24/11/12

RIALEDA CUMPRE CEN ANOS 1912-2012!!!

O edificio Rialeda, do prestixioso arquitecto Rafael González Villar (1887-1941), autor de numerosos proxectos arquitectónicos na cidade da Coruña e o seu entorno, chega ao seu centenario. Rialeda é un edificio modernista. Unha casa moi atrevida no seu tempo, inspirada no movemento europeo da "Sezzesion vienesa", adaptada aos gustos da nacente burguesía urbana que comezaba a construír espléndidas casas de campo. Torres, ángulos, óvalos, claroescuros, azulexos, cores rechamantes... fan de Rialeda unha peza con engado.
Esta singular construción é desde o 21 de novembro de 1998 sede da Biblioteca Central Rialeda, cabeceira do Sistema de Bibliotecas Públicas Municipais do Concello de Oleiros, con premios como o da Irmandade do Libro, no ano 2012, na modalidade de Fomento da lectura, concedido pola Federación de Libreiros de Galicia ou o Premio Nacional María Moliner, no 2011, na categoría de Animación á lectura, concedido polo Ministerio de Cultura. O edificio, catalogado como patrimonio histórico-artístico municipal, está rodeado dun fermoso xardín con gran diversidade de árbores, no que destacan un cedro do Himalaia (cedrus deodara) e frondosos tileiros (tilia cordata). Ademais da xoia arquitectónica que representa o edificio en si mesmo, a Biblioteca Central Rialeda alberga na sala infantil un mural realizado, no ano 2009, polo ilustrador e prestixioso autor de banda deseñada Miguelanxo Prado.
Avanzamos os actos previstos para a conmemoración do centenario de Rialeda e aos que estades convidadas/os (todos terán lugar na Biblioteca Central Rialeda, en Perillo):
ACTIVIDADES INFANTÍS:
Todas as actividades para nenas e nenos serán ás 18:30 horas
Luns, 10 de decembro: Contacontos a cargo da actriz Soledad Felloza
“Ventá máxica”. Para menores de 4 anos.
Martes, 11 de decembro: Contacontos a cargo da actriz Paula Carballeira
“Contos para unha tarde de outono”. Para menores de 8 anos.
Xoves, 13 de decembro: Espectáculo de maxia a cargo do mago Chrystyan Magic
“Atrapado na torre”. Para nenas/os a partir de 10 anos.
Venres, 14 de decembro: Contos e cancións a cargo da Compañía Migallas
“Cantacontos”. Para nenas/os a partir de 8 anos.
ACTIVIDADES PARA MOZAS/OS E ADULTAS/OS:
Mércores, 12 de decembro, ás 20 horas
Mesa redonda: Ángel García Seoane, alcalde de Oleiros; Henrique Seoane, arquitecto, coa presentación titulada “Rafael González Villar e a súa elegante arquitectura" e o escritor Manuel Rivas, co relatorio titulado “Resistencia erótica do libro”, e a actuación do Trío de Vento de Alumnos/as da Escola Municipal de Música do Concello de Oleiros.

Hora do conto: de 26 a 30 de novembro

Aquí tes a programación da hora do conto de 26 a 30 de novembro. Todas as sesións darán comezo ás 18:30 horas.

Biblioteca Pública Municipal "Mª José Ruso". Dorneda
Luns 26 de novembro
CONTACONTOS: Ramiro Neira
TÍTULOS: "A illa das dúas caras", "A fada sen as", "Engurras"


Biblioteca Pública Municipal "Rosalía de Castro". Santa Cruz
Mércores 28 de novembro
CONTACONTOS: Caxoto
TÍTULOS: Contos para longas noites

Biblioteca Central "Rialeda". Perillo
Xoves 29 de novembro
CONTACONTOS: Pablísimo
TÍTULOS: Contos de sobremesa: "Non fagas iso", "Os narices reais", "Historia dun home"

Biblioteca Pública Municipal "Ánxel Fole". Nós
Venres 30 de novembro
CONTACONTOS: Soledad Felloza
TÍTULOS: Ya huele a Navidad: “Sueños de nieve”, “La palabra que se fue de vacaciones”, “Luna llena”
(AVISO: Os títulos programados poden sufrir variacións en función do público asistente)

23/11/12

Tertulia literaria en Santa Cruz: 26 de novembro

Na Biblioteca e Centro de Documentación da Muller "Rosalía de Castro" de Santa Cruz.

De 18,30 a 20 horas.

- Comentario da obra "Memorias de Adriano" de Marguerite Yourcenar.
- Entrega de "Todo cuanto amé" de Siri Hustvedt.

Obras de Margueritte Yourcenar nas bibliotecas do Concello de Oleiros.

Recomendacións en Radioleiros: 23 de novembro

- Infantil (menores de 6 anos):
"Papá, por favor, achégame a lúa" de Eric Carle, editado por Kalandraka.
Mónica quere coller a lúa para xogar con ela. O pai buscou unha longa escada e levouna ata unha montaña moi alta, chantouna na parte superior e subíu e subíu...
Deliciosa obra, cunhas magníficas e coloridas ilustracións, xunto con despregables e textos curtos.
- Mozas/os e adultas/os:
"Los enamoramientos" de Javier Marías, en Alfaguara
Premio Nacional de Narrativa 2012, que o escritor rexeitou porque dixera en diferentes ocasións que non recibiría ningún premio institucional, engadindo que eses cartos (20.000 €) os podían entregar ás bibliotecas públicas. A revista Babelia elixíuno como o 1º dos 25 mellores libros do ano 2011.
É unha interesante novela narrada en primeira persoa por María Dolz, na que nos presenta a Miguel Desvem e a súa muller, Luisa. María coincidía con esta parella na cafetería a que ela acudía diariamente e parecían estar moi namorados. Pero un día deixou de velos, preguntou, e é cando soubo que el fora asasinado, en plena rúa do centro de Madrid, por un aparcacoches demente que o confundíu con outra persoa.
Segundo explica o autor, é un libro sobre o estado do namoramento, considerado como algo positivo e que parece xustificar todas as cousas: as accións máis nobres e desinteresadas, pero tamén moitas ruindades e as dificultades de castigar á persoa que amas. É tamén unha obra sobre a impunidade e a inconveniencia de que os mortos poidan volver, aínda que se sentira profundamente a súa perda. Neste aspecto, na novela fai unha comparación co relato de Balzac “El Coronel Chabert”.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.