Recomendacións en Radioleiros: 9 xullo 2021

- Infantil (de 12 anos en adiante):

"De como o Santo dos Croques se fai peregrino" de Pepe Carballude. En SM.

A escultura do Mestre Mateo e un par de figuras do Pórtico da Gloria cobran vida e póñense a facer o Camiño de Santiago o cal provoca un problema de carácter policial. Humor e imaxinación neste libro pertencente á mostra “Segue a frecha” que podes ver actualmente en Rialeda.

- Mozas-os e adultas-os:

"Hijos de Febrero" de Alan Parks. Editado por Tusquets.

O Glasgow dos primeiros setenta é a paisaxe desta trama policiaca que nos trae ao axente Harry McCoy. Unha cidade obreira nun frío mes de febreiro que nos levará varias décadas atrás sempre acompañados de té, tabaco e cervexa.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Leo Leiño en Ler conta moito na Biblioteca Municipal Xograr Mendiño (Lorbé) 08/07/2021

Gravación do espectáculo “A peregrina máxica” que puidemos ver na sesión de Ler conta moito na Biblioteca Municipal Xograr Mendiño (Lorbé) o 8 de xullo a cargo de Leo Leiño.

Podes velo (ata as 11:30 do 11/07) clicando nesta ligazón: QueroContosDeLeoLeiño!

Lecturas de verán para rapazada inqueda na Biblioteca Rosalía de Castro (Santa Cruz)

Se estás aburrida-o, cansa-o, se necesitas que alguén che cambie ese día “non tan bo”, desde a Biblioteca Municipal Rosalía de Castro (Santa Cruz), Ana e Mª José, estamos decididas a axudarche con estas pílulas de vitamina lectora.

Achégate ata a biblioteca e seguro que atoparás ese libro “diferente”!!!

Clica na imaxe e verás os títulos que non te poderás perder.

Presentación do libro “La serenidad y las palabras” de Miguel A. Castro

O pasado xoves 1 de xullo realizouse a presentación do libro “La serenidad y las palabras” de Miguel A. Castro, no Teatro As Torres (Santa Cruz), organizado polo Sistema de Bibliotecas Municipais do Concello de Oleiros.

Presentou o acto a concelleira de Cultura Esther Garrido, que fixo referencia á importancia de actos como este no que escritoras-es noveles se dan a coñecer e que cobran máis trascendencia cando son veciñas-os do Concello.

Seguiron as intervencións de Héctor J. Castro, sobriño do autor e tamén escritor, e do propio autor que fixo unha semblanza da novela. 

Desvelounos unha historia de amor literario, que ten como fío condutor a un narrador que parte da infancia para evocar, percibir e soñar desde a distancia e o esquecemento.

Podes ver algunha foto deste acto clicando na imaxe.

Natureza na Biblioteca Municipal Mª José Trincado (Mera)

Este verán, máis que nunca, natureza na Biblioteca Municipal Mª José Trincado (Mera)!!!

Agora que voltamos ao contacto coa natureza polos beneficios para a nosa saúde física e psíquica, desde a Biblioteca de Mera animámosvos a visitar a nosa mostra de libros sobre natureza, especialmente dirixida á rapazada e as súas familias.

Ler conta moito en xullo: maxia en Lorbé e contacontos en Oleiros

No mes de xullo poderás gozar de dúas sesións de Ler conta moito:

- Biblioteca Municipal Xograr Mendiño (Lorbé)
Xoves 8 de xullo
Imprescindible reservar praza, tlf.: 981 618 201
Maxia para nenas-os a partir de 6 anos con Leo Leiño co espectáculo “A peregrina máxica”.

- Biblioteca Municipal Manuel María (Oleiros)

Martes 20 de xullo
Imprescindible reservar praza, tlf.: 981 610 700
"Contos do mundo" para nenas-os a partir de 6 anos con Solidariedade Internacional de Galicia.

Recomendacións en Radioleiros: 2 xullo 2021

- Xuvenil:

Atranco no banco, de Manuel Núñez Singala
Galaxia, 2020

Versión dixital en Galiciale

Comedia teatral baseada nun feito real acaecido hai anos: un director dun banco e o seu irmán son detidos por atracar a súa oficina. Catro personaxes que Núñez Singala regálanos nun enredo disparatado nunha mañá dun domingo.

- Mozas/os e adultas/os:

Los amnésicos: historia de una familia europea, de Géraldine Schwarz
Tusquets, 2020

A autora, filla de alemán e francesa, estuda o comportamento dos seus avós na Alemaña dos anos trinta nunha investigación que chega aos tempos actuais e supón unha interesante aportación á Europa contemporánea.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

Películas con orgullo na Biblioteca Rosalía de Castro (Santa Cruz)

Os disturbios de Stonewall supuxeron un antes e un despois na loita polos dereitos da comunidade LGTBIQ+. A madrugada do 28 de xuño de 1969, o que comezou como unha redada policial rematou por convertirse nun movemento que mobilizou a milleiros de persoas que, por medo, permaneceran escondidas durante anos.

Desde a Biblioteca Municipal Rosalía de Castro (Santa Cruz) unímonos a esta celebración pola diversidade sexual recomendando unha pequena selección de películas relacionadas coa temática LGTBIQ+

1 xullo en As Torres (20 h.): Presentación de “La serenidad y las palabras” de Miguel A. Castro

Lugar: Teatro As Torres (Santa Cruz)
Día e hora: xoves 1 de xullo ás 20 h.
Entrada libre (ata completar capacidade permitida)

Intervirán: Miguel A. Castro (autor), Héctor J. Castro (escritor)

“La serenidad y las palabras” é unha novela publicada pola editorial Adarve, na que un narrador indaga nos aspectos relevantes da súa vida, partindo da infancia ata o momento actual, tendo a temática amorosa como fío condutor.
Unha obra que trata sobre a necesidade de amar, pero tamén da necesidade de esquecer.

Miguel A. Castro é licenciado en Arqueoloxía e Prehistoria pola Universidade de Santiago de Compostela. Traballou en diversos proxectos arqueolóxicos. Actualmente traballa nunha entidade financeira.

En atención ás indicacións e medidas de seguridade fronte ao COVID-19, a presentación terá aforo limitado e será obrigatorio  manter a distancia de seguridade e asistir con máscara, así como atender ás indicacións e normas da organización.

Desde as bibliotecas municipais invítase ás persoas que desexen asistir ata completar o aforo permitido.

Recomendacións en Radioleiros: 25 xuño 2021

- Infantil (a partir de 8 anos):

As pombas de Bastián, de María Canosa e ilustrado por Noemí López
Xerais, 2021

Versión dixital en Galiciale

Minia observa a diario como un home lles dá de comer ás pombas da rúa. A partir do primeiro encontro xurdirá unha fermosa amizade.

- Mozas/os e adultas/os:

Tirar del hilo, de Andrea Camilleri
Salamandra, 2020

Falecido no 2019, Camilleri é unha referencia mundial na novela negra. O seu personaxe Montalbano é de novo testemuña dunha crise humanitaria e ten que investigar a morte dunha modista en Vigàta.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

"Un verán para explorar" na Biblioteca Mª José Ruso (Dorneda)

Este verán achégate á Biblioteca Municipal Mª José Ruso (Dorneda) e atoparás lecturas estivais para todas as idades, poderás coñecer xente interesante na nosa sección de libros e pelis biográficas, preparar as túas escapadas viaxeiras coa axuda das nosas guías de viaxe ou aprender a ser un-unha explorador-a da natureza coa mostra infantil "Un verán para explorar".

Tertulian@s da Biblioteca Rosalía de Castro (Santa Cruz): trinta e tantos corazóns latexando xuntos!!!

A complicación deste último ano obrigounos a todas e a todos a cambiar moitos hábitos. 

Un deles foi pasar das tertulias presenciais ás virtuais. Non foi fácil xa que todo era novo, pero grazas ao apoio e ao interese amosado por tod@s @s tertulian@s fixémolo posible. E non só iso, senón que conseguimos gozar enormemente de cada sesión.

Desde a Biblioteca Municipal Rosalía de Castro (Santa Cruz), queremos agradecer ese empeño e cordialidade ás nosas tertulianas e tertulianos. 

 

Este video vai por e para tod@s vós.

Pola vosa fidelidade e comprensión!!! Por non tirar nunca a toalla a pesar das dificultades!!! 

GRAZAS DE TODO CORAZÓN!!!

Recomendacións en Radioleiros: 18 xuño 2021

- Infantil (a partir de 8 anos):

Patio de luces, de Érica Esmorís, ilustracións de Juan Berrio

Xerais, 2020

Versión dixital en Galiciale

Lea é a neta dun porteiro e ten a curiosidade de saber quen son os veciños e veciñas do seu edificio. Serán tal e como os imaxina?. Unha historia divertida con estupendas ilustracións.

- Mozas/os e adultas/os:

Cuaderno de memorias coloniales, de Isabela Figueiredo

Libros del Asteroide, 2021

Versión dixital en Ebiblio

No Mozambique dos primeiros setenta, unha nena filla de portugueses lembra o seu día a día nun mundo dividido entre brancos e negros. Dun xeito duro e directo, esta filla de colonos transmite os últimos tempos da colonia nun texto polémico e admirado.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.

”No verán le algo diferente”, mostra de libros na Biblioteca Mª José Trincado (Mera)

Na Biblioteca Municipal Mª José Trincado (Mera) teremos unha mostra de libros de editoriais independentes non pertencentes aos grandes grupos do sector. Estas editoriais dan voz a autoras-es e obras descoñecidas para o gran público, que están fóra dos circuitos comerciais pero que ofrecen literatura de gran calidade. 

Grazas a elas descubrimos auténticas xoias que non deben pasar desapercibidas!!!

Recomendacións en Radioleiros: 11 xuño 2021

- Infantil (nenas-os a partir de 10 anos):

"A grande epopea do pianista de Cans" de Xosé A. Perozo; ilustracións de Fran Muñiz. En Auga Editora.

Pedro de Chamorro acadou gloria e sona no século XVIII pola súa adicación á música.

- Mozas-os e adultas-os: 

"Hora Zero: la inteligencia británica en España durante la Segunda Guerra Mundial" de Emilio Grandío Seoane. Editado por Cátedra.

Unha detallada investigación histórica dunha das partes máis interesantes da II Guerra Mundial.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.