e a paternidade baixo mitos e lendas que chegaron ata os nosos días.

Nos arredores de Istambul, un mestre poceiro e un aprendiz novo son contratados para atopar auga nun terreo bastante estéril. Mentres escavan sen sorte, nace entre eles un vínculo case paterno-filial, unha dependencia mutua que se ve alterada cando o adolescente se namora dunha misteriosa muller de pelo vermello que é moito maior ca el. Sinte por ela unha gran atracción, síguea ata que descobre que é actriz dun grupo de teatro que está de paso e comparte con ela unha noite de amor. Será un primeiro amor que marcará o resto dos seus días.

Volve ao traballo. Están a 25 metros de profundidade e seguen sen atopar auga, pero un descoido do mozo fai que o poceiro teña un accidente no fondo do pozo. Cem (o mozo), desesperado busca axuda, pero como non a atopa, marcha abandonando a Mahmut (o poceiro) no fondo do pozo. Non sabe se só está ferido ou se xa está morto. Escapa para a capital. Anos despois, está xa casado e cun negocio inmobiliario, pero segue arrastrando a culpa de deixar abandonado o poceiro...

Segundo imos lendo esta historia veremos como se vai transformando e cambiando Turquía.

Unha obra de amor e misterio na que se mestura a intriga, a fábula e a traxedia e profundiza en temas como a familia ou a figura paterna.

Segundo o Financial Times “promove que sempre debemos interrogar polo pasado, pero nunca negalo ou enterralo”.

Cunha escritura maxistral, como nos ten acostumados este autor, esta novela atrapa ao lector ou lectora e reafirma a Pamuk como un dos grandes escritores da actualidade.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.