49 sesións de setembro a novembro de 2025!!! Ler conta moito, Hora do conto e actividades infantís en Bibloleiros

Comeza setembro e as Bibliotecas Municipais de Oleiros organizan actividades de promoción da lectura dirixidas a crianzas de 2 a 4 anos e a partir de 5 anos. As sesións de contacontos e os obradoiros terán lugar ás 17:30 h e as actividades infantís ás 18:30 h. Serán contacontos para crianzas de 2 a 4 anos, actividades infantís para nenas e nenos a partir de 5 anos (maxia, narración de contos, etc.) e obradoiros (ciencia, malabares, etc.) para a cativada a partir de 6 anos.

Xa que o aforo é limitado, é imprescindible reservar praza na biblioteca en que se desenvolva cada unha das actividades. Podes facelo desde dez días antes da celebración da actividade, achegándote persoalmente, por teléfono ou internet en www.oleiros.org/bibliotecas/inscribete

Contaremos con Compañías como Trémola Teatro, A Xanela do Maxín, Tarabelos Teatro, Eduvía e Un Mar de Cores. Contadoras-es como Raquel de Ana, Charo Pita, Ramiro Neira, Marta Ortiz, Raquel Crespo, Catuxa Cela, Ariadna Santana e Raquel Queizás. Artistas como Pablo Díaz e Pakolas. Divulgadoras da ciencia como Leader Dreams, Ciencia Kids, Cuarto de Inverno. Maxia e historias fabulosas con 2 Minds Combined, Pedras de papel, Mago Rafa, Mago Pedro Bugarín, Dani Blanco, Fraga dos mouros, Magia en la manga, Donde viven los cuentos. 

Ler conta moito é un programa de dinamización da lectura nas bibliotecas públicas promovido pola Secretaría Xeral de Cultura da Xunta de Galicia, a través da Rede de Bibliotecas Públicas de Galicia e en colaboración coas Bibliotecas Municipais de Oleiros. Súmase á programación das Bibliotecas Municipais de Oleiros para completar a oferta de actividades de setembro a final de ano. Fomentar a lectura a través do pracer e o gusto por esta, divertirse escoitando contos, facer novas lectoras e lectores ou consolidar este hábito e espertar a sensibilidade e o pracer que proporciona a lectura son algúns dos nosos obxectivos. A información está dispoñible en calquera das sete bibliotecas municipais e nesta ligazón.