Día Mundial do Libro 2025: expos de Carmen Martín Gaite e Ana María Matute en Rialeda

O Día Mundial do Libro celébrase cada 23 de abril.
Un 23 de abril de 1616 faleceron Cervantes, Shakespeare e Inca Garcilaso de la Vega. Tamén un 23 de abril naceron –ou finaron– escritores eminentes como Vladimir Nabokov, Josep Pla ou Manuel Mejía Vallejo. Por iso que esta data tan simbólica para a literatura universal foi a escollida pola Conferencia Xeral da UNESCO (1995) como un xeito de fomentar a lectura, recoñecer a figura da-do autora-o e procurar o fortalecemento da industria editorial de cada país. A UNESCO designou Capital Mundial do Libro 2025 ao Rio de Janeiro, primeira vez que unha cidade de lingua portuguesa é distinguida como tal.

Na Biblioteca Central  Rialeda (Perillo) queremos celebrar esta data (xunto a outras actividades) adicando senllas exposicións bibliográficas a Carmen Martín Gaite e Ana María Matute, ambas da Xeración do 50, do medio século ou "dos nenos da guerra", denominacións que dá a historia da literatura española ao grupo literario de escritoras-es nacidas-os en torno aos anos 1920 e que publican sobre os 50`. Estas dúas espléndidas voces literarias naceron en 1925 e abriron un extenso camiño cara a imaxinación amosando unha escrita profundamente traballada.