Bibloleiros

6/10/23

Recomendacións en Radioleiros: 6 outubro 2023

- Infantil (menores de 6 anos):

Monstr3s, con textos de Laura Parrula e ilustracións de Óscar Villán
Patasdepeixe

Como cada noite chega a hora de durmir e o neno pide deixar a luz acesa do dormitorio porque ten medo do monstro de debaixo da cama...

- Mocidade e persoas adultas:

A muller xabaril, de Fina Casalderrey
Xerais

Versión dixital en Galiciale

Fina Casalderrey novelou a historia de Adelina, unha muller que viviu a principios do século XX na aldea pontevedresa de Santa María de Xeve.
A autora define esta obra como unha novela con algunhas migallas de verdade porque a muller xabaril, tal e como acredita a fotografía que incluíu na novela, existiu de veras.
Iremos coñecendo quen foi esta estrafalaria muller e a durísima historia que ten detrás a través de Ramiro, un mestre de matemáticas xubilado que a coñeceu cando era neno.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

5/10/23

Ler para saber: charlas de divulgación científica na Biblioteca Central Rialeda (Perillo)

Comezamos de novo coa programación de “Ler para saber: charlas de divulgación científica” para os meses de outubro e novembro. Serán tres charlas sobre temas científicos dirixidas a nenas e nenos (a partir de 10 anos de idade), adolescentes e público en xeral, que terán lugar na Biblioteca Central Rialeda (Perillo), os venres 6 e 27 de outubro e o 10 de novembro, ás 18:30 horas.

Os obxectivos que se pretenden conseguir son: achegar a ciencia a todas as persoas, ampliar os coñecementos sobre temas científicos de importancia na vida diaria, fomentar o coñecemento específico dunha materia determinada, dinamizar os fondos bibliográficos sobre estes temas, atraer á biblioteca a un público interesado pola ciencia e, en definitiva, fomentar a lectura e a consulta de libros que traten estas temáticas.

Programáronse charlas ou obradoiros sobre aspectos diferentes para atraer a un público de gustos diversos e variados:

- 6 de outubro

Os microorganismos e as microalgas

Seleccionamos para ti títulos relacionados con este tema. Preme na ligazón.

Carmen Rioboo Blanco. Profesora de Microbioloxía na Universidade da Coruña

- 27 de outubro

Alimentación saudable na idade escolar

Uxía Rodríguez Lavandeira. Dietista e nutricionista no Hospital da Coruña (CHUAC)

- 10 de novembro

Árbores e arbustos do xardín da Biblioteca Rialeda

Miguel Sánchez. Fotógrafo

Fina Mosquera. Profesora de Educación Primaria

Desde a biblioteca Rialeda invítase a todas as persoas que desexen asistir.

3/10/23

Tertulias Literarias en Rialeda: ábrese a inscrición o 4 de outubro ás 8:30 h.

Clubs de lectura e Tertulias literarias para a mocidade e persoas adultas na Biblioteca Central Rialeda (Perillo): inscrición o día 4 de outubro, a partir das 8:30 h.

Nos clubs de lectura realízase o comentario de obras de distintos xéneros literarios, principalmente narrativa, nun ambiente de familiaridade, procurando o lado formativo e, á vez, lúdico da lectura.

O principal obxectivo é animar a ler lendo, gozar da literatura como un desenvolvemento da capacidade de creación e comunicación a través da lectura, de maneira que compartindo ideas, reflexionando sobre temas diversos poidamos enriquecernos cos diferentes puntos de vista.

Nas bibliotecas municipais de Oleiros organizaranse seis clubs de lectura: dous na Biblioteca Municipal Rosalía de Castro (Santa Cruz) con 38 prazas, dous tamén na Biblioteca Municipal Mª José Trincado (Mera) con 30 prazas e outros dous na Biblioteca Central Rialeda (Perillo) con 38 prazas. En total ofértanse 106 prazas.

Poderán inscribirse todas as persoas maiores de 18 anos que desexen participar. Quen queiran asistir deberán ser socias dalgunha biblioteca da Rede de Bibliotecas Públicas de Galicia para poder levar os libros en préstamo a domicilio.

Como inscribirse:

- Presencialmente na Biblioteca Central Rialeda (Perillo).

- Por teléfono (981 639 511) a partir das 8:30 h. o día 4 de outubro e no horario da biblioteca os demais días (De luns a venres de 8:15 a 21 h. Sábados das 10 ás 14 h.)

- A través de Internet, na ligazón https://t.ly/oa2MZ

38 prazas por orde de inscrición distribuídas en 2 grupos de 19 persoas cada grupo.

As persoas solicitantes sen praza formarán parte dunha listaxe de agarda.

As sesións celébranse os mércores quincenalmente, ás 17:30 h.

A duración da actividade é de 120 minutos.

A presentación e primeira sesión do grupo A será o mércores 18 de outubro e do grupo B o mércores 25 de outubro, ambas ás 17:30 h.

Ao longo dos meses iranse prestando aos participantes diferentes libros de autoras e autores da literatura galega, española e internacional, por este motivo é totalmente imprescindible que as persoas interesadas en participar se inscriban para ter praza e poder ter dispoñibles os exemplares necesarios de cada título.

29/9/23

Ler conta moito, Obradoiros e a Hora do conto: de 2 a 6 de outubro de 2023

- Aforo limitado: chama á biblioteca na que se realiza a actividade e reserva a túa praza.
Podes inscribirte desde 10 días antes da data de realización de cada unha das mesmas.

Biblioteca Municipal Mª José Ruso (Dorneda)
Luns 2 de outubro, ás 17:30
Para nenas-os a partir de 6 anos Aforo completo!!!
OBRADOIRO: “Escape room na biblioteca”
MONITORADO: Antía Yáñez

Biblioteca Municipal Manuel María (Oleiros)
Martes 3 de outubro, ás 18:30
Para nenas-os a partir de 5 anos (Imprescindible reservar praza, tlf.: 981 610 700)
TÍTULO: “Radio Bulebule”
CONTACONTOS: Paco Nogueiras

Biblioteca Municipal Rosalía de Castro (Santa Cruz)
Mércores 4 de outubro, ás 18:30
Para nenas-os a partir de 5 anos (Imprescindible reservar praza, tlf.: 981 626 338)
TÍTULO: “A igualdade non ten idade”
CONTACONTOS: Luis Vallecillo

Biblioteca Municipal Xograr Mendiño (Lorbé)
Xoves 5 de outubro, ás 18:30
Para nenas-os a partir de 5 anos (Imprescindible reservar praza, tlf.: 981 618 201)
TÍTULO: “Habelas hainas”
CONTACONTOS: Leo Leíño

Biblioteca Central Rialeda (Perillo)
Xoves 5 de outubro, 17:30 e 18:45
Para nenas-os a partir de 6 anos Aforo completo!!!
OBRADOIRO: “Robótica educativa. Creatividade inspiradora”
MONITORADO: A Nube de Artear

Biblioteca Municipal Ánxel Fole (Nós)
Venres 6 de outubro, ás 18:30
Para nenas-os a partir de 5 anos Aforo completo!!!
TÍTULO: “Ramona Órbita, a dona do tempo”
CONTACONTOS: Pakolas

Biblioteca Municipal Mª José Trincado (Mera)
Venres 6 de outubro, ás 18:30
Para nenas-os de 5 anos en adiante (Imprescindible reservar praza, tlf.: 981 628 507)
TÍTULO: “Contando números, cantando cores”
CONTACONTOS: Pablo Díaz

AVISO

A-o adulta-o responsable de cada menor de idade deberá permanecer necesariamente no recinto da biblioteca ata que remate a actividade e recolla a-o nena-o.

Recomendacións en Radioleiros: 29 setembro 2023

- Infantil (a partir de 8 anos):

"O meu baleiro" de Marcos Viso. Editado por Hércules.

Un album ilustrado recomendado para traballar a sensación de abandono coas nenas e nenos, rexeitamento e sinais de dó que están presentes en deteminados momentos, relacionados coa perda dun obxecto, dunha mascota ou a perda dun ser querido.

- Mocidade e persoas adultas:

"La dependienta" de Sayaka Murata. En Duomo.

Versión dixital en eBiblio

Keiko é unha muller con serias dificultades para as relacións sociais, que atopou a súa estabilidade económica nunha tenda tipo "24 horas", onde é empregada modelo. Keiko ten 36 anos e segue solteira, a súa familia e amizades non paran de criticala porque a súa vida non se axusta ao modelo que a sociedade esixe. A novela reflicte e critica o actual modelo de sociedade e forma de pensar xaponés, que se pode facer extensible a moitos outros países do mundo.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

28/9/23

Parabéns, Yolanda Castaño!!!

Yolanda Castaño foi galardoada co Premio Nacional de Poesía 2023 do Ministerio de Cultura y Deporte, pola súa obra "Materia". Xa obtivo con "Materia" o Premio da Crítica Española 2022 ao mellor libro de poesía en galego

O xurado destacou a súa obra “pola poderosa proposta poética na que cada estado da materia se expresa nun ton propio, con poemas dunha metafísica doente e orixinal, que apunta tanto á vangarda como á orixe cunha extraordinaria forza evocativa e sensorial”.

Tamén sinalou que en "Materia", Yolanda Castaño "amosa unha poesía metafórica que dialoga coa memoria persoal e colectiva, á vez, directa, radical e feminista. Explora, de forma non complacente, temas como a maternidade, a familia e os costumes e logra sacar a realidade da súa nebulosa habitual para concretala en materia lingüística, destacando o xogo verbal e rítmico que cuestiona o establecido”. Yolanda Castaño é licenciada en Filoloxía Hispánica pola Universidade de A Coruña, onde tamén realizou estudos audiovisuais. A poeta iniciou a súa andaina literaria a mediados dos noventa, cando publicou poemas soltos e a súa obra debut, "Elevar as pálpebras" (1995). Posteriormente lanzou "Delicia" e "Vivimos no ciclo das erofanías" (1998). "O libro da egoísta" (2003), "Profundidade de campo" (2007) ou "A segunda lingua" (2014) son algúns dos seus títulos.

Máis alló da súa actividade poética, Castaño traballou como xestora cultural independente, chegando a crear a súa propia Residencia para escritoras-es en Galicia. Desde 2009 dirixe festivais, obradoiros de tradución poética e un ciclo mensual de recitais con poetas galegas-os e internacionais.

Nas bibliotecas municipais de Oleiros contamos en numerosas ocasións coa presenza de Yolanda Castaño: no programa de actividades de promoción da lectura que Bibloleiros organiza todos os anos para os centros de ensino do concello co seu "Espectáculo poético visual" e o "Contacontos en verso". O seu libro "Verdedades", ilustrado por Xosé Tomás, foi suxestión de lectura no programa Recomendacións en Radioleiros. Foi a biógrafa de Xela Arias na obra titulada "Xela quixo ser ela: biografía de Xela Arias", presentado no Teatro As Torres (Santa Cruz) en maio de 2021.

Lévate en préstamo os libros de Yolanda que temos ao teu dispor no vestíbulo da Biblioteca Central Rialeda (Perillo).

Parabéns, Yolanda Castaño!!!

26/9/23

Tertulias Literarias en Mera: ábrese a inscrición o 3 de outubro ás 16:00

Clubs de lectura e Tertulias literarias na Biblioteca Pública Municipal Mª José Trincado (Mera): inscrición a partir do día 3 de outubro, ás 16 horas.

Como inscribirse:

- Persoalmente na Biblioteca Pública Municipal Mª José Trincado de Mera.

- Por teléfono (981 628 507) no horario da biblioteca: luns, de 16:30 a 20 h e de martes a venres de 16 a 20 h.

Serán 30 prazas, distribuídas en 2 grupos de 15 persoas cada grupo.

Poderán apuntarse todas as persoas maiores de 18 anos que desexen participar.

As-os solicitantes sen praza formarán parte dunha listaxe de agarda.

As sesións celebraranse mensualmente os luns (un luns un grupo e outro luns o outro grupo), ás 19 h.

A duración da actividade é de 90 minutos.

A presentación e primeira sesión do grupo A será o luns 16 de outubro e do grupo B o luns 30 de outubro, ambas ás 19 h.

Comentaranse obras de distintos xéneros literarios, principalmente narrativa contemporánea, pero tamén se le poesía, teatro e ensaio, nun ambiente de familiaridade, procurando o lado formativo e á vez, lúdico da lectura.

Ao longo dos meses iranse prestando ás persoas participantes diferentes libros de autoras e autores da literatura galega, española e internacional, por este motivo é totalmente imprescindible que as-os interesadas-os en participar se inscriban nalgunha das tres bibliotecas, para ter praza e poder ter dispoñibles os exemplares necesarios de cada título.

22/9/23

Ler conta moito, Obradoiros e a Hora do conto: de 26 a 29 de setembro de 2023

- Aforo limitado: chama á biblioteca na que se realiza a actividade e reserva a túa praza.

Podes inscribirte desde 10 días antes da data de realización de cada unha das mesmas.

Biblioteca Municipal Manuel María (Oleiros)

Martes 26 de setembro, ás 18:30

Para nenas-os a partir de 5 anos (Imprescindible reservar praza, tlf.: 981 610 700)

TÍTULO: “Maxia de aquí e de acolá”

CONTACONTOS: David Méndez

Biblioteca Municipal Rosalía de Castro (Santa Cruz)

Mércores 27 de setembro, ás 17:30

Para nenas-os a partir de 6 anos Aforo completo!!!

OBRADOIRO: “Autos tolos: robótica creativa”

MONITORADO: Leader Dreams

Biblioteca Municipal Xograr Mendiño (Lorbé)

Xoves 28 de setembro, ás 18:30

Para nenas-os a partir de 5 anos (Imprescindible reservar praza, tlf.: 981 618 201)

TÍTULO: “Nova maxia pata todxs”

CONTACONTOS: Pedro Bugarín

Biblioteca Central Rialeda (Perillo)

Xoves 28 de setembro, ás 18:30

Para nenas-os de 2 a 4 anos Aforo completo!!!

TÍTULO: “Cinco ratiños de conto”

CONTACONTOS: Migallas Teatro

Biblioteca Municipal Ánxel Fole (Nós)

Venres 29 de setembro, ás 18:30

Para nenas-os de 2 a 4 anos Aforo completo!!!

TÍTULO: “Princesos e principetas”

CONTACONTOS: Raquel Galavís

Biblioteca Municipal Mª José Trincado (Mera)

Venres 29 de setembro, ás 18:30

Para nenas-os de 5 anos en adiante (Imprescindible reservar praza, tlf.: 981 628 507)

TÍTULO: “O león azul”

CONTACONTOS: Trécola Teatro

AVISO

A-o adulta-o responsable de cada menor de idade deberá permanecer necesariamente no recinto da biblioteca ata que remate a actividade e recolla a-o nena-o.

Tertulias Literarias en Santa Cruz: ábrese a inscrición o 26 de setembro ás 10:00 h.

Tertulias Literarias na Biblioteca Municipal Rosalía de Castro (Santa Cruz): inscrición a partir do 26 de setembro ás 10 h.

Como inscribirse:

- Persoalmente na Biblioteca Municipal Rosalía de Castro (Santa Cruz).

- Por teléfono (981 626 338) no horario da biblioteca (Mañáns: martes a venres de 9:45 a 13:00 h. Tardes: luns a venres de 16 a 20 h.; primeiro e terceiro sábado de mes de 10 a 14 h.)

- A través de Internet, na ligazón https://xurl.es/6smj4

38 prazas por orde de inscrición distribuídas en 2 grupos de 19.

As-os solicitantes sen praza formarán parte dunha lista de agarda.

As sesións celébranse os martes quincenalmente ás 17:30 h.

A duración da actividade é de 90 minutos.

O día da presentación será o martes 17 de outubro ás 17:30 h. para os dous grupos

Non se admitirán solicitudes previas á data sinalada.

Poden inscribirse todas-os as-os maiores de 18 anos que desexen participar.

A actividade remata no mes de xuño de 2024.

Recomendacións en Radioleiros: 22 setembro 2023

- Infantil (de 6 a 8 anos):

"Si vienes a la tierra" de Sophie Blackall. En Anaya.

Imaxina que tes que convencer a un extraterrestre para que veña visitar a Terra. Que destacarías do noso planeta para que lle parecese un sitio digno de ser visitado? Quinn, o noso protagonista, teno moi claro. O neno escribe unha invitación na que conta todo o que para el é importante que se coñeza da Terra. Todo aquilo que a fai única e diferente. Estamos ante unha potente mensaxe de diversidade e de unión que nos lembra que xuntas e xuntos temos o deber de coidar o planeta, porque llo debemos por ser o noso fogar.

- Mocidade e persoas adultas:

"O que non sabías" de Elba Pedrosa. Editado por Xerais.

Versión dixital en GaliciaLe

Narra a historia dunha familia galega que garda segredos do pasado. Segredos que se van herdando de xeración en xeración e que acaban por saír á luz grazas aos dous protagonistas, Marisa e o seu fillo, Roberto, que será o narrador. Tras a desaparición do pai, no mar, a vida desta familia cambiará totalmente. Marisa intentará atopar a liberdade para poder ser ela mesma nunha sociedade que a asfixia.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

21/9/23

Zorionak, Patxi Zubizarreta!!!

Francisco Javier Zubizarreta Dorronsoro (Patxi Zubizarreta) foi galardoado co Premio Nacional de Literatura Infantil y Juvenil 2023 do Ministerio de Cultura y Deporte, pola súa obra ‘Zerria’.

O xurado destacou “a excepcional calidade narrativa e a potencia desafiante do relato con descricións hipnóticas que reflexionan sobre a condición humana. A mestría dun relato capaz de remover e conmover a nosa conciencia, a nosa memoria e o noso presente”. Tamén sinalou que “Patxi Zubizarreta, coa súa exquisita delicadeza e elegante escritura consegue atopar a beleza na ferida e convirte a literatura para público xuvenil nunha pedra preciosa”.

Patxi Zubizarreta di que "o mundo que vivimos é moi superficial e cre que a literatura e a arte, en xeral, convídannos a atoparnos cun mesmo, con ese ser que non coñecemos. Cada un leva no seu interior a un estraño, un forasteiro. O labor da nosa vida debería ser reencontrarnos con el".

Lévate en préstamo os libros de Patxi Zubizarreta que temos ao teu dispor na sala infantil-xuvenil da Biblioteca Central Rialeda (Perillo).

Zorionak, Patxi Zubizarreta!!!

18/9/23

Ler conta moito, Obradoiros e a Hora do conto: de 19 a 22 de setembro de 2023

- Aforo limitado: chama á biblioteca na que se realiza a actividade e reserva a túa praza.

Podes inscribirte desde 10 días antes da data de realización de cada unha das mesmas.

Biblioteca Municipal Manuel María (Oleiros)

Martes 19 de setembro, ás 17:30

Para nenas-os a partir de 6 anos (Imprescindible reservar praza, tlf.: 981 610 700)

OBRADOIRO: “Coas as mans na masa”

MONITORADO: OQO

Biblioteca Municipal Rosalía de Castro (Santa Cruz)

Mércores 20 de setembro, ás 18:30

Para nenas-os a partir de 5 anos Aforo completo!!!

TÍTULO: “Maxia tola e lectora”

CONTACONTOS: Leo Leíño

Biblioteca Municipal Xograr Mendiño (Lorbé)

Xoves 21 de setembro, ás 18:30

Para nenas-os a partir de 5 anos Aforo completo!!!

TÍTULO: “Brinca vai! De aquí a acolá”

CONTACONTOS: Paco Nogueiras

Biblioteca Municipal Ánxel Fole (Nós)

Venres 22 de setembro, ás 18:30

Para nenas-os a partir de 5 anos Aforo completo!!!

TÍTULO: “Nova maxia para todxs”

CONTACONTOS: Pedro Bugarín

Biblioteca Municipal Mª José Trincado (Mera)

Venres 22 de setembro, ás 18:30

Para nenas-os de 2 a 4 anos (Imprescindible reservar praza, tlf.: 981 628 507)

TÍTULO: “Cinco ratiños de conto”

CONTACONTOS: Migallas Teatro

AVISO

A-o adulta-o responsable de cada menor de idade deberá permanecer necesariamente no recinto da biblioteca ata que remate a actividade e recolla a-o nena-o.

Parabéns, Paula Carballeira!!!

Paula Carballeira foi galardoada co Premio Nacional de Literatura Dramática 2023, pola obra ‘As alumnas’, a proposta do xurado reunido a tal efecto. O premio é concedido polo Ministerio de Cultura y Deporte. O xurado destacou a obra da autora galega “por ser un eloxio do maxisterio que ensina sobre a dúbida e o debate. Polos seus valores dramáticos, a riqueza de matices e pola recuperación dunha muller referente para a ensinanza galega, símbolo da educación moderna, igualitaria e transformadora que propuña a II República”. Puxo tamén de relevo como “a autora, a través dunha investigación rigorosa, propón ao público un texto que homenaxea a todas-os mestras-es e ao modelo de escola laica, libre e dunha pedagoxía avanzada”.

A escritora, actriz, narradora oral e contacontos Paula Carballeira é moi coñecida para o público infantil-xuvenil e adulto das bibliotecas municipais de Oleiros. Tanto nas sesións da hora do conto como nas da campaña de promoción da lectura para os centros de ensino do Concello de Oleiros, son abondosas as horas de goce coas historias e o estilo propio de narrar de Paula. Algún dos seus libros foi tamén recomendado nas suxestións de Radioleiros. Lévate en préstamo os libros de Paula que temos ao teu dispor na sala infantil-xuvenil da Biblioteca Central Rialeda (Perillo).

Parabéns, Paula Carballeira!

50 sesións de setembro a decembro de 2023!!! Ler conta moito, Obradoiros e Hora do conto en Bibloleiros

De setembro a decembro de 2023, nas sete Bibliotecas Municipais de Oleiros levaranse a cabo 50 sesións de diferentes actividades infantís: contacontos, concertos de música, sesións de maxia, obradoiros de robótica e de arte, etc. para fomentar a lectura e animar a que as nenas e nenos visiten as Bibliotecas Municipais de Oleiros no seu tempo de lecer. As actividades de promoción da lectura están dirixidas a nenas e nenos de 2 a 4 anos, crianzas a partir de 5 anos e obradoiros para as pequenas-os de 6 anos en adiante. As sesións da Hora do conto serán ás 18:30 e os Obradoiros realizaranse ás 17:30. Narración ou dramatización dunha ou varias historias, música, maxia e outros espectáculos vanse poñer en escena para atraer á lectura ao público infantil. Todos os actos terán un enfoque lúdico, fomentando a imaxinación e a creatividade, como unha invitación a viaxar a un tempo máxico de ilusión e fantasía.
Xa que o aforo é limitado é imprescindible reservar praza na biblioteca en que se desenvolva cada unha das actividades. Isto pode facerse chamando por teléfono ou achegándose persoalmente. Poderanse inscribir desde dez días antes da data de realización. Contarase con compañías como Migallas, Trinketrinke, Trémola ou Pavís Pavós. Contadoras-res como Charo Pita, Ramiro Neira, Tarabelos, Chus Álvarez, Paula Carballeira, Raquel Galavís e David Méndez. Obradoiros a cargo de A Nube de Artear, Colectivo Mirlotil, Leader dreams, Antía Yáñez e OQO. Artistas como Pablo Díaz, Paco Nogueiras, Luis Vallecillo, Fran Amil e Pakolas. Teremos maxia con Leo Leíño e Pedro Bugarín.
Ler conta moito é un programa de dinamización da lectura nas bibliotecas públicas promovido pola Secretaría Xeral de Cultura da Xunta de Galicia, a través da Rede de Bibliotecas Públicas de Galicia e en colaboración coas Bibliotecas Municipais de Oleiros. Planificáronse outras actividades exclusivamente municipais para completar a programación destes meses. Os obxectivos que se intentan conseguir son fomentar a lectura a través do pracer e o gusto por esta, que se divirtan escoitando contos, facer novas lectoras e lectores ou consolidarlles este hábito e promover o descubrimento da diversidade dos libros. Preténdese introducir as crianzas no mundo dos libros a través dunha lectura que poidan comprender, coa que gocen e se entreteñan. Tratarase de espertar a sensibilidade que faga descubrir o pracer que pode proporcionar a lectura, para que vexan que tamén se divirten e pasan momentos agradables cos libros. Poden solicitar a información en calquera das sete bibliotecas municipais e nesta ligazón.

15/9/23

Recomendacións en Radioleiros: 15 setembro 2023

- Infantil (a partir de 6 anos):

"Brunilda y Bruno: el festival de brujas" de Valerie Thomas, ilustrado por Korky Paul. Editado por Blume.

Brunilda e o seu gato Bruno asisten, como cada ano, ao Festival Internacional de Bruxas. Alí as bruxas bailan, cantan, xogan, comen pratos deliciosos e tamén aprenden novos feitizos.

Pásano tan ben no festival que, xa de volta a casa, deciden facer unha visita a todas as novas amigas que fixeron e que viven en lugares asombrosos.

- Mocidade e persoas adultas:

"Non temerás os coches amarelos" de Marta Villar. En Xerais.

Versión dixital en GaliciaLe

Primeira novela de Marta Villar protagonizada por Dina Souto, unha moza que traballa como bolseira nun xornal e que vive nunha contradición permanente: intentar ser unha persoa normal ou deixarse levar pola violencia brutal que prendeu nela durante a infancia e que lle gusta máis do que quere recoñecer.

A novela está ambientada en Malpica de Bergantiños, Carballo, Monte Neme, Compostela ou a Coruña entre outros lugares. A través da biografía de Dina iremos coñecendo historias de violencia, machismo, dos traballos antigos, das minas do volframio, da vida no rural, etc.

A autora adica este libro a Míriam, Toñi e Desirée; Virginia e Manuela; Ana Orantes; María Xosé Arcos, Clemencia Ponte; Sonia Iglesias; Elisa Abruñedo ... Nin esquecemento nin perdón.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.