Luns 13 de outubro: Presentación Tertulias Literarias nas Bibliotecas Municipais 2025-2026

Teatro As Torres. Santa Cruz.
Luns 13 de outubro ás 18:30 h.

Presentación da tempada 2024-2025. 

Coa presenza de Silvia Salgado (moderadora), Mª Xosé Santos Zas (Concelleira de Cultura) e persoal bibliotecario.

13 de maio: Espectáculo poético-musical "Un idioma de música e tinta" con Yolanda Castaño e Isaac Garabatos

Teatro As Torres (Santa Cruz)

Martes 13 de maio ás 20:00 h

Conmemoración do Día das Letras Galegas e 40 anos das Bibliotecas Municipais de Oleiros 

Un percorrido polos últimos anos dunha poeta que se consolidou nas Bibliotecas de Oleiros, arroupado para esta celebración pola música de Isaac Garabatos. Entre a envolvente música en directo do compositor e instrumentista Isaac Garabatos, Yolanda Castaño (Premio Nacional de Poesía 2023) ofrécenos un paseo guiado a través dos seus poemas culminando cos do seu novo libro, "A falsa autónoma".

A voz de Yolanda Castaño únese ás composicións musicais de Isaac Garabatos, en diálogo constante entre música e poesía, nun espectáculo de gran calidade artística e cargado de emocións.

Yolanda Castaño é poeta, filóloga e unha activa xestora cultural, coa súa propia residencia para escritores-as na Coruña. Premio Nacional de Poesía (2023) e Premio da Crítica en lingua galega (2022) polo seu libro Materia. Entre as súas obras podemos destacar: A falsa autónoma, Vivimos no ciclo das erofanías, O libro da egoísta, Profundidade de campo, A segunda lingua, Elevar as pálpebras ou Delicia. Ademais dos citados, ten no seu haber outros premios literarios, como por exemplo: Premio da Cultura de Galicia (2023), Premio Irmandade do Libro a autora do ano (2014), Premio Fundación Novacaixagalicia (2013), Premio Ojo Crítico (2009), Premio Espiral Maior (2007), Premio Nacional da Crítica (1999).

Isaac Garabatos é un dos músicos e compositores máis versátiles do panorama musical galego. Realizou numerosos traballos de composición para diferentes obras de danza contemporánea, teatro, curtametraxes e grupos de Jazz, Fusión, Latin-Jazz, Funk, Folk, Pop, Rock e Dance.

Desde as bibliotecas municipais invítase ás persoas que desexen asistir, ata completar o aforo, para que gocen coa poesía e coa música.

Martes 22 de abril: Concerto "Poesíapoemas" de Francisco Castro en As Torres

Teatro As Torres. Santa Cruz.
Martes 22 de abril ás 19:30 h.

Concerto musical a cargo de Francisco Castro no que presentará un repertorio cunha escolla do mellor da poesía galega musicada dende os anos sesenta ata os nosos días.

Entre outros, escoitaremos poemas de Rosalía de Castro, Álvaro Cunqueiro, Manuel Curros Enríquez, Manuel María, Castelao, Uxío Novoneyra...  así como poesía cantada de corte popular.

Francisco Castro recolle as versións dos grandes cantautores galegos e reinventa as cancións con ritmos diferentes (rock, pop, reagge...) nun espectáculo dinámico, no que todas as persoas poderán participar cantando, ao mesmo tempo que explicará a importancia de cada poema, do disco no que saíu, do artista que o traballou, etc.

O público asistente gozará con este espectáculo ao mesmo tempo que coñecerá ou lembrará a poesía e a música galegas.

Desde as bibliotecas municipais invítase a todas as persoas que desexen asistir, ata completar o aforo.

Martes 8 de abril: Presentación dos poemarios "Inspiración tiene nombre de mujer" e "Del desamor también se aprende" de Miguel Rodríguez Rico

Teatro As Torres. Santa Cruz.
Martes 8 de abril ás 19:30 h.

Intervirán: Miguel Rodríguez Rico e Carmen Abella Rodríguez.

Recitarán poemas: Antón Vázquez Seoane, Eva Cotelo Pérez, Uxía Veira Parcero.

A obra Inspiración tiene nombre de mujer está formada por vinte poemas e un epílogo nos que trata os aspectos da busca, o desencontro e a aprendizaxe. A temática principal é o amor, pero tamén presenta outras circunstancias como a soidade, o fracaso e a esperanza.

O poemario Del desamor también se aprende aborda o tema do desamor. Un traballo de introspección e reflexión persoal, pero tamén de paixón e lamento. Unindo melancolía e nostalxia, agradecemento e aprendizaxe, entrelázase na arte de vivir e aprender.

Miguel Rodríguez Rico é estudante de xornalismo na Universidade de Santiago de Compostela. Ten publicados catro libros: Claroscuro, Divagar, Del desamor también se aprende e Inspiración tiene nombre de mujer. Defínese como un apaixonado da literatura, destacando pola súa sensibilidade e capacidade para canalizar e plasmar as súas inquietudes de forma literaria.

Desde as bibliotecas municipais invítase a todas as persoas que desexen asistir, ata completar o aforo.

Martes 25 de marzo: Presentación da obra "Canto popular gallego" na edición comentada por Manuel Rico Verea

Teatro As Torres. Santa Cruz.
Martes 25 de marzo ás 19:30 h.

Intervirán: Manuel Rico Verea (autor da edición comentada), Rosa García Vilariño (profesora de Lingua e Literatura galegas)

O acto finalizará coa actuación das Pandeireteiras Seixebra, do Grupo de baile e gaitas Santaia.

Canto popular galego, de Luis María Fernández Espinosa é unha edición comentada que pretende rescatar a unha figura clave na historiografía dos cancioneiros galegos de tradición oral.

Manuel Rico Verea desempeñou a súa actividade docente en Madrid, no País Vasco e, a partir de 1978, en Galicia, onde se implica directamente no proceso de normalización da lingua galega. Este compromiso coa cultura propia lévao a desenvolver unha actividade de creación, investigación e publicación de obras sobre a lingua e a literatura galegas, así como sobre a música tradicional, atendendo á súa aplicación pedagóxica. É autor ou coautor de publicacións didácticas pioneiras como a Guía didáctica de preescolar Puff (1981), Cantares (1983) ou o nivel 4 de O noso galego, editado por Xerais. En formato libro, de contido musical, publica o Cancioneiro popular das terras do Tamarela, Imos canta-los nadais, Tantarantán, tarantán, tarantiña, Eu non canto por cantar, cancioneiro xeral, Heiche cantar un conto, cancioneiro infantil galego, Cantos de berce e Eu ben vin, virivín. Cancioneiro infantil para dicir, contar e cantar (Xerais, 2018). Así mesmo, é tradutor, coordinador de coleccións literarias e de suplementos culturais.

Formou parte do grupo musical A Quenlla e actualmente dirixe un taller experimental de música tradicional que publica varios documentos sonoros, entre os que destacan A pulguiña e o pulgón, Cantares, Arrolín, arrolán, Vente vindo, ven cantando e Cantos de berce tradicionais.

Pola súa actividade cultural na radio e na prensa, recibiu o Premio do Ministerio de Cultura ao mellor labor cultural continuado no ano 1985, o Premio do Ministerio de Cultura ao mellor programa radiofónico no ano 1987 e o Premio Xunta de Galicia de xornalismo polo mellor programa musical do ano 1989, que se emitiu en Radio Nacional de España en Galicia.

Desde as bibliotecas municipais invítase a todas as persoas que desexen asistir, ata completar o aforo.

Martes 18 de marzo: Recital poético "Con nome de muller" con Chus Álvarez e Ángeles Dorrio.

Teatro As Torres. Santa Cruz
Martes 18 de marzo ás 20:30 h.

Conmemoración do Día da Muller.

Recital poético "Con nome de muller" a cargo da actriz Chus Álvarez, acompañada ao piano por Ángeles Dorrio.

Unha homenaxe á poesía escrita por mulleres universais, en galego e castelán. Unha escolma de 36 poemas únicos, recitados con voz falada e cantada, e música en directo.

Selección poética, interpretación e dirección: Chus Álvarez. Piano e voz cantada: Ángeles Dorrio.

Poetas galegas:

Alba Cid
Ana Romaní
Emma Pedreira
Estíbaliz Espinosa
Lucía Aldao
Luisa Villalta
Lupe Gómez
Luz Fandiño
Luz Pozo Garza
María Lado
Olalla Cociña
Olga Novo
Pilar Pallarés
Pura Vázquez
Rosalía de Castro
Xela Arias
Xohana Torres
Yolanda Castaño

Poetas españolas e internacionales:
Alba Flores
Alejandra Pizarnik
Alfonsina Storni
Ana Luisa Amaral
Beatriz Osés
Concha Méndez
Emily Dickinson
Gata Cattana
Gioconda Belli
Gloria Fuertes
Mar Benegas
María Elena Higueruelo
María Elena Walsh
Maya Angelou
Patricia Benito
Sylvia Plath
Wislawa Szymborska
Xitlalitl Rodríguez

Desde as bibliotecas municipais invítase a todas as persoas que desexen asistir, ata completar o aforo. 

Xoves 13 de marzo: Presentación de "Intelixencia Artificial para a sociedade" de Fina Paulos Lareo e Óscar Manuel Rey Calo

Teatro As Torres. Santa Cruz.
Xoves 13 de marzo ás 19:30 h.

Intervirán: Fina Paulos Lareo e Óscar Manuel Rey Calo (autores). Diana Varela Puñal (representante de Medulia editorial).

“Intelixencia Artificial para a sociedade” e un libro que vén a democratizar o uso da Intelixencia Artificial entre a poboación en xeral e achegar á veciñanza a un mundo que parece complexo pero, presente cada día nas nosas vidas.
A chave do libro está precisamente en abordar a IA desde unha perspectiva sinxela e atractiva para todos.

Fina Paulos Lareo é veciña de Perillo. Exerce como profesora de ensino secundario, na especialidade de Informática, no IES Maximino Romero de Lema, en Baio-Zas. Está comprometida coa innovación educativa e a integración das tecnoloxías dixitais no ensino. Está nomeada este ano á mellor docente de España na modalidade de secundaria e bacharelato nos Premios Educa.

Óscar Manuel Rey Calo é veciño de Corme. Tamén é docente no IES Maximino Romero de Lema, na especialidade de Sistemas e Aplicacións Informáticas. A súa aproximación ao ensino baséase no uso práctico das tecnoloxías dixitais, promovendo unha aprendizaxe colaborativa e motivadora para o alumnado.

Desde as bibliotecas municipais invítase a todas as persoas que desexen asistir, ata completar o aforo.

Presentación de "En terra allea" de Pepe Carballude: 13 febreiro 2025

Teatro "As Torres". Santa Cruz.
Xoves 13 de febreiro ás 19 h.

Intervirán: o autor: Pepe Carballude; a profesora de Xeografía e Historia: Mª Concepción Castro Higelmo

"En terra allea" aborda o tema da migración e os dramas colaterais: explotación laboral, dificultades coa vivenda, problemas de convivencia, enganos, abusos…, mais tamén aparece xente boa que tenta poñerse na delicada situación do outro. As relacións humanas, as friccións e os consensos, a imposición e a tolerancia, as penas e os momentos felices, pesan moito no decorrer da trama, onde, ao final, triunfa o amor.

Un retrato real, traumático, dun feito que se pode ver acotío e unha chamada á solidariedade e á colaboración de todos.

Pepe Carballude é escritor, tradutor é licenciado en Filoloxía Clásica. Exerceu de profesor de latín no Instituto Neira Vilas. Aparte da súa traxectoria profesional na que destacan traducións de poetas latinos ou a obra A vida diaria dos romanos, ten un longo percorrido na literatura galega, con títulos como: O xílgaro pintor, Os gazafellos (Premio Barco de Vapor 1986), Mimos e máis mimos, Investigación 091, Andainas de Pedro Chosco, S.O.S, ¡Maldito DNI!, Paisaxe con fondo gris, Romaxe de desventuras, A fraga misteriosa, O deus desaparecido (Premio Barco de Vapor 1990), O talismán dos druídas, Miña avoa ten 13 anos, Xograres dun tempo novo, Andrea quere ser maior, De como o Santo dos Croques se fai peregrino (Premio Barco de Vapor 2002) e Marxinados, entre outros.

Desde as bibliotecas municipais invítase a todas as persoas que desexen asistir, ata completar o aforo.

Presentación de "Detective Ferruchi" de Marta Villar: 3 decembro 2024

Teatro "As Torres" (Santa Cruz)

Martes 3 de decembro ás 19:30 h.

Intervirán: a autora, Marta Villar e o cantautor e escritor, Paris Joel.

Libros de Marta Villar en Bibloleiros

Libros de Marta Villar en GaliciaLe

Libros de Paris Joel en Bibloleiros

Desde as bibliotecas municipais invítase a todas as persoas que 

desexen asistir, ata completar o aforo.

Presentación de "Los secretos del árbol" de Bego Gayoso: 3 outubro 2024

Teatro "As Torres". Santa Cruz

Xoves 3 de outubro ás 19 h.

Intervirán: a autora: Bego Gayoso; a especialista en Pedagoxía Sistémica: Charo López Amor.

Los secretos del árbol é unha obra que indaga na historia da familia da autora. Todos os personaxes, lugares e acontecementos son reais, pero están narrados buscando que o lector se sinta identificado coa vivencia.

Bego Gayoso é economista e Máster en COMEX. Desenvolveu a súa carreira na empresa privada e na Xunta de Galicia durante unha década. A raíz da súa maternidade emprende un profundo proceso de transformación persoal, tras descubrir a psicoxenealoxía e o transxeneracional, que lle axudan a comprender moitos dos conflitos e repeticións que vivía na súa vida. Decide cursar un posgrado en Bioneuroemoción e fórmase en PNL e Life Coach para dedicarse de cheo a compartir os seus descubrimentos e reflexións, de forma pública, e axudar a outras mulleres a resolver os seus conflitos, exercendo como terapeuta e escritora desde hai dez anos.

Desde as bibliotecas municipais invítase a todas as persoas que desexen asistir, ata completar o aforo.

Presentación de "A tientas" de Paris Joel: 12 de setembro 2024

Teatro "As Torres". Santa Cruz
Xoves 12 de setembro ás 19 h.

Intervirán: o autor: Paris Joel; o escritor e profesor de lingua galega e literatura: Rubén Anido Regueiro.

O acto finalizará coa actuación do cantautor arxentino Luga Fernández, que interpretará unhas cancións.

A tientas é un achegamento lírico a todo o que transforma as nosas vidas. Temas como a morte, o amor, a angustia e a paisaxe son pilares que, dunha maneira ou doutra, guían as nosas vidas ata a transformación final.
Só a poesía ten o potencial suficiente para describir estes temas e deixar no lector ou lectora un pouso indeleble que pode enriquecer de forma diferente a cada persoa.

Paris Joel é poeta e cantautor. Desde hai máis de vinte cinco anos traballa como locutor e técnico de son da emisora municipal Radio Oleiros. Licenciado en Historia pola UNED, técnico especialista en operacións de imaxe e son pola Escola de Imaxe e Son da Coruña. Foi becado polo Conservatorio Superior de Música da Coruña.

Escribiu os poemarios Dictados para un salvamento emocional e La aldaba del verano, ademais do epílogo do libro Los cuerpos lejanos, do poeta, e pai de Ismael Serrano, Rodolfo Serrano. Realizou crónicas e críticas musicais para o xornal El Ideal Gallego.

Foi seleccionado, xunto a outros poetas, para publicar dous poemas na antoloxía da nova poesía contemporánea española da Asociación cultural Culturias de Avilés. Actualmente é o primeiro poeta de fóra de Asturias invitado a participar con dous poemas no primeiro tomo da colección Poetas del Paraíso, promovida pola Asociación Cultural Culturias de Avilés.

Como cantautor, actuou nas salas: Libertad 8 (Madrid), El Bardo Escaldao (Pamplona), ou os estudios Rosazul en Barcelona.

Foi o primeiro presidente da asociación de cantautores Viernes de Cantautar, recoñecida polo propio Silvio Rodríguez, e o seu nome figura en varios libros dedicados a este xénero como Mi vida entre canciones ou Volad canciones volad, do musicólogo Fernando González Lucini.

Desde as bibliotecas municipais invítase ás persoas que desexen asistir ata completar o aforo permitido para que gocen coa palabra e coa música.

Encontro coa escritora Bileysi Reyes: 23 xullo 2024

Teatro "As Torres" (Santa Cruz)
Martes 23 de xullo ás 18:00 h.

Intervirán: a escritora Bileysi Reyes e o xestor cultural Mon Rivas.

• Breve panorama da literatura dominicana contemporánea.
• A literatura a ollos de Bileysi Reyes.
• Lectura de textos propios.

Bileysi Reyes (San Pedro de Macorís, 1993). É unha autora natural da República Dominicana, licenciada en Letras pola Universidade Autónoma de Santo Domingo (UASD). Pertence ao Obradoiro Literario Narradores de Santo Domingo e ao Obradoiro Literario César Vallejo. Foi gañadora do accésit no concurso de contos Juan Bosch TLNSD, 2018 e 1º posto en Conto da Feira Rexional do Libro e a Cultura Monte Plata 2019. Publicou o poemario Selva de palabras cortadas (2023) e textos seus aparecen en revistas como Scriptura, Awttar, Letras Salvajes e as antoloxías ‘Voces do Leste’, ‘Elas narran’, ‘Quinta dose’, entre outras. En 2023 foi convidada ao Festival Soria Expoesía (España) e desempéñase como coordinadora do Festival Internacional Semana da Poesía de Santo Domingo. Traballou na Feira Internacional do Libro de Santo Domingo como editora do programa xeral e como subcoordinadora do Pavillón de Poesía da FIL2023. No ámbito da edición é correctora de textos e traballou con editoriais tanto dominicanas como estranxeiras.

Desde as bibliotecas municipais invítase a todas as persoas que desexen asistir, ata completar o aforo.

"Poéticas galegas" coa actriz Chus Álvarez e a música de Ángeles Dorrio: 16 de maio 2024

Teatro "As Torres" (Santa Cruz)
Xoves 16 de maio ás 19:00 h.

Conmemoración do Día das Letras Galegas cun recital poético que honra a 31 escritoras galegas, a cargo de Chus Álvarez (selección poética, interpretación e dirección), acompañada ao piano e a voz cantada por Ángeles Dorrio.
Comeza e finaliza con poesías de Luísa Villalta, pero tamén recitará poemas de Yolanda Castaño, Pilar Pallarés, Alba Doval, Antía Otero, Rosalía de Castro, Lupe Gómez, Lucía Aldao, entre outras.

Desde as bibliotecas municipais invítase a todas as persoas que desexen asistir, ata completar o aforo.

Presentación de "María Wonenburger, la atrevida matemática a la que nuestro país dio dos veces la espalda" de Mª José Souto Salorio e Ana Dorotea Tarrío Tobar: 9 de maio 2024

Teatro "As Torres" (Santa Cruz)

Xoves 9 de maio ás 19:00 h.

Intervirán as autoras, Mª José Souto Salorio e Ana Dorotea Tarrío Tobar.

No libro "María Wonenburger, la atrevida matemática a la que nuestro país dio dos veces la espalda" nárrase a biografía da matemática María Wonenburger, unha muller nacida en Oleiros que desde nena quería estudar matemáticas, para o cal tivo que superar moitos obstáculos. Realizou unha brillante carreira no estranxeiro que a converteu nun referente internacional da álxebra. Veu truncadas as súas investigacións ao ter que volver á casa, cando aínda tiña moito que aportar. Os recoñecementos, como tantas veces, chegaron moi tarde.

María José Souto Salorio é catedrática de Escola Universitaria da área de Álxebra na Universidade da Coruña. Realiza a súa investigación nese ámbito do coñecemento. Ademais realiza actividades de divulgación científica a través de obradoiros, conferencias ou publicacións.

Ana Dorotea Tarrío Tobar é catedrática de Escola Universitaria da área de Matemática Aplicada na Universidade da Coruña. Realiza a súa investigación no campo da xeometría diferencial. Ademais realiza actividades de divulgación científica a través de obradoiros, conferencias ou publicacións.

Desde as bibliotecas municipais invítase a todas as persoas que desexen asistir, ata completar o aforo. 

Presentación da obra "Verde en el tejado" de Silvia Salgado: 4 de abril

Teatro "As Torres" (Santa Cruz)
Xoves 4 de abril ás 19:00 h.

Intervirán:  a autora, Silvia Salgado; a editora e directora de Hércules de Edicións, Laura Rodríguez.

Verde en el Tejado é unha novela sobre a amizade, as emocións e a superación.
A través dunha relación especial da protagonista con Virginia (unha acuarelista que pinta flores e que reside en Verona) atopa a forza necesaria para afrontar o seu futuro e reconciliarse cun pasado familiar tumultuoso.
Un eloxio á vida e á beleza que se pode atopar en obxectos como as flores ou os libros.

Silvia Salgado é unha autora catalá que reside en Mera (Oleiros). Licenciada en Ciencias Políticas pola Universidade Autónoma de Barcelona e cun posgrado en Xornalismo da Universidade Columbia de Nova York.
Algunhas das súas obras publicadas son: Mientras hilan las mariposas, La aldea, El intermedio que somos e Si te vuelves invierno.
Colabora como columnista en El Ideal Gallego e dirixe talleres de escritura creativa e clubs de lectura.
Compaxina o seu traballo coa súa paixón pola fotografía.

Desde as bibliotecas municipais invítase a todas as persoas que desexen asistir, ata completar o aforo.

Presentación da obra "Aprendendo a vivir na túa ausencia" de Carmen Torreiro: 7 de marzo

Teatro "As Torres" (Santa Cruz)

Xoves 7 de marzo ás 19:00 h.

Intervirán: a autora, Carmen Torreiro; o escritor e editor, Xulio López Valcárcel e a psicóloga, Alma López Sande.

"Aprendendo a vivir na túa ausencia" conmovedor poemario dedicado ao seu fillo Siegfried, finado o un de marzo de 2019. 

A autora, a través destes poemas, comparte unha parte íntima da súa vida: o enfrontamento á angustia pola enfermidade mental dun ser querido e ao sufrimento pola súa perda. Recollen un mundo de emocións, de amor e dor, sentimentos universais que todos compartimos. Carmen Torreiro traballou de mestra en Salamanca, Zamora e A Coruña, profesora de Lingua e Cultura Española en Besançon, Lille e París, pintora, gravadora, ceramista, escribe desde sempre. Tamén fai teatro e canto.

Como pintora realizou exposicións individuais e colectivas en Francia e en España, tendo obra en organismos oficiais dos dous países. Como escritora publicou en revistas e en libros colectivos.

Desde as bibliotecas municipais invítase a todas as persoas que desexen asistir, ata completar o aforo.

Presentación da obra "De entre as tebras" de Alex Pernas: 29 febreiro 2024

Teatro "As Torres" de Santa Cruz

Xoves 29 de febreiro ás 19 h.

Intervirán: o autor Alex Pernas e escritor Alfonso Ricoy Devesa.

De entre as tebras é unha obra de relatos que, partindo dos seres e lugares da mitoloxía de Galicia, amosa o máis escuro da condición humana nuns textos nos que nada é o que semella.

A través de diferentes épocas e viaxando entre o urbano e o rural, fai un percorrido polo territorio galego escoitando, na propia voz de moitas das protagonistas e cos trazos dialectais que as caracterizan, a realidade que hai detrás dos contos de demos, trasnos, espíritos e meigas.

Alex Pernas desenvolve a súa carreira coma enxeñeiro de software. No ámbito cultural formou parte de varias formacións musicais, estando na actualidade na banda de metal Oymyakon. De entre as tebras é o seu terceiro libro, despois da publicación da novela Xarfas e do libro de relatos A Paga.

Desde as bibliotecas municipais invítase a todas as persoas que desexen asistir, ata completar o aforo.

21 decembro 2023: entrega de premios ás-aos usuarias-os que máis fondos bibliográficos levaron en préstamo nas Bibliotecas Municipais de Oleiros

Data: xoves 21 de decembro

Lugar: Teatro As Torres (Santa Cruz)

Hora: 18:00 h.

Na sociedade actual é necesario que as bibliotecas públicas traballen na promoción da lectura, pero tamén en atraer a todos os sectores da poboación para colaborar na consecución dunha sociedade máis culta, igualitaria e cohesionada. 

Considerando isto, desde as Bibliotecas Públicas Municipais de Oleiros, cos obxectivos de atraer a toda a poboación ás bibliotecas, fomentar a lectura e o préstamo de fondos bibliográficos, programáronse a creación duns premios ás usuarias e usuarios que máis fondos bibliográficos levasen en préstamo. 

As persoas gañadoras extráense dos datos que aporta o programa de xestión de bibliotecas, no seu módulo de préstamo, e son usuarias e usuarios de calquera das sete bibliotecas municipais de Oleiros: Biblioteca Central Rialeda en Perillo, Biblioteca Pública Municipal Rosalía de Castro de Santa Cruz, Biblioteca Pública Municipal Mª José Ruso de Dorneda, Biblioteca Pública Municipal Mª José Trincado de Mera, Biblioteca Pública Municipal Manuel María de Oleiros, Biblioteca Pública Municipal Ánxel Fole de Nós e Biblioteca Pública Municipal Xograr Mendiño de Lorbé. Son as que máis fondos bibliográficos (libros, revistas, discos e/ou DVD), relacionados coas súas idades, levaron en préstamo a domicilio durante o ano 2022.

Os premios consistirán en tarxetas regalo para adquirir libros, material informático, audiográfico ou videográfico.

Definíronse 4 categorías:

- Menores de 6 anos

- De 6 a 11 anos

- De 12 a 17 anos

- A partir de 18 anos

Para cada unha das categorías establecéronse 3 premios:

- 1º premio: Entrega dunha tarxeta regalo para adquirir libros, material informático, audiográfico ou videográfico por importe de 100 €.

- 2º premio: Entrega dunha tarxeta regalo para adquirir libros, material informático, audiográfico ou videográfico por importe de 75 €.

- 3º premio: Entrega dunha tarxeta regalo para adquirir libros, material informático, audiográfico ou videográfico por importe de 50 €.

Na categoría de “A partir de 18 anos” hai un empate no 3º premio polo que se entregarán dous premios.

*Ás 18:30 h., finalizará o acto co espectáculo de maxia titulado “Maxia de aquí e de acolá” coa actuación do mago David Méndez.

Desde as bibliotecas municipais invítase ás persoas que desexen asistir, ata completar o aforo. 

Presentación da novela "Ámame, anarquista" de Luisa G. Avecilla: 16 novembro 2023

Teatro "As Torres" de Santa Cruz
Xoves 16 de novembro ás 19 h.

Intervirán: a autora Luisa G. Avecilla e o xornalista Ricardo Sandoval.

Acompañamento musical a cargo de Gertraud Brilmayer, violinista da Orquesta Sinfónica de Galicia.
O cantautor César Morán porá música ao poema de Claudio Rodríguez Fer, Ámame anarquista.

Ámame, anarquista, é unha historia de mulleres, na que os homes se presentan como distantes e esvaradíos. A persecución dun imposible amoroso é a súa idea clave.

Dúas mulleres, en dúas épocas distintas e con temperamentos dispares, levan a busca obsesiva dunha quimera.
Inés, no primeiro terzo do século XX, embárcase na aventura de seguir os pasos do lendario anarquista leonés, Buenaventura Durruti, do que se namora perdidamente, levándoa a pasar situacións penosas e converténdoa nun elemento activo do movemento revolucionario.
Lucía, nos albores do século XXI, na súa busca interminable de Simón, non vivirá a súa vida a causa de deixarse arrastrar por unha paixón que nin ela é capaz de entender.

Luisa G. Avecilla é licenciada en Xeografía e Historia pola Universidade de Santiago de Compostela.
Ao acabar os estudos optou polo xornalismo e durante dúas décadas traballou como secretaria de redacción e redactora xefa en prensa escrita e revistas de difusión autonómica e estatais. Actualmente compaxina o seu traballo de funcionaria coa escritura.

Desde as bibliotecas municipais invítase a todas as persoas que desexen asistir, ata completar o aforo.

Recital de poesía e música con Yolanda Castaño e Isaac Garabatos: 26 de outubro 2023

Teatro “As Torres” de Santa Cruz.
Xoves 26 de outubro ás 19 h.

Intervirán: a escritora Yolanda Castaño e o músico e compositor Isaac Garabatos.

Yolanda Castaño é Premio Nacional de Poesía 2023 pola súa obra “Materia”. Segundo o xurado, o poemario “mostra unha poesía metafórica que dialoga coa memoria persoal e colectiva e, á vez, directa, radical e feminista. Explora, de forma non compracente, temas como a maternidade, a familia e os costumes, e logra sacar a realidade da súa nebulosa habitual para concretala en materia lingüística, destacando o xogo verbal e rítmico que cuestiona o establecido”.

Yolanda Castaño é poeta, filóloga e unha activa xestora cultural, coa súa propia residencia para escritoras e escritores na Coruña. A súa ampla e premiada obra está dispoñible nas Bibliotecas de Oleiros.

Isaac Garabatos é un dos músicos e compositores máis versátiles do panorama musical galego. Realizou traballos para obras de danza, teatro, curtametraxes e grupos de diversos estilos musicais.

Desde as bibliotecas municipais invítase a todas as persoas que desexen asistir, ata completar o aforo