Premio á Innovación bibliotecaria de Galicia ao Concello de Oleiros polo proxecto “Ler para saber: A CIENCIA” presentado pola Biblioteca Central Rialeda (Perillo)

A Consellería de Cultura da Xunta de Galicia concede o Premio á innovación bibliotecaria de Galicia 2024, na categoría de concellos de máis de 10.000 habitantes, ao Concello de Oleiros, polo proxecto “Ler para saber: A CIENCIA” presentado pola Biblioteca Central Rialeda (Perillo). O galardón ten como obxectivo impulsar e dar visibilidade ás propostas de carácter innovador e ás boas prácticas levadas a cabo por estas entidades locais, valorando a súa orixinalidade. É un proxecto organizado pola Biblioteca Central Rialeda e o CEIP Valle-Inclán (Perillo). Desde o CEIP Valle-Inclán coordina todas as actividades a profesora Fina Mosquera. Formado por charlas e obradoiros de divulgación científica que se desenvolven na Biblioteca Rialeda durante determinados venres, ás 18.30 h, dos meses de febreiro a maio e de outubro a decembro. Está dirixido a nenas-os maiores de 10 anos, adolescentes, mocidade e público en xeral.  Para poder levalo a cabo é imprescindible a colaboración do profesorado, alumnado e nais-pais de alumnado do CEIP Valle-Inclán, así como profesorado da Universidade da Coruña e de educación secundaria de diversos institutos, diversos profesionais e expertas-os da  enxeñaría, medicina, arquitectura, nutrición, veterinaria, misións planetarias,  informática, bióloxía, membros de diversas asociacións como Greenpeace, Asociación Micolóxica Coruñesa, técnicas-os dos Museos Científicos Coruñeses, etc. Todas-os as-os ponentes que imparten estas conferencias e obradoiros fano de forma altruísta e gratuíta. Consiste na presentación e explicación dun tema científico, dunha forma sinxela e comprensible para todo tipo de público, de maneira que as-os asistentes poidan asimilar os conceptos e ideas básicas sobre a temática tratada, aprendendo uns coñecementos e conceptos sobre o mundo da ciencia importantes para desenvolverse na sociedade actual. Algúns dos temas tratados ou que se van tratar son: programación informática e usos de novas tecnoloxías, a xenética, a bioloxía, novos experimentos científicos, o corpo humano, a alimentación, o cambio climático, a botánica, a conservación dos océanos, astronomía, aeronáutica e misións espaciais, a arquitectura, os fungos, o medio ambiente, a Expedición Balmis, os antibióticos, etc.

Os obxectivos que se pretenden conseguir son: achegar a ciencia a todas as persoas (pero principalmente a crianzas e adolescentes), ampliar os coñecementos sobre temas científicos de importancia na vida diaria, fomentar o coñecemento específico dunha materia determinada, dinamizar os fondos bibliográficos sobre estes temas, atraer á biblioteca a un público interesado pola ciencia e, en definitiva,  fomentar  a lectura e a consulta de libros que traten estas materias. Programáronse conferencias, obradoiros, prácticas e experimentos sobre temas moi diferentes para atraer a un público de gustos diversos e variados. Primeiramente dúas-dous alumnas-os dan unha breve explicación e a continuación é a conferencia propiamente dita. A biblioteca realiza unha selección bibliográfica sobre o tema que se vai tratar. Expóñense todos os fondos da escolla para que as persoas que asisten aos actos os vexan e os leven en préstamo. Pódese finalizar cunha parte práctica (obradoiros, experimentos, prácticas botánicas ou de bioloxía, etc). Os aspectos principais deste proxecto radican na divulgación de temas científicos, co traballo anterior na aula, a preparación do alumnado participante por parte do seu profesorado, a implicación das-os nais e pais e, por suposto, a colaboración altruísta e gratuíta dos distintos profesionais que veñen a impartir as diferentes conferencias. Consideramos que actualmente é fundamental  traballar a cultura científica, un dos piares básicos dunha sociedade culta, formada e responsable. Coa divulgación dos diversos temas de ciencia e tecnoloxía preténdese facer accesible a toda a poboación o coñecemento científico. Poñer a mirada nos diversos campos do mundo da ciencia que poden resultar útiles á cidadanía á hora de comprender mellor estas temáticas, de forma que teña a información necesaria para adquirir unha opinión sobre cuestións relacionadas cos avances da ciencia e as súas repercusións, para facilitar que cada persoa teña un pensamento crítico.

Moitas grazas a todas as persoas que colaboran ou colaboraron neste proxecto e a todas as persoas asistentes!!!