Boletín de novidades 11 outubro 2017

Kazuo Ishiguro, Nobel de Literatura 2017

O escritor británico Kazuo Ishiguro é o gañador do Nobel de Literatura 2017. O premio está dotado cunha medalla de ouro, un diploma acreditativo e unha cantidade en metálico de 819.000 euros.
Ishiguro, de 62 anos, impúxose sobre nomes como Margaret Atwood, Ngugi Wa Thiong'o e Haruki Murakami.
 
"Se mesturas a Jane Austen e Kafka, sae Kazuo Ishiguro". A portavoz da Academia Sueca, Danius describíu ao autor nacido en 1954 en Nagasaki (Xapón), e nacionalizado no Reino Unido como "alguén que, en novelas de gran forza emocional, descubríu o abismo baixo o noso sentimento ilusorio de pertenza ao mundo".
Ishiguro comezou escribindo guións para series de televisión e debutou tarde na novela, polo que a súa bibliografía é unha das máis curtas que condecorou o Nobel de Literatura. A abundancia non é un requisito para a calidade, e deste xeito, o xornal The Times destacouno entre os 50 escritores británicos máis importantes desde 1945.
 
Os seus temas máis recorrentes son a memoria, o tempo e a desilusión do ser humano, sinte unha debilidade especial por periodos como o Xapón da posguerra, nazismo e certas etapas anteriores á II Guerra Mundial. Todo isto toma forma na súa novela máis famosa, "Lo que queda del día", pola que gañou o Man Booker Prize en 1989, máis tarde adaptada ao cine por James Ivory e protagonizada por Anthony Hopkins, onde o actor dá vida a un mordomo obsesionado co cumprimento do deber.
Os seus libros máis recentes son de corte fantástico. Coa distopía "Non me deixes nunca = Nunca me abandones", Ishiguro introducíu unha corrente de ciencia ficción no seu traballo.
Na súa última novela, "El gigante enterrado" (2015), unha parella de anciáns inicia un road trip para atoparse co seu fillo, ao que non viron durante anos. O británico, residente en Londres, explora cun tono emotivo como a memoria se relaciona co olvido, a historia relaciónase co presente e a fantasía, coa realidade.

As bibliotecas municipais de Oleiros adicamos exposicións bibliográficas coas obras de Ishiguro para que podas levalas en préstamo. 

Info obtida en  www.eldiario.es

Parabéns Ishiguro!!!

Inicio 1º trimestre na Tertulia Literaria de Santa Cruz

Biblioteca e Centro de Documentación da Muller "Rosalía de Castro"
Hora: 17,30 a 19 h.

Comenzamos o 1º trimestre coa seguinte programación:

- "Canadá" de Richard Ford
- "Mentiras de mujeres" de Liudmila Ulítskaya
- "Alguien" de Alice McDermott
- "Lourenço, xograr" de Manuel Portas
- "Intemperie" de Jesús Carrasco

Datas:
- Outubro: días 9 e 23
- Novembro: días 6 e 20
- Decembro: día 11

Nestes intres o grupo está completo. As novas solicitudes pasarán a formar parte da lista de espera.

Recepción do Premio Liber 2017 ao fomento da lectura concedido ás Bibliotecas de Oleiros

O día de onte, María Luz Corral Uzal, bibliotecaria municipal do Concello de Oleiros recibíu o Premio Liber 2017 ao fomento da lectura en bibliotecas abertas ao público que concede a Federación de Gremios de Editores de España.

O acto tivo lugar na Feria Internacional del Libro que se celebra no recinto do IFEMA de Madrid.

A Federación de Gremios de Editores de España (FGEE) está formada polo 90% das editoriais privadas do Estado español.

A Xunta Directiva da FGEE quixo recoñecer con este galardón “a intensa dedicación chea de actividades nunha área de poboación dispersa, así como a posta a disposición da poboación de máis de catrocentos postos de lectura e uns fondos bibliográficos moi superiores á media nacional”. 

A bibliotecaria municipal, rodeada do resto de galardoados/as co Premio Liber 2017

 Artigo en "La Opinión de A Coruña"

Ler conta moito e actividades infantís: de 9 a 13 de outubro 2017

Todas as sesións se celebrarán ás 18:30!!!
Biblioteca Pública Municipal “Manuel María”. Oleiros
Martes 10 de outubro
Para nenas-os a partir de 3 anos (imprescindible reservar praza, tlf.: 981 610 700)
CONTACONTOS: Pablísimo
TÍTULO: “Contiario”
 
Biblioteca Pública Municipal “Rosalía de Castro”. Santa Cruz
Mércores 11 de outubro
Para nenas-os a partir de 1 a 3 anos (imprescindible reservar praza, tlf.: 981 626 338)      
CONTACONTOS: Ramiro Neira
TÍTULO: “Canto conto!!!” 

Algúns destes actos están incluídos no programa

da Rede de Bibliotecas de Galicia

Recomendacións en Radioleiros: 6 outubro 2017

- Infantil (de 8 a 10 anos):
"Dadá, o amigo invisíbel" de Xavier Frías Conde. Editado por Galaxia
Tras a morte da súa muller, Lino volcouse no seu papel de pai e nai do seu único fillo, Nero. A dura experiencia pola que acababan de pasar había uns meses fixo que Lino levara a Nero a visitar ao psicólogo quen lle aconsellou que fose comprensivo co rapaz e que pasasen tempo xuntos. Por iso, cando o neno lle presentou ao seu amigo invisible, Lino non lle deu moita importancia. Pero na viaxe que estaban a punto de emprender non ían ir sós…

- Mozas-os e adultas-os:
"La tía Mame" de Patrick Dennis. En Acantilado
Esta novela é máis ben unha serie de relatos que transcorren ao longo dun cuarto de século durante o que teñen que convivir o protagonista e a súa tía Mame. De como este personaxe inolvidable da tía lle complica a Patrick a existencia a cada paso que dá, convertindo a súa vida nunha aventura divertida e excitante. Novela amena, optimista, que transmite alegría de vivir e reivindica os lazos familiares, pero sen caer xamáis en sentimentalismos.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Parabéns, Antonio!!!

Bibloleiros celebra o Premio Nacional de Literatura Infantil e Xuvenil 2017 outorgado a Antonio García Teijeiro polo seu libro "Poemar o mar". Na Biblioteca Central Rialeda temos unha exposición cos seus libros. Anímate a levalos en préstamo e gozar dos seus poemas!!!

O xurado premiou o autor e o seu libro “por ser un texto cargado de emoción, cunha brillante elección léxica, onde o mar é o gran protagonista, poboado de criaturas que transitan por orixinais e suxerentes composicións poéticas”.

"Esta distinción pon en valor simultaneamente un libro de extraordinario valor literario e unha traxectoria de máis de trinta anos dedicada á poesía, e supón un recoñecemento colectivo ao valor da LIX galega actual como unha das mellores do Estado". Berta Dávila en praza.gal                                                      
                                                              
                                                              TEN trenzas
                                                                                 o mar?

                                                               Pois claro que si
                                                                    ten trenzas de escuma
                                                                    trenzadas na bruma
                                                                    ten trenzas con algas
                                                                    trenzadas nas malvas
                                                                    ten trenzas de noiva
                                                                    trenzadas na choiva
                                                                    ten trenzas de vidro
                                                                    trenzadas nun libro
                                                                    ten trenzas de fume
                                                                    trenzadas no lume
                                                                    ten trenzas de leiras
                                                                    trenzadas nas veigas.

                                                               Ten trenzas
                                                                                 o mar?
                                                               Si, si...
                                                               que eu llas vin,
                                                               por elas subín
                                                                             e non tiñan fin.

                                                                                                        PARABÉNS, ANTONIO!!!

Entrega do Premio Liber 2017 ao fomento da lectura ás Bibliotecas de Oleiros!!!

O Sistema de Bibliotecas Públicas Municipais do Concello de Oleiros recibirá o Premio Liber 2017 ao fomento da lectura en bibliotecas abertas ao público que concede a Federación de Gremios de Editores de España. Este acto terá lugar en Madrid, o día 5 de outubro, no marco da Feria Internacional del Libro.
A Federación de Gremios de Editores de España (FGEE) está formada polo 90% das editoriais privadas do Estado español.
As bibliotecas municipais de Oleiros, xunto co seu importante fondo bibliográfico, e as numerosas actividades de promoción da lectura que se desenvolven ao longo do ano foron determinantes para a concesión deste importante premio.
A Xunta Directiva da FGEE quixo recoñecer con este galardón “a intensa dedicación chea de actividades nunha área de poboación dispersa, así como a posta a disposición da poboación de máis de catrocentos postos de lectura e uns fondos bibliográficos moi superiores á media nacional”.

Neste acto tamén se entregarán:
Premio ao mellor autor hispanoamericano ao escritor Javier Marías.
Premio Boixareu Ginesta ao libreiro do ano á Librería Lé de Madrid.
Premio ao fomento da lectura en medios de comunicación ao suplemento “Cultura” do xornal asturiano “La Nueva España”.
Premio á mellor adaptación dunha obra literaria a Juan Antonio Bayona por “Un monstruo viene a verme”.
Finalmente, o editor Emiliano Martínez recibirá a Homenaxe desta edición que concede a Feria Internacional del Libro e a FGEE. 

Agradecemos á Federación de Gremios de Editores de España a concesión deste galardón e ofrecémolo a todas as persoas que utilizan as bibliotecas municipais de Oleiros, ás que participan nas nosas actividades, que gozan das nosas bibliotecas e que contribúen a ampliar o horizonte do libro e a lectura!!!
Moitas grazas!!!

Ler conta moito e actividades infantís: de 2 a 6 de outubro 2017

Todas as sesións se celebrarán ás 18:30!!!

Biblioteca Pública Municipal “Mª José Ruso”. Dorneda
Luns 2 de outubro
Para nenas-os a partir de 4 anos (imprescindible reservar praza, tlf.: 981 626 638) 
CONTACONTOS: Paco Nogueiras
TÍTULO: “Brinca vai!: de aquí a acolá”

Biblioteca Pública Municipal “Manuel María”. Oleiros
Martes 3 de outubro
Para nenas-os a partir de 3 anos (imprescindible reservar praza, tlf.: 981 610 700)
CONTACONTOS: Pavís Pavós
TÍTULO: “Contos que deixan pegada”

Biblioteca Pública Municipal “Rosalía de Castro”. Santa Cruz
Mércores 4 de outubro
Para nenas-os a partir de 4 anos (imprescindible reservar praza, tlf.: 981 626 338)      
CONTACONTOS: Elefante Elegante
TÍTULO: “O xigante” 

Biblioteca Central Rialeda. Perillo 

Xoves 5 de outubro
Para nenas-os de 7 a 12 anos (imprescindible reservar praza, tlf.: 981 639 511)      
MONITORADO: Teatro Ghazafellos
OBRADOIRO: “Camiñando entre estrelas”

Biblioteca Pública Municipal "Xograr Mendiño". Lorbé

Xoves 5 de outubro
Para nenas-os a partir de 6 anos (imprescindible reservar praza, tlf.: 981 618 201)      
MONITORADO: Ciencia en ruta
OBRADOIRO: “Obradoiro de submarinos”

Biblioteca Pública Municipal "Mª José Trincado". Mera

Venres 6 de outubro
Para nenas-os a partir de 4 anos (imprescindible reservar praza, tlf.: 981 628 507)      
MONITORADO: Pedras: artesanía e patrimonio
OBRADOIRO: “A galiña dos ovos de conto”

Biblioteca Pública Municipal "Ánxel Fole". Nós

Venres 6 de outubro
Para nenas-os a partir de 1 a 3 anos (imprescindible reservar praza, tlf.: 981 664 257)      
CONTACONTOS: Charo Pita
TÍTULO: “O curral de cocoricoricó”

Algúns destes actos están incluídos no programa 

da Rede de Bibliotecas de Galicia

44 sesións de actividades de promoción da lectura e Ler conta moito de outubro a decembro!!!

Unha tempada máis, as Bibliotecas Municipais de Oleiros organizan actividades de promoción da lectura dirixidas a nenas e nenos. Entre os meses de outubro a decembro, nas sete bibliotecas municipais levaranse a cabo 44 sesións de diferentes actividades infantís para fomentar á lectura e animar a que as nenas e os nenos visiten as bibliotecas no seu tempo libre. Levarase a cabo a programación de Ler conta moito, os bebecontos, a hora do conto así como diversas actividades e obradoiros para adolescentes. Os folletos e carteis están distribuídos en todos os colexios de ensino público de Oleiros e tamén nas sete bibliotecas municipais.
Ler conta moito é un programa de dinamización da lectura nas bibliotecas públicas promovido pola Secretaría Xeral de Cultura da Xunta de Galicia, a través da Rede de Bibliotecas Públicas de Galicia e en colaboración coas Bibliotecas Municipais de Oleiros.
 

A hora do conto é unha actividade tradicional nas Bibliotecas Municipais de Oleiros na que se levan a cabo diferentes sesións de narración oral dirixidas a nenas e nenos menores de 10 anos. Cóntanse ou dramatízanse un ou varios contos, cun enfoque lúdico e unha vivencia activa e participativa cos libros, fomentando a creatividade, como unha invitación a viaxar a un mundo máxico de imaxinación e fantasía.
Bebecontos son contacontos dirixidos a nenas e nenos de 1 a 3 anos.
Con esta programación as nenas e os nenos poderán escoitar e gozar cos contacontos, fomentar a creatividade con distintos obradoiros: de cómic, de scrapbooking, de maxia, de creación de teatriños de papel, de autoedición...,  divertirse e aprender con sinxelos experimentos científicos como os obradoiros sobre submarinos, coñecer a formación dos planetas e estrelas ou entreterse con espectáculos de maxia.
As sesións levaranse a cabo, preferentemente, ás 18:30 horas, excepto algúns obradoiros que terán lugar ás 17:30 h. e que se avisan na propia actividade.
 

O aforo é limitado en todas as actividades, polo que é imprescindible reservar praza

na biblioteca correspondente, tanto indo persoalmente como chamando por teléfono. Poderanse inscribir desde 10 días antes da data de realización da actividade.

Os obxectivos que se intentan conseguir son a promoción da lectura, que as nenas e os nenos participantes se divirtan escoitando contos, facer novas lectoras e lectores ou consolidarlles este hábito, que descubran a diversidade dos libros e o pracer pola lectura e que vivan o libro en colectividade xunto con outras nenas e nenos.

Participarán o Mago Albert, Pallaso Piruleta & CIA, Ciencia en ruta, Soledad Felloza, Elefante Elegante, Mamá Cabra, Pablísimo, Sonia Ojea, Gemola, Juan Juste, Chus Álvarez, Teatro Ghazafelhos, Migallas, Gargallando, Manel Cráneo, Pavís Pavós, Pedras: artesanía e patrimonio, Chrystyan Magic, Paco Nogueiras, OQO, Pakolas, Carmen Domech, Marisa Irimia, Caxoto, Efervesciencia, Charo Pita, Ramiro Neira e Paula Carballeira.

Preténdese introducir ás nenas e aos nenos no mundo dos libros a través dunha lectura que poidan comprender, coa que gocen e se entreteñan. Tratarase de espertar unha sensibilidade que faga descubrir o pracer que pode proporcionar a lectura, que os nenos e as nenas vexan que tamén se poden divertir e pasar momentos moi agradables cos libros.
Para calquera información que precisen sobre estas sesións poden chamar por teléfono á Biblioteca Central Rialeda 981 639 511 ou a calquera das demais bibliotecas municipais.   

Recomendacións en Rialeda: 29 setembro 2017

- Infantil (a partir de 6 anos):
"El gran libro del cuerpo" texto de Mary Hoffman e ilustrado por Ros Asquith. En Juventud.
Un libro informativo e ameno dirixido aos primeiros lectores, que ofrece datos, curiosidades e ilustracións atractivas e moi clarificadoras sobre as partes do corpo.
As ilustracións a toda cor, que neste libro son moi importantes, mostran de maneira moi visual como as formas e tamaños do corpo van transformándose.
É un bo libro cheo de información que axuda a coñecernos e a integrarnos nunha comunidade de iguais pero distintos, onde a diferencia enriquece.
 

- Mozas e adultas-os:
"Era por setembro" de Xabier Quiroga. Editado por Xerais.
A protagonista, Aldara, recente ministra dun hipotético goberno español de esquerdas viaxa desde a capital á súa vila natal para asistir ao enterro dun dos seus seres máis queridos, ao enterro da súa nai.
A medida que o tren achega á cidade, os recordos non tan lonxanos van renacendo de novo no seu maxín, recordos que a levan a un pasado que realmente definiu a súa vida e a súa personalidade, dirixíndoa cara o que hoxe é.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Tertulias Literarias en Rialeda e Santa Cruz: inscrición a partir do mércores 27 de setembro

 BIBLIOTECA CENTRAL RIALEDA

O prazo de inscrición para as Tertulias literarias na Biblioteca Central Rialeda ábrese o mércores 27 de setembro ás 8,15 h.*

A inscrición poderá facerse dos seguintes xeitos:
- A través da páxina web do Concello de Oleiros.
- Persoalmente na Biblioteca Central Rialeda.
- Por teléfono (981 639 511) no horario da biblioteca (luns a venres de 8,15 a 21,15 h.).

40 prazas por orde de inscrición. As 20 primeiras solicitudes constituirán o grupo A e as 20 restantes o grupo B.

As persoas que queden sen praza entrarán a formar parte dunha lista de espera, sendo avisadas cando haxa unha vacante.


BIBLIOTECA E CENTRO DE DOCUMENTACIÓN DA MULLER "ROSALÍA DE CASTRO". SANTA CRUZ

A inscrición para as Tertulias literarias na Biblioteca de Santa Cruz ábrese o mércores 27 de setembro ás 10 h.*

A inscrición poderá facerse dos seguintes xeitos:
- Persoalmente na Biblioteca de Santa Cruz.
- Por teléfono (981 626 338) no horario da biblioteca (martes a xoves de 10 a 13,30 h.; luns a venres de 16 a 20 h.; primeiro e terceiro sábado de mes de 10 a 14 h.).

20 prazas por orde de inscrición. As persoas que queden sen praza entrarán a formar parte dunha lista de espera, sendo avisadas cando haxa unha vacante.


*Non se admitirán solicitudes previas á data sinalada.

IMPORTANTE: A inscrición en liña está dispoñible únicamente para as tertulias da Biblioteca Rialeda.

Poden inscribirse todos/as os/as maiores de 16 anos que desexen participar.

Comentaranse obras de distintos xéneros literarios, principalmente narrativa contemporánea, pero tamén se le poesía, teatro e ensaio, nun ambiente de familiaridade, procurando o lado formativo e á vez, lúdico da lectura.

O principal obxectivo é animar a ler lendo, gozar da literatura como un desenvolvemento da capacidade de creación e comunicación a través da lectura, de maneira que compartindo ideas, reflexionando sobre temas diversos poidamos enriquecernos cos diferentes puntos de vista.

As programacións inclúen obras de autoras e autores da literatura galega, española e internacional.

Datas de inicio da actividade:
- Grupo A de Rialeda: mércores 25 de outubro, das 17,30 ás 19,30 h.
- Grupo B de Rialeda: mércores 18 de outubro, das 17,30 ás 19,30 h.
- Tertulia de Santa Cruz: luns 9 de outubro, das 17,30 ás 19 h

As sesións teñen un carácter quincenal. A actividade remata no mes de xuño de 2018

Recomendacións en Radioleiros: 22 setembro 2017

- Infantil (6 a 8 anos):
"Os monstros grandes non choran" de Kalle Güettler, Rakel Helmsdal, Áslaug Jónsdóttir. En Sushi Books.
A habilidade de Monstro Pequeno choca con Monstro Grande que é tremendamente zoupón e ponse moi triste. Que fará para atoparlle unha solución?... Unha historia sobre a amizade e o comportamento dirixida ás máis pequenas-os.

 
- Mozas-os e adultas-os:
"Pasteles sin horno: 30 propuestas veganas, sin azúcar y sin gluten" de Joanna Farrow. Editado por Blume.
Receitas simples que non requiren forno pensadas para todas-os e aptas para persoas que optan ou necesitan unha dieta distinta. Textos moi claros acompañados dunha fotografía coidada.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Recomendacións en Radioleiros: 15 setembro 2017

- Infantil (menores de 6 anos):

La historia de Dracolino, de Begoña Ibarrola
SM

Dracolino era un dragón descendente da única familia de dragóns que quedaba en todo o territorio coñecido. Todos esperaban del que fose un dragón que asustase a todos os habitantes lanzando enormes lumeradas pola boca ao igual que os seu pais. Así que cando Dracolino, en vez de lume, o único que coseguíu emitir foron fermosos e melodiosos asubíos, a vergoña que sentiu foi enorme.

Trátase dun conto que pode axudar aos máis pequenos e pequenas a canalizar o sentimento da vergoña.

- Mozos/as e adultos/as:

Crónica Córnica, de Francisco Coimbra
Xerais

Unha soprendente novela arredor da recuperación dunha lingua extinguida, o córnico, no condado de Cornualles en Gran Bretaña.

Unha mañán dun día calquera, a case totalidade da poboación de Cornualles se levanta falando, non en inglés, como viñan facendo dende sempre, senón nunha lingua considerada extinguida, o córnico. O Estado británico non está disposto a toleralo e todos os habitantes desta rexión son acusados de subversivos, tratados de terroristas e fortemente reprimidos.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Recomendacións en Radioleiros: 8 setembro 2017

- Infantil (menores de 6 anos):
"O fío" texto de Gracia Iglesias e ilustracións de Rosa Osuna. En Kalandraka.
Un fío solto na chaqueta dá comezo a este conto para cativas-os con moi pouco texto e unhas ilustracións moi coidadas. Final aberto propicio para comentar coas-os lectoras-es.

 
- Mozas-os e adultas-os:

"Cuervos" de John Connolly. Editado por Tusquets.
O secuestro dunha menor crúzase na vida profesional de Charlie Parker, un investigador privado maltratado pola vida e o seu medio. Violencia e intriga no estado de Maine nunha novela negra con varias direccións.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.