O proxecto titúlase “Rialeda: literatura e música para cambiar o mundo” e nel describíronse as actividades de promoción da lectura e de extensión cultural planificadas pola Biblioteca Central Rialeda (Perillo), que se levaron a cabo entre os meses de marzo de 2023 a xuño de 2024.
Para atraer a toda a poboación organizáronse actividades de fomento da lectura e dinamización cultural dirixidas a todos os sectores e idades, promovendo a igualdade de oportunidades no acceso ao libro e á lectura, fomentando a conciencia ambiental e a igualdade entre mulleres e homes. Realizáronse programas específicos con crianzas, adolescentes, mocidade e persoas adultas, traballando o fomento da lectura, a integración de todos os sectores sociais e a protección da natureza.
Entre todas, podemos destacar:
As actividades dirixidas ao alumnado dos centros de ensino como os talleres de escritura e obradoiros de poesía pola poeta Maribel Andrés, recitais de poesía e contacontos en verso pola tamén poeta Yolanda Castaño, “Achegamento á poesía española” ou “Poéticas galegas” a cargo da actriz Chus Álvarez, obradoiros de banda deseñada e ilustración polos ilustradores Miguel Cuba e Óscar Villán, As Metamorfoses de Ovidio por Charo Pita, concertos musicais por Pablo Díaz, contacontos a cargo de Galeatro, A Xanela do Maxín, Trinke Trinke Teatro, Ramiro Neira, Trémola Teatro, etc.
Visitas guiadas á Biblioteca Central Rialeda e contacontos “Feirantes” partindo da adaptación dun relato de "Os outros feirantes" de Álvaro Cunqueiro.
Conmemoración de datas significativas como o Día das Letras Galegas con “Luisa Villalta: entre o violín e a poesía” por Charo Pita ou “A pequena Luisa” por Ramiro Neira, o Día de Rosalía con “A miña historia” a cargo de Trémola Teatro, o Día da Poesía con “Muller, poeta en galego” con Yolanda Castaño, o Día da Muller con “8 (M)ulier” de Trémola Teatro, o Día do Libro Infantil e Xuvenil con “Voar sen medo” por Chus Álvarez, etc.
A hora do conto para crianzas, as Recomendacións de libros en Radioleiros, a entrega de premios ás-aos socias-os máis lectoras-es das bibliotecas municipais, encontros con escritoras-es e presentacións de libros, roteiros literarios, clubs de lectura e Tertulias literarias, exposicións bibliográficas, etc.
Entre os 634 proxectos presentados por bibliotecas de municipios con menos de 50.000 habitantes de todo o Estado Español, seleccionaron 370 nos que se recoñecen as mellores iniciativas de promoción lectora a nivel de todo o Estado e 10 premios especiais. Nesta selección figura o proxecto presentado polas Bibliotecas Municipais de Oleiros.
O premio consiste en 2.772,22 € que se destinarán á adquisición de libros para as bibliotecas municipais, en función das súas necesidades, e para completar os seus fondos bibliográficos en beneficio de toda a veciñanza do municipio.
Grazas por participar nas nosas actividades, grazas por facer biblioteca!!
