Raios incesábeis para celebrar o Día Mundial da Poesía 2026

El rayo que no cesa é unha obra mestra do poeta oriolano Miguel Hernández. Representa a dor amorosa, a paixón incontrolable, a morte e a anguria existencial que perseguen ao poeta como forzas inesgotables. O raio é unha enerxía destrutiva e penetrante --un amor apaixonado e doloroso-- que, igual ca unha tempestade, non descansa. 

Publicado en 1936, celebramos este ano o noventa aniversario da súa edición e queremos homenaxear ao poeta de Orihuela (Alacant) cunha expo cos seus versos dentro da conmemoración do Día Mundial da Poesía (21 de marzo).

Títulos dispoñibles en eBilio

Obras para préstamo en Bibloleiros

Visita a expo no vestíbulo da Biblioteca Central Rialeda (Perillo).

Xesús Alonso Montero, ronsel de sabedoría (1928-2026)

Xesús Alonso Montero foi un intelectual puro, cortado polo patrón do seu tempo pola amplitude e diversidade dos seus saberes, polo seu radical compromiso social, político e moral (para el indisociables), e pola súa entrega á divulgación do coñecemento. Apaixonado do estudo, entregado á pesquisa en corpo e alma e devorador insaciable de páxinas escritas, atesouraba un caudal de erudición no campo das humanidades galegas inigualable, verdadeiramente sen fin. Mais non era un simple compilador de datos, pois o seu espírito inquisitivo e inconformista soubo deitar un ollar novo aos temas que tocaba, animado por un afán crítico que bebía da socioloxía e do marxismo. O seu maxisterio apoiábase, ademais, na optimista convicción de que o coñecemento melloraba a humanidade e as persoas. Dotado nun grao extraordinario da virtude da elocuencia, puxo a súa brillantez oratoria ao servizo da transmisión do saber e da divulgación das súas ideas sobre a literatura e a sociedade. Enfeitizaba as audiencias porque o seu verbo prodixioso transmitía sabedoría, honestidade e emoción. 

Texto de Henrique Monteagudo en academia.gal

Visita a expo bibliográfica adicada a Xesús Alonso Montero na Biblioteca Central Rialeda (Perillo)

Libros de Xesús Alonso Montero en Bibloleiros

Obras de XAM en GaliciaLe

Lobo Jack: expo 150 aniversario do nacemento de Jack London 1876-2026

Unha biografía de película: nos seus corenta anos de vida (1876–1916), o escritor Jack London foi peón, mariñeiro, granxeiro, xornalista, produtor cinematográfico... Escribíu novela, conto, poesía, ensaio, libros de viaxes e crónica xornalística (máis de 50 libros entre 1900 e 1916, algúns deles traducidos a 70 idiomas) centos de contos e artigos. Entre os máis coñecidos, A chamada da selva = La llamada de lo salvaje (1903), El lobo de mar (1904), Cairo branco = Colmillo blanco (1906), O talón de ferro = El talón de hierro (1908) ou Martin Eden (1909). Foi un dos primeiros escritores supervendas de Norteamérica, gañando unha fortuna coas súas obras. Lector voraz desde neno, foi fundamental na súa formación intelectual, a Biblioteca Pública de Oakland (California) e a súa bibliotecaria, a poeta Ina Coolbrith quen lle ofreceu a súa orientación literaria (Ina foi tamén mentora da bailarina Isadora Duncan). A necesidade levarao dun traballo a outro (aos vinte anos traballara en centrais eléctricas, na construción do ferrocarril, en envasadoras, buques mercantes...) en condicións penosas. En 1894 decide unirse á Kelly´s Industrial Army, unha marcha de parados que se dirixía a Washington para protestar contra o goberno. Durante máis dun ano, percorrerá Estados Unidos como vagabundo (por deambular foi detido e pasou trinta días na cadea de Erie County, Buffalo). Enrolouse nun barco que o levou a Alaska, para unirse á febre do ouro, metal que non conseguíu, e si un escorbuto que case o mata. London foi moi coñecido polas súas fazañas persoais. Pintoresco e controvertido, aparecía con asiduidade nas noticias. Gran trouleiro, posicionábase a miúdo contra as inxustizas. Orador elocuente, era moi solicitado como conferenciante sobre temas económicos e políticos. 

A súa extraordinaria capacidade para a descrición de paisaxes agrestes e personaxes case sempre bravíos (cun uso maxistral dos animais, nomeadamente os cans), engadido a unha gran economía da linguaxe e unha arte singular no desenvolvemento da acción, convírteno nun dos cumios da literatura norteamericana, a medio camiño entre a xeración dos Melville, Hawthorne, Poe, Thoreau ou Whitman e a xeración perdida: Dos Passos, Faulkner, Steinbeck, Fitzgerald.

Jack London escribíu tanto sobre lobos e cans que un amigo de seu alcumouno "O Lobo".

Dixo de si mesmo, "prefiro ser cinza que po. Prefiro que a miña chispa se apague nun lume brillante antes que ser abafada pola podremia seca. Prefiro ser un meteorito soberbio e que cada un dos meus átomos brille magníficamente, que un planeta durmido e permanente. A función axeitada do home é vivir, non existir. Non vou malgastar os meus días intentando prolongalos. Aproveitarei o meu tempo."

Lévate en préstamo os libros da Expo Lobo Jack na Biblioteca Central Rialeda (Perillo). 

Obras de London en Bibloleiros

Títulos dispoñibles en GaliciaLe

Títulos dispoñibles en eBiblio

Fontes: 

jacklondonpark, jacklondonsociety, forgottenpoets, eldiario, zendalibros, editorialletraherido

Fina Casalderrey, contigo, con toda a ALMA

Fina Casalderrey é aspirante ao Astrid Lindgren Memorial Award (ALMA) 2026. GÁLIX está desenvolvendo unha intensa campaña de apoio da súa candidatura na que Bibloleiros quere colaborar a través de exposicións das súas obras nas Bibliotecas Municipais de Oleiros. A este fermoso labor de difusión están convidadas todas as persoas que queiran sumarse.

Fina Casalderrey (Xeve, Pontevedra, 1951) é mestra e unha das grandes voces da literatura infantil e xuvenil en galego. Medrou escoitando contos na casa, o que alimentou a súa imaxinación. Esa relación tan agarimosa coa lingua acompáñaa toda a súa vida. 

Publicou máis de sesenta libros e foi recoñecida con numerosos premios, entre eles o Premio Nacional de Literatura Infantil e Xuvenil por O misterio dos fillos de Lúa. As súas historias abordan temas próximos á infancia e adolescencia, con moita tenrura, humor e verdade, sempre desde o respecto polas nenas e nenos. É académica da Real Academia Galega e unha figura esencial da nosa literatura. 

O Astrid Lindgren Memorial Award (ALMA) é o premio internacional máis importante dedicado á literatura infantil e xuvenil, creado polo Goberno de Suecia en memoria da autora Astrid Lindgren, creadora de Pippi Mediaslongas. Concedeuse por primeira vez en 2003 e recoñece autoras, ilustradoras, narradoras orais e proxectos de promoción da lectura de todo o mundo. Está considerado o "Nobel da Literatura Infantil" e premia unha traxectoria que contribúe de maneira destacada ao dereito da infancia a acceder a literatura de calidade. Para este 2026 hai un total de 263 candidaturas de 74 países. O anuncio da candidatura gañadora terá lugar o 14 de abril deste ano.

Fonte: Gálix

Moitas obras da autora pontevedresa foron suxestión de lectura nas RecomendaciónsEnRadioleiros.

Lévate en préstamo os libros de Fina Casalderrey que temos en Bibloleiros ao teu dispor.

Fina Casalderrey, contigo, con toda a ALMA

Hilarante Mendoza: Premio Princesa de Asturias das Letras 2025

Novelista, dramaturgo, tradutor e lingüista, Eduardo Mendoza naceu en Barcelona un 11 de xaneiro de 1943. Medrou no seo dunha familia burguesa catalana de lingua castelá. Estudou nun colexio relixioso e despois a carreira de Dereito na Universidade de Barcelona, onde compartíu aulas con quen sería logo o seu descubridor e editor, o poeta Pere Gimferrer. Exerceu a avogacía durante varios anos, profesión que non o satisfixo. Deu un xiro radical á súa vida e se adicou á tradución e interpretación nas Nacións Unidas a comezos dos anos setenta do pasado século. Foille ben neste labor profesional (exerceu de intérprete no famoso salón oval da Casa Branca), pero o seu éxito como escritor permitíulle profesionalizar a súa escritura e adicarse por enteiro á literatura, volvendo a España en 1982. 

Fonte: fpa e jotdown

2 dos seus títulos foron recomendados en Radioleiros:

"La verdad sobre el caso Savolta" e "La ciudad de los prodigios" de Claudio Stassi (baseado na novela de Eduardo Mendoza).

"La aventura del tocador de señoras" e "La verdad sobre el caso Savolta" foron obxecto de análise nas tertulias literarias.

Visita a expo de Eduardo Mendoza que temos para ti no vestíbulo da Biblioteca Central Rialeda (Perillo).

Títulos dispoñibles en eBiblio

Parabéns, Eduardo!!!

Parabéns, Remedios!!!

A investigadora e escritora cordobesa Remedios Zafra recibíu o Premio Nacional de Ensayo 2025 outorgado polo Ministerio de Cultura pola súa obra "El informe: trabajo intelectual y tristeza burocrática". 

En "El informe", Remedios Zafra profundiza nunha das liñas centrais do seu pensamento: a relación entre o traballo, a tecnoloxía e o tempo na sociedade contemporánea. A autora aborda o tema desde unha mirada afectiva: «o que nos une aos traballos intelectuais é xustamente o amor cara esa práctica». Sen embargo, advierte de como esa ligazón se ve decotío neutralizada por unha burocracia crecente que «dificulta o bo traballo» e xera o que ela denomina tristura administrativa.

Zafra cuestiona a promesa incumprida da tecnoloxía: «Pensabamos que as máquinas nos liberarían das tarefas tediosas, pero terminaron amplificando os procesos administrativos e reducindo os nosos tempos de concentración». Aínda que as ferramentas dixitais parecen facilitar a organización, «a maioría das veces rematamos con máis traballo», ao esvaecerse as fronteiras entre o laboral e o persoal, como ocorre co teletraballo e a autoxestión constante.

Fonte: Diario de Córdoba

Grazas, Remedios, por explorar novas vías para reconciliar o pensamento, o tempo e a vida.

Remedios Zafra en Bibloleiros

Remedios Zafra en eBiblio

Parabéns, László!!!

László Krasznahorkai, natural da pequena cidade de Gyula (surleste de Hungría), é o gañador do Premio Nobel de Literatura 2025. A Academia Sueca outorgou o galardón "pola súa obra convincente e visionaria que, no medio do terror apocalíptico, reafirma o poder da arte". O comité do Nobel sinalou que “é un grande escritor épico da tradición centroeuropea, que se estende desde Kafka ata Thomas Bernhard, e se caracteriza polo absurdo e o exceso grotesco”.

O país maxiar recibe este premio por segunda vez. En 2002 foi Imre Kertész quen gañou o Nobel de Literatura.

Lévate en préstamo os libros de László Krasznahorkai que temos á túa disposición na Biblioteca Central Rialeda (Perillo).

Parabéns, László!!!

Gratulálok!!!

Manuel Lourenzo (1943-2025): o teatro, como respirar

Hai uns días finaba Manuel Lourenzo, actor, dramaturgo, ensaísta, tradutor, docente e director teatral, considerado unha das personalidades máis sobresaíntes do noso panorama teatral e cultural contemporáneo.

Finou quen entendeu o teatro como unha absoluta necesidade física.

O seu labor foi fundamental na consolidación e desenvolvemento do teatro en lingua galega dende a segunda metade do século XX. Foi un dos impulsores do teatro independente en Galicia e fundador de grupos e compañías teatrais como O Facho, Teatro Circo, a Escola Dramática Galega, o Clube de Teatro Elsinor ou a Compañía Luís Seoane.
A súa produción teatral abarca máis de 300 obras, sempre cun forte compromiso coa cultura e identidade galega. Entre as súas obras máis destacadas atópanse Romería ás Covas do Demo (1975), Veladas indecentes (1996), O circo de medianoite (1997), Flores de Dunsinane (2009) ou Suite Artabria (2017). Entre a súa obra ensaística podemos destacar títulos como O teatro galego (1979), Antoloxía do teatro galego (1981), Dicionario do teatro galego (1987) ou o manual Pensar co corpo (2000).
Traduciu ao galego aos grandes do teatro grecolatino, así como a Shakespeare, Goethe, Chejov, Brecht, Yourcenar ou Fassbinder.
Manuel Lourenzo recibiu numerosos premios e distincións, entre eles o Premio Nacional de Literatura Dramática (1997), o Premio Nacional de Artes Escénicas (2008), o premio Otero Pedrayo (2011), o Artur Carbonell do XVI Festival Internacional de Teatro de Sitges (1983), o Rafael Dieste (1996, 1999), o Premio de Honra Marisa Soto, o Premio ás Letras dos Premios da Cultura Galega (2024), e un sinfín de recoñecementos máis. Tamén foi nomeado profesor Honoris Causa pola Escola Superior de Arte Dramática de Galicia.
No audiovisual ten participado en producións como Mareas Vivas, Elisa e Marcela ou Fariña.
A día de hoxe, o seu legado é unha referencia imprescindible, tanto pola súa obra como polo seu labor de promoción do teatro galego.
'Cunqueiriano de Honra', título outorgado polo Concello de Mondoñedo e a Casa Museo Álvaro Cunqueiro, a Federación de Asociacións Culturais Galiza Cultura culminou o traballo de edición da súa obra completa en 2022.

Visita a expo de Manuel Lourenzo que temos para ti na Biblioteca Central Rialeda (Perillo).
Obras de Manuel Lourenzo en Bibloleiros

Foto: composición sobre colaxe orixinal de mariaxe.colaxe

Bio obtida en: casahamlet.es

Bernardino Graña (1932-2025), foise o poeta do mar e do amor

Foise Bernardino Graña (1932-2025), o poeta do mar e do amor.

Parafraseando un verso do escritor de Cangas, ¿Como habemos vivir mañá sen a luz túa?

Visita as exposicións bibliográficas (para público infantil e adulto) da Biblioteca Central Rialeda (Perillo) e da Biblioteca Municipal Rosalía de Castro (Santa Cruz) adicadas ao poeta, narrador, dramaturgo e autor de obras dirixidas ás crianzas e á mocidade.

"Dinme que nacín

preto dun peirao,

na beira do mar

da Ría de Vigo:

Cangas do Morrazo,

pobo mariñeiro,

é o meu lugar.

Gustei de xogar,

e agorta o meu xogo

é xuntar historias

xuntando palabras

con algo de ritmo,

pois non son tan vello."

De si mesmo en "Oso mimoso"

Obras de Bernardino Graña en Bibloleiros

Dispoñibles en Galicia Le

Expo bibliográfica "75 cabodano de Castelao" en Rialeda e Dorneda

En 2025 conmemoramos o 75º aniversario da morte de Alfonso Daniel Rodríguez Castelao, unha das personalidades fundamentais da Galicia contemporánea. Xunto a numerosas institucións e entidades culturais e sociais, as bibliotecas municipais de Oleiros queren sumarse ás celebracións do seu legado artístico, político e social.

O obxectivo do Ano Castelao 2025 é lembrar a memoria e a herdanza de quen foi un dos fundadores da Galicia contemporánea, a súa cultura e o seu marco político: é imposible pensar Galicia sen pensar a Castelao.

"Dono das chaves da expresión» como di Otero Pedrayo de Castelao en "O libro dos amigos", e como podemos ler no web da Fundación Castelao: humorista, pintor, escritor, político, Castelao é antes que nada un gran comunicador, un creador entregado á causa da liberdade do seu país.

Co impacto da súa obra forxou a conciencia colectiva da Galiza de hoxe e converteuse nun mito. 

Fonte: fundacioncastelao.gal

Visita as expos bibliográficas adicadas a Castelao no seu 75 cabodano no vestíbulo da Biblioteca Central Rialeda (Perillo) e na Biblioteca Municipal Mª José Ruso (Dorneda).

Libros de Castelao dispoñibles en Galicia Le

Intelixente. Sensible. Burleiro: centenario do nacemento do naturalista, presentador de televisión e novelista Gerald Durrell (1925-2025)

Gerald Malcolm Durrell naceu na India o 7 de xaneiro de 1925. A nenez de Durrell transcorreu na India, (aínda pertencía daquela ao Imperio Británico), e dalí é a lembranza da súa primeira visita a un zoo, momento que abre a súa paixón pola conservación da natureza e o amor aos animais.  A partir de 1935, a súa estadía na illa grega de Corfú, foi de grande importancia para a súa formación e foi contada de forma moi ocorrente en parte dos seus libros. Viaxou por todo o mundo para estudar e recoller exemplares para zoolóxicos e acuarios. Estas viaxes convertéronno nun firme defensor da vida salvaxe e comprometeuse en protexela. En 1963, fundou o Durrell Wildlife Conservation Trust en Jersey, nas Illas do Canal, co obxectivo de protexer especies en perigo de extinción. Unha cápsula do tempo soterrada en 1988 no Zoo de Jersey, que forma parte da súa fundación, conserva unha das súas citas máis fermosas: "Agardamos que haxa lucecús na noite para vos guiar e bolboretas nas sebes e bosques para vos saudar. Agardamos que nas vosas alboradas escoitedes unha orquestra de paxaros e que o son das súas ás e a opalescencia da súa cor vos fascinen. Agardamos que siga existindo a extraordinaria variedade de criaturas que comparten o planeta connosco para vos marabillar e enriquecer as vosas vidas como o teñen feito connosco".

A Biblioteca Central Rialeda (Perillo) e a Biblioteca Municipal Rosalía de Castro (Santa Cruz) ofrécenche senllas exposicións bibliográficas para conmemorar o centenario do seu nacemento.

Libros dispoñibles en eBiblio

Libros de Gerald Durrell en Bibloleiros

Ligazóns de interese:

durrell.org

rtve.es

pressreader.com

Parabéns, Álvaro Pombo!!!

O galardón máis importante das letras en español, o Premio de Literatura en lingua castelá "Miguel de Cervantes", que concede o Ministerio de Cultura y Deporte, recaeu en 2024 na persoa de Álvaro Pombo. O xurado outorgoulle o premio ao autor cántabro "pola súa extraordinaria personalidade creadora, a súa lírica singular e a súa orixinal narración. Ao seu notabilísimo nivel como poeta e ensaísta, únese ser un dos grandes novelistas da nosa lingua que afonda na condición humana desde as perspectivas afectivas duns sentimentos profundos e contraditorios”. O xurado significou que nas súas creacións, “amosa o mundo a través da construción dunha linguaxe na que as deformacións da realidade aparecen reflectidas baixo a máscara da ironía e do humor. Na súa prosa, a oralidade reflíctese na vontade dun estilo que aspira ao "escribo como falo" valdesián. Álvaro Pombo creou aquilo que define aos grandes escritores, un mundo literario propio inmorredoiro e imprescindible que estremece e compadece”. Álvaro Pombo naceu en Santander en 1939. É membro da Real Academia Española de la Lengua desde 2004.

Lévate en préstamo os libros de Álvaro Pombo que temos á túa disposición na Biblioteca Central Rialeda (Perillo). 

Libros de Álvaro Pombo en Bibloleiros // Libros de Álvaro Pombo en eBiblio

Parabéns, Álvaro Pombo!!!

Parabéns, Manuel Rivas!!!

Manuel Rivas foi galardonado co Premio Nacional de las Letras Españolas 2024 “pola súa extraordinaria calidade narrativa que xunta forza emocional e beleza formal e a solidez dunha traxectoria versátil e coherente construída coa sensibilidade e a defensa da memoria histórica, a responsabilidade social e a lingua galega. Poucos autores do panorama literario español, partindo dun compromiso firme coa súa lingua, acadaron tal recoñecemento a nivel mundial”. A súa obra “acompaña o seu activismo, cunha pluma que, sen adoutrinamento, axita conciencias, induce á reflexión e estimula o pensamento cara a defensa da pluralidade lingüística e cultural e a igualdade de xénero. Manuel Rivas, cunha voz poderosa e singular, crea literatura e, con ela, volve a situar a escrita galega no olimpo das Letras Nacionais”. Lévate en préstamo os libros de Rivas que temos á túa disposición na Biblioteca Central Rialeda (Perillo). 

Parabéns, Manuel Rivas!!!

Parabéns, Han!!!

Han Kang, escritora surcoreana nacida en Gwangju, é gañadora do Premio Nobel de Literatura 2024. A Academia Sueca considera que Han Kang «enfronta traumas históricos e conxuntos invisibles de regras e, en cada una das súas obras, expón a fraxilidade da vida humana. Ten unha conciencia única das conexións entre o corpo e alma, a vida e a morte, e co seu estilo poético e experimental converteuse nunha innovadora da prosa contemporánea». É o primeiro Nobel para Corea do Sur e na muller número 18 en recibilo.

Han Kang foi unha suxestión de lectura das bibliotecas municipais en RadiOleiros e obxecto de debate nas Tertulias Literarias.

Lévate en préstamo os libros de Han Kang que temos á túa disposición na Biblioteca Central Rialeda (Perillo).

Parabéns, Han!!!

축하해요

Día das Escritoras na Biblioteca de Santa Cruz: "O rural en feminino"

Celebramos o Día das Escritoras ofrecendo unha exposición de obras escollidas de escritoras cun nexo en común: o feito de seren historias ambientadas no medio rural a través do cal se enaltece a vida na natureza.

Ata o 24 de outubro, na Biblioteca e Centro de Documentación da Muller "Rosalía de Castro" (Santa Cruz)

Ismaíl Kadaré, 1936-2024: ecos kafkianos, historias desacougantes e alegorías políticas

Ecos kafkianos, historias desacougantes e alegorías políticas mesturadas cos soños e os mitos foron algúns dos vimbios cos que compuxo a súa obra o escritor do país das águias. Faleceu Ismaíl Kadaré, gañador do Man Booker en 2005, do Princesa de Asturias das Letras 2009 e do Neustadt International Prize for Literature en 2020. "El palacio de los sueños" foi unha suxestión das Recomendacións en Radioleiros aló por 2009. O 15 veces candidato ao Nobel de literatura dícia que "un gran escritor é alguén capaz de inventar as historias máis imposibles e inimaxinables. A literatura é un acto divino".

Visita a expo de Kadaré que temos para ti na Biblioteca Central Rialeda (Perillo).

Obras de Kadaré en Bibloleiros

Alice Munro, 1931-2024: a beleza da cotiandade

Faleceu Alice Munro, Premio Nobel de Literatura 2013 e Premio Booker en 2009. Canadense dunha pequena vila de Ontario, a mestra do conto contemporáneo comezou a escribir sendo adolescente. Entre outras ocupacións, traballou como camareira e foi empregada de biblioteca. O seu inicio no mundo da narración curta deuse antes de cumprir 20 anos, coa publicación de As dimensións dunha sombra (1950) nunha revista estudantil para adicarse á literatura aos 30 anos con contos e relatos que vendía para a radio pública do seu país. Munro utilizou a beleza das pequenas cousas como material para amosar as dores máis fondas da natureza humana.

Títulos de Alice en Bibloleiros

Libros de Alice Munro en eBiblio

"La vida de las mujeres" foi obxecto de debate nas tertulias literarias e lectura recomendada en Radioleiros.

Lévate en préstamo os libros de Munro que temos ao teu dispor no vestíbulo da Biblioteca Central Rialeda (Perillo).

Paul Auster, 1947-2024: Maxia, sorpresa, emoción

Faleceu o autor que non usaba ordenador para escribir as súas obras e fixo de Brooklyn un personaxe máis das súas novelas. Autobiografía, ficción e realidade mesturadas nas proporcións axeitadas coas que creou mundos literarios onde se cruzaban o destino e a casualidade. Guionista, director de cine e escritor prolífico, conta con millóns de lectoras-es en todo o mundo.

"Diario de inverno" e "Sunset Park" foron lecturas recomendadas en Radioleiros.

"El palacio de la Luna" foi obxecto de análise nas tertulias literarias.

Obras de Auster en Bibloleiros

Paul Auster en GaliciaLe

Títulos dispoñibles en eBiblio

Visita as expos de Auster que temos para ti na Biblioteca Central Rialeda (Perillo), na Biblioteca Rosalía de Castro (Santa Cruz) e na Biblioteca Mª José Trincado (Mera).

Sábado 13 abril 2024: Celebración do 25 aniversario das Tertulias Literarias en Rialeda

Así voa o tempo. Cúmprense 25 anos da posta en marcha dos Clubs de Lectura e Tertulias Literarias na Biblioteca Central Rialeda. Ao longo de dúas décadas e media foise creando non só un espazo de ocio e cultura senon tamén un punto de encontro entre amigas e amigos cunha paixón e desfrute común: a literatura.

Mención especial para Cecilia Monllor, benquerida moderadora desde os inicios, profesional sen a cal a actividade non tería acadado o éxito, lonxevidade e a fidelidade de tantas e tantos participantes ao longo dos anos. Moitas grazas, Cecilia!

Máis recente, desde 2014, Rosa García Vilariño, profesora xubilada de lingua e literatura galegas, pon a súa ampla experiencia e agarimo na selección e moderación das lecturas en lingua galega. Parabéns, Rosa!

E como non, o máis importante, o fío tecedor da actividade, as ducias e ducias de participantes cuxa paixón polos libros foi artellando este fermoso camiño que continúa na actualidade. Unha aperta moi grande para todas e todos! Grazas mil.

Para conmemorar o aniversario, presentamos un programa de visitas destinado a todas as persoas que participen ou teñan participado na Tertulia de Rialeda (imprescindible inscrición previa na biblioteca):

9:30 h. Punto de encontro: Biblioteca Central Rialeda.
9:50 h. Traslado en autobús ao Castelo de Santa Cruz.

10:15 a 11 h. Visita ao Castelo de Santa Cruz. Breve explicación sobre a historia do castelo por Carmen Borobio. Panorámica da exposición: Obxectomanía, unha historia singular do coleccionismo, por Xoán Fontaíña. Os castelos na literatura, por Silvia Salgado.

11 h. Saída do Castelo.
11:10 h. Traslado en autobús ao Pazo de Xaz.

11:30 a 12:20 h. Visita ao Pazo de Xaz. Xaz, pazo e casa grande: Manuel Pardo de Andrade, intelectual liberal ilustrado, por Rosa García Vilariño. Vida, pazos e literatura: unha fascinación, por Silvia Salgado. A orella dereita de Antón de Leiva, adaptación dun relato da obra "Os outros feirantes" de Álvaro Cunqueiro por Ramiro Neira (Artestudio Teatro)

12:20 h. Traslado en autobús ao Pazo do Río.

12:35 a 13:35 h. Visita ao Pazo do Río. Semblanza literaria dos 25 anos dos clubs de lectura, por Cecilia Monllor-Martínez. Lembranza literaria galega, por Rosa García Vilariño. O paraíso perdido, María Casares en Galicia, pola actriz Isabel Martínez-Risco. Concerto para frauta, a cargo de Claudia Walker Moore.

13:35 h. Remate do Roteiro. Traslado en autobús á Biblioteca Central Rialeda.

Argallante, enxeñoso, descortés: centenario do nacemento do novelista, dramaturgo e xornalista Truman Capote (1924-2024)

Son incontables os epítetos que designan a vida e a obra do escritor norteamericano Truman Capote, do que se cumpre neste 2024 o centenario do seu nacemento. Un dos líderes do novo xornalismo, sobre todo tras publicar In Cold Blood (A sangue frío), deixou un enorme legado literario en forma de artigos, entrevistas, reportaxes, contos, libros de viaxes, retratos de personaxes célebres, adaptacións teatrais, un musical, varios guións cinematográficos e dúas novelas. As súas obras foron adaptadas a máis de 20 películas e series de televisión. Habitual de eventos, festas e programas da pequena pantalla, convertíuse nun personaxe de gran popularidade. A súa vida inspirou dúas películas, "Historia de un crimen" e "Truman Capote".

A Biblioteca Central Rialeda (Perillo) ofréceche unha exposición de libros e fitas cinematográficas para conmemorar o centenario do seu nacemento.